ʻI he Ongoongó

Tokoni ʻa e Ngaahi Vitiō ʻi he ʻInitanetí ke Fakamafola ʻa e ʻAmanaki Lelei ʻo e Ongoongoleleí

ʻOku ʻamanaki ke tuku mai ʻa e Ngaahi Pōpoaki Fakamāmongá (Mormon Messages), ko ha sēnolo ʻa e Siasí ʻi he tuʻasila ʻInitaneti ʻoku vahevahe ai ʻa e ngaahi vitioó ko e “YouTube,” ʻi ha ngaahi lea fakafonua ʻe 10 tupu. Naʻe tuku mai ʻi ʻAokosi 2008 ʻa e ʻuluaki vitiō ʻo e Ngaahi Pōpoaki Fakamāmongá ʻi he lea faka-Pilitāniá, kae tuku mai ʻa hono lea faka-Sipēiní ʻi ʻEpeleli 2009. Makehe mei aí, ʻoku ʻamanaki ke tuku mai ʻa e sēnoló ʻi he lea faka-Kenitoní, Falaniseé, Siamané, ʻĪtalí, Siapaní, Kōleá, Menitaliní, Pōtukalí, mo e faka-Lūsiá ʻi he fakaʻosinga ʻo e ʻuluaki kuata ʻo e 2010.

Naʻe pehē ʻe Tēvita Nilasoni, ko e talēkita pule ʻo e Potungāue Ongó mo e ʻAta ʻa e Siasí, “Ko e tefitoʻi taumuʻa ʻa e Ngaahi Pōpoaki Fakamāmongá ke ʻoatu ha ngaahi pōpoaki vitiō nounou mo fakalaumālie … ʻokú ne fakamālohia ʻa e kāingalotú mo poupouʻi kinautolu ke vahevahe ʻa e pōpoaki ʻa e ongoongoleleí mo e niʻihi kehé ʻi he ʻinitanetí.” ʻOku feʻunga ʻa e lōloa ʻo e ngaahi vitiō kuo faʻu ʻe he Siasí mo ha miniti ʻe tolu ki he fā pea ko ha ngaahi lea fakalaumālie mei he Kau Taki Māʻolungá mo e kau taki ʻo e ngaahi houalotú.

Kuo kau ʻi he ngaahi kongokonga vitiō kimuʻá ʻa e “What Matters Most (Ko e Hā ʻa e Meʻa ʻoku Mahuʻinga Tahá),” ʻa ia ʻoku fakalotolahiʻi ai ʻe Palesiteni Tōmasi S. Monisoni ʻa e kau mamatá ke nau feohi mo honau ngaahi ʻofaʻangá; “Counsel to Youth (Faleʻi ki he Toʻu tupú),” ʻa ia ʻoku faleʻi ai ʻe Palesiteni Poiti K. Peeka, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa e toʻu tupú ki he founga ke maʻu ai ʻa e fiefiá; pea mo e “The Women in Our Lives (Ko e Kau Fafine ʻi Heʻetau Moʻuí),” fai ʻe Palesiteni Kōtoni B. Hingikelī (1910–2008).

Makehe mei hono fakaʻaliʻali ʻo e ngaahi lea ʻa e kau taki ʻo e Siasí, ʻoku toe fakatefito ʻa e Ngaahi Pōpoaki Fakamāmongá ʻi he kāingalotu Siasí. Fakatātā ʻaki ʻeni, naʻe fakamatalaʻi ʻe he vitiō “Finding Hope (Fekumi ki he ʻAmanaki Leleí)” ʻa e talanoa kia Vikitā Kusimani, ko ha tokotaha naʻe hao moʻui mei he ʻohofi fakatautoitoi ʻo ʻAmelika ʻi he ʻaho 11 ʻo Sepitemá, 2001, pea mo ʻene fononga ke fekumi ki he melinó ʻi he lotolotonga ʻo ʻene loto mamahi lahí.

ʻI he aʻu mai ki he ʻaho 20 ʻo Sepitema, 2009, kuo mamataʻi ʻa e sēnoló ʻo lahi hake ʻi he tuʻo 5.4 milioná pea naʻe kau ki he fuofua sēnolo ʻe 20 manakoa taha ʻi he kalasi ʻo e “Nonprofits and Activism” ʻi he YouTube. ʻOku anga maheni ʻaki ha hū tuʻo 200,000 mai ki he pōpoaki taki taha.

ʻOku toe maʻu ʻa e ngaahi vitioó ʻi he LDS.org, ʻa ia ʻoku lava ke maʻu ʻe he kau mamatá ʻa e ngaahi konga kuo ʻosi ʻoatu kimuʻá.

Naʻe pehē ʻe Misa Nilasoni, “ʻOku ou ʻamanaki pē ʻe toe tokolahi ange ʻa e kāingalotu te nau kau mai ʻi hono vahevahe ʻo e ngaahi vitioó ni mo kinautolu ʻoku ʻikai kau mai ki heʻetau tui fakalotú koeʻuhí ke nau toe ʻilo ange ʻa e tuʻunga ʻoku ʻi ai ʻa e Siasí mo ʻetau holi ke muimui kia Sīsū Kalaisi.”

Fakamatala Fakamuimuitaha ki he Fakalakalaka Fakatāutahá

Kuo ʻomai mei he kau palesitenisī lahi ʻo e Kau Finemuí ʻa e fakamatala fakamuimuitaha ki he Fakalakalaka Fakatāutahá ke omi ai ʻa e ngaahi liliu fakamuimuitahá.

ʻOku takafi pingikī ʻa e kiʻi tohi Fakalakalaka Fakatāutahá foʻou pea fakakau ai ʻa e ngaahi ʻekitivitī ki he tuʻunga ʻulungāanga mahuʻinga foʻou hono valú—angamaʻá—ʻa ia naʻe tānaki mai ʻi he fakaʻosinga ʻo e 2008. ʻOku kei tatau pē ʻa e lahi ʻo e ngaahi ʻekitivitī ʻo e tuʻunga ʻulungāanga mahuʻingá, ka kuo ʻi ai e niʻihi kuo liliu ke fenāpasi mo e taimí mo toe tokanga ange ki he ngaahi fuakava ʻo e temipalé.

ʻOku fakafōtunga he taimí ni ʻa e mētali Fakalāngilangi ʻo e Tuʻunga Fakafinemuí, ʻo toe tānaki atu ki he ngaahi taua ʻo e temipalé, ha punungahone ʻa ia ʻokú ne fokotuʻu mai ʻa e uouangatahá, fengāueʻakí mo e ngāué; ko e lose Maea Meití ki he ʻofá, tuí mo e haohaoá; mo e pale loumailé, ʻa ia ʻokú ne fakafofongaʻi ʻa e lāngilangí mo e ikuná. ʻOku fakafofongaʻi ʻe ha kiʻi lupi siʻisiʻi ʻi loto-mālie ʻo e losé ʻa e tuʻunga ʻulungāanga mahuʻinga foʻou ʻo e angamaʻá (vakai Lea Fakatātā 31:10) mo e fakakakato ʻo e Fakalakalaka Fakatāutahá.

ʻOku kau ʻi he ngaahi nāunau kuo tānaki maí ha pousitā ʻo e kaveinga foʻoú mo e ngaahi līpine fakafolofola. ʻE foaki ʻa e ngaahi līpiné ʻi hono fakakakato ʻo e ngaahi meʻa ke aʻusia ʻi he ngaahi tuʻunga ʻulungāanga mahuʻingá mo e ngaahi ngāué (projects).

ʻOku lolotonga maʻu atu ʻa e ngaahi nāunaú ʻi he lea faka-Pilitāniá, Sipeiní mo e faka-Potukalí. ʻE maʻu ʻa e ngaahi fakamatalá ʻi ha toe lea fakafonua ʻe 51 kehe ʻi he konga ki muʻa ʻo e 2010.

ʻE vavé ni ʻa hono tuku mai ʻa e Ngaahi Pōpoaki Fakamāmongá ʻi ha ngaahi lea fakafonua ʻe 10 tupu.

Kuo ʻi ai ha fōtunga foʻou ʻo e mētali ʻo e Fakalāngilangi ʻo e Tuʻunga Fakafinemuí.

faitaaʻi ʻe john buckles