Maluʻi mei he Meʻa Taʻeʻamanekiná
Naʻa mau ʻilo ʻe tokangaʻi kimautolu ʻe he ʻEikí ʻi heʻemau fononga ki he temipalé. Ka naʻe ʻikai ke mau ʻiloʻi ʻa e lahi ʻo ʻEne maluʻi te mau fie maʻú.
Hili ʻemau fononga pasi ʻi ha houa ʻe 61, ne tūʻuta atu ʻemau kulupu toʻu tupú ki he Temipale Manila Filipainí. ʻI hono fakamanatua ʻo e taʻu 20 ʻo e temipalé, ne fakamoleki ʻe he toʻu tupu ʻo e Siteiki Tavaó ha māhina ʻe hiva ko e teuteu ki he fonongá ni, kau ʻi ha ngaahi kalasi hisitōlia fakafāmili, kau kakato ʻi he ngaahi ʻekitivitī ʻa e Siasí, fakatotolo mo teuteu ha ngaahi hingoa fakafāmili, mo tokoni ʻi hono tānaki ha paʻanga ki he fonongá. Naʻe ʻi ai ha ongo fakafiefia ʻi heʻemau hifo atu ʻa e toko 63 mei he pasí ʻi he pō Mōnite ko iá. ʻI he fale nofoʻanga ʻo e kau pataloni ʻo e temipalé, naʻa mau fakahoko ai ha efafi fakafāmili tokolahi moʻoni, kau ai ha ngaahi hiva mo ha ngaahi pōpoaki fakalaumālie, pea mau toki feinga leva ke mohe.
ʻI he ʻaho ʻe ua hono hokó, naʻe papitaiso ai ʻa e toʻu tupú mo hilifakinima haʻanau ngaahi kui ʻe toko 2,000 tupu, ʻo ʻoange heni ha faingamālie maʻá e ngaahi kui ko iá ke nau tali ʻa e ongoongolelei kuo toe fakafoki maí. Naʻe ʻikai ke mau ongoʻi fiekaia pe ongosia ʻi heʻemau ngāue ʻo lau-houa ʻi he temipalé. Naʻe mālohi ʻaupito ʻa e Laumālié. Naʻe ʻi ai ha toʻu tupu ʻe niʻihi naʻe maamangia honau fofongá; ko ha niʻihi naʻe tafe ʻa e loʻimata ʻo e fiefiá ʻi honau kouʻahé.
Naʻe ʻikai hano taimi kuo hokosia ʻa e taimi ke mau foki aí. Hili ha ngaahi momeniti mei heʻemau kamata fonongá, kuo ongo mai ʻa e meʻa fakatokanga ʻa e kau polisí ʻo ʻikai toe lōngonoa e pasí. Naʻe ʻātakaiʻi kimautolu ʻi tuʻa ʻe ha ngaahi kā leʻo, ʻo taʻofi kimautolu. Pea mau fakatokangaʻi leva ʻoku ʻātakaiʻi kimautolu ʻe ha kau polisi mo haʻanau ngaahi meʻafana, ʻo fakahanga ki muʻa. ʻI he ngaahi momeniti mafatukituki ko ʻení, ne mau ʻilo kuo puke fakamālohiʻi ʻa e kau pāsese ʻo ha pasi ʻoku ʻi muʻa siʻi pē ʻiate kimautolu, pea naʻe fakaʻaongaʻi ʻe he kau polisí ia ʻemau pasí ke nau unga ai!
Naʻe fai ʻe kimautolu kau takí homau lelei tahá ke fakanonga ʻa e taha kotoa, ka naʻe ʻi ai ha niʻihi ia naʻe lelea honau lotó. ʻI he lahi ʻo e puputuʻú naʻe tuʻutuʻuni leva ʻe he kau polisí ke mau tākoto kotoa ki he falikí. Hili ha ngaahi miniti fakailifia lahi, kuo mau fanongo atu ki ha tangata ʻoku kaila ke mau hola kotoa ki tuʻa mei he pasí. ʻI heʻemau talangofua ki he tuʻutuʻuní, ne mau fakavavevave leva ki tuʻa mei he pasí ʻo hola ki ha fale ofi mai naʻe ʻikai nofoʻi.
Naʻa mau tangutu ʻi he loto fale fakapoʻulí ʻo laka hake ʻi ha houa ʻe taha, ʻo lotu pē mo fakafanongo ki he taufaná. Faifai pea fakahoko mai kiate kimautolu ʻe lava ke mau toe foki ki heʻemau pasí. Kuo longo ʻa e fefanaʻakí; mate ha toko ua naʻe puke fakamālohi, mo ha toko ua naʻa nau fai e puke fakamālohí.
Naʻa mau tetetete pē ʻi heʻemau toe hoko atu ʻemau fonongá. Neongo ia, ko e taimi naʻe fakaholoholo hifo ai ʻemau tailiilí, ne mau fakatokangaʻi naʻe maluʻi kimautolu. Naʻe ʻikai hamau taha ʻe lavea, pea ne mau ʻilo naʻe ʻiate kimautolu ʻa e toʻukupu ʻo e ʻEikí. Ne mau ongoʻi ne kau ʻa langi mo kimautolu pea mau fakakaukau mahalo ne kau ai ha niʻihi ʻo kinautolu ne mau papitaisó.
Naʻá ku fakakaukau ai ki he potufolofola ʻoku pehē, “Ko au, ko e ʻEikí, ʻoku ou haʻisia ʻo ka mou ka fai ʻa e meʻa ʻoku ou lea ʻakí” (T&F 82:10), pea naʻá ku fiefia ʻi hono tauhi ʻe he ʻEikí ʻEne ngaahi palōmesí. Ko e taimi ʻoku tau tauhi ai ʻa e ngaahi fekaú mo hoko atu ʻi he faivelenga ʻi hotau ngaahi fatongiá, kau ai ʻa e ngāue fakatemipalé mo e hisitōlia fakafāmilí, te tau taau ai mo e ngaahi tāpuaki ʻa e ʻEikí—kau ai ʻEne maluʻí ʻi he taimi te tau fie maʻu lahi taha aí.
Tā fakatātaaʻi ʻe Roger Motzkus