Ko e Ako ke Fanongó
“Fanongo ki heʻeku ngaahi leá; ʻaʻeva ʻi he angamalū ʻo hoku Laumālié, pea te ke maʻu ʻa e melinó ʻiate au” (T&F 19:23).
ʻI hoku taʻu hivá, naʻe fai ha fakataha fakafāmili ʻi homau falé ʻi Koimipala ʻi Potukali. Naʻe femoʻuekina ʻeku ongomātuʻá ʻi hono ʻai ke fiefia homau kāingá. Naʻe talanoa ʻa e tokotaha kotoa pē mo kakata. Pea ʻi he lolotonga ʻo e femoʻuekina ʻa e kakai lalahí, ne u pehē leva ʻe au ke u fai ha meʻa ke u fiefia mo au.
Naʻe ofi hoku ʻapí ki he Vaitafe Monitikó, pea naʻá ku pehē ʻe fakafiefia ke u ʻalu ʻo taumātaʻu. Naʻe ʻikai ke u fie ʻalu toko taha, ko ia, naʻá ku taki leva hoku kiʻi tuofefne taʻu faá ke ma ō. Naʻá ku ongoʻi naʻe totonu ke u fakahā ki heʻeku fineʻeikí mo e tangataʻeikí ʻa e feituʻu te ma ō ki aí. Ka naʻá na moʻua kinaua he talanoá, ko ia, ne u pehē ke ma ō pe ʻo ʻoua ʻe toe talaange.
Naʻá ma fononga atu he tafaʻaki ʻo e vaitafé kae ʻoua kuó ma maʻu ha kiʻi feituʻu naʻe lelei. Naʻá ku ʻoange leva ki hoku kiʻi tuofefiné ha fanga kiʻi foʻi maka ke ne tolo ki he loto vaí kae fai ʻeku taumātaʻú.
Naʻe ʻikai fuoloa kuo fakatokangaʻi ʻe heʻeku ongomātuʻá ʻoku ʻikai ke u ʻi ʻapi mo hoku kiʻi tuofefiné. Naʻá na lele takai he meʻalelé ʻi he koló ko hono kumi kimaua. Hili ha ngaahi houa lahi mei ai kuo fakatokangaʻi ʻe heʻeku tangataʻeikí ʻoku pulia ʻeku nāunau taumātaʻú. Ko ia naʻá na kumi kimaua ki he veʻe vaitafé kae ʻoua kuó na maʻu.
Naʻe nonga hifo ʻeku ongomātuʻá heʻena maʻu kimauá, ka naʻá na toe loto-mamahi foki ʻiate au. Naʻe mātuʻaki fakatuʻutāmaki ke vaʻinga he veʻe vaitafé taʻe ʻi ai ʻeku ongomātuʻá, tautautefito ki hoku kiʻi tuofefiné.
Naʻá ku ako ʻi he meʻa ko ʻeni ne hokó ʻoku fie maʻu maʻu pē ke tau talanoa mo ʻetau mātuʻá—pea fanongo kiate kinaua. ʻOku nau fie maʻu ʻa e lelei tahá maʻatautolu. Naʻá ku toe ako foki ai hono mahuʻinga ke fakafanongo ki he Laumālie Māʻoniʻoní. Naʻe feinga ʻa e Laumālie Māʻoniʻoní ke ne talamai ʻoku ʻikai totonu ke u ʻalu ʻo taumātaʻu taʻe tomuʻa fakahā ki heʻeku mātuʻá. Ka naʻe ʻikai ke u fanongo au. Neongo naʻá ma fiefia mo hoku tuofefiné, ka naʻe tuʻu fakatuʻutāmaki kiate kimaua. Kapau te tau fanongo fakalelei ki heʻetau mātuʻá mo e Laumālie Māʻoniʻoní, te tau malu.
Tā fakatātaaʻi ʻe Casey Nelson