Ngaahi Fakakaukau Maʻá e Efiafi Fakafāmili ʻi ʻApí
ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki. Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.
“ʻOkú ke ʻOsi ʻIloʻi,” p. 6: Vahevahe e talanoa kia ʻEti Huaniká. Fakaafeʻi e kau mēmipa ʻo e fāmilí ke lau ʻa e Molonai 10:3–5. Mou aleaʻi e talaʻofa ʻoku fai mai ʻe Molonaí. Tuku ke hiki ʻe he kau mēmipa ʻo e fāmilí ʻenau ngaahi fakamoʻoni ki he Tohi ʻa Molomoná mo Siosefa Sāmitá (ʻe lava pē ke tā ʻe he fānau iiki angé ha fakatātā ʻo e Tohi ʻa Molomoná mo e Palōfitá).
“Ko e Meʻa ʻe Lava ke Fai ʻe he Toko Tahá,” p. 16: Kamata ʻaki e ʻekitivitií hano hivaʻi e foʻi hiva ko e “Loto-toʻa ʻa Nīfaí” (Tohi Hiva ʻa e Fānaú, 64–65). Fai e talanoa kia ʻAivesi Veí, pea fakamatala fakanounouʻi e ngaahi founga naʻá ne fekumi ai ki ha ngaahi faingamālie ke fai ha lelei ʻo hangē pē ko Nīfaí. Fakaafeʻi e kau mēmipa ʻo e fāmilí ke nau fakamatala ki ha ngaahi meʻa lelei naʻa nau fai ʻi haʻanau tokoniʻi ha niʻihi kehe. ʻAi ke mou fakakaukauʻi fakafāmili ʻi he faʻa lotu ha founga ke tokoni ai ki ha niʻihi kehe (pe fili ha fakakaukau mei ha fakamatala) lolotonga ʻa e uiké. Fakaʻosi ʻaki hano lau pea aleaʻi ʻa e 1 Nīfai 3:7.
“Ko e Laʻi Paʻanga Pepa ʻe 20 Siamané,” p. 20: Kimuʻa pea fai e lēsoní, kofukofuʻi ha fanga kiʻi meʻa pē ʻi homou falé. Fai e talanoa ki he laʻi paʻanga pepa ʻe 20. Fakaʻaliʻali hake e fanga kiʻi meʻa naʻá ke kofukofuʻí, pea fakaafeʻi e kau mēmipa ʻo e fāmilí ke nau mateʻi mai e meʻa takitaha kimuʻa peá ke fakaava e kofukofú. Fakamatalaʻi ange naʻá ke ʻiloʻi e meʻa ʻi lotó he ko koe naʻá ke kofukofuʻí. Fakafehoanaki ʻeni ki hono ʻafioʻi ʻe he Tamai Hēvaní ʻetau moʻuí mo hono ʻuhinga ʻoku totonu ke tau kole ai kiate Ia ke fakahinohino kitautolú. Lau e palakalafi fakamuimui taha ʻe fā ʻo e fakamatalá, pea aleaʻi e meʻa ʻoku fie maʻu ke fai ke tau moʻui taau ai ke maʻu e fakahinohino ʻa e ʻEikí.
“Ko Hotau ʻApi Fakalangi Maʻa mo Haohaoá,” p. 26: Lau e ʻuluaki palakalafi ʻe ua ʻo e fakamatalá; hili iá pea vahe ki he kau mēmipa ʻo e fāmilí ke nau fakamatalaʻi ha ngaahi fakakaukau mei he tafaʻaki takitaha ʻe faá: lea fakafonuá; ngaahi tohí; mūsiká; mo e ʻātí, fotú, mo e ʻulungāangá. Aleaʻi e founga ʻe lava ke mou ngaohi ai ke toe fakalangi ange homou ʻapí ʻi he tafaʻaki takitaha. Mou fokotuʻu fakafāmili ha taumuʻa ke toʻo mei homou ʻapí ʻa e faʻahinga mītia te ne taʻofi ia mei haʻane hoko ko ha “ʻapi fakalangi.” Fakakaukauʻi foki hano fokotuʻu ha taumuʻa ke ʻomi ki homou ʻapí ha ngaahi tohi, ʻaati, mo ha mūsika ʻoku leleí. Aleaʻi ʻi haʻomou efiafi fakafāmili ʻi ʻapi he kahaʻú ʻa e faikehekehe ʻe ʻomi ʻe he ngaahi meʻa ko ʻení ki he laumālie ʻo homou ʻapí.
“Lele Kae ʻIkai Ongosia,” p. 32: Lau ha niʻihi ʻo e ngaahi fakamoʻoni mei he fakamatala ko ʻení. Faka-kaukauʻi hano hiki ʻe he kau mēmipa ʻo e fāmilí ʻenau ngaahi fakamoʻoni pē ʻanautolu fekauʻaki mo hono moʻui ʻaki e Lea ʻo e Potó. ʻE lava pē ke tā ʻe he fānau iiki angé ha ngaahi fakatātā ʻo ha meʻakai ʻe niʻihi ʻoku fakamatala ki ai ʻi he Tokāteline mo e Ngaahi Fuakava 89:10–17. Fakaafeʻi e kau mēmipa ʻo e fāmilí ke nau feinga maʻu pē ke moʻui ʻaki e Lea ʻo e Potó. ʻE lava ke mou fakaʻosi e lēsoni ko ʻení ʻaki ha kiʻi meʻakai fakatupu moʻui lelei.
“Mālohi ke Muimui ʻi he ʻEikí,” p. K4: Fakaafeʻi e kau mēmipa ʻo e fāmilí ke nau fakamatala ki ha faʻahinga meʻa naʻe ʻikai ke nau toe fai kae lava ke nau muimui ʻi he Fakamoʻuí. ʻEke ange pe ko e hā e meʻa naʻe faingataʻa aí pea mo e meʻa naʻe faingofua aí. Fai e talanoa ki he tuku ʻe Kalotio D. Sīviki ʻene lele ʻi he ʻaho Sāpaté, pea mou aleaʻi ʻa e ngaahi faingataʻa mo e ngaahi tāpuaki naʻá ne maʻu tupu mei he fili naʻá ne faí. Fakaʻosi ʻaki hono lau e palakalafi fakaʻosi ʻo e fakamatalá.