Ko e hā ʻOku ʻIkai ke Ke Haʻu ai ki he Pātí?
Naʻe mālohi e teké. Naʻe pau ke u fai ha fili.
ʻI heʻeku hoko ko ha papi ului ki he Siasí ʻi Malēsiá, ko ha fonua ʻoku toko siʻi ai ha kau Kalisitiane, ne u faʻa faingataʻaʻia he taimi ʻe niʻihi ke tuʻu hake ʻo taukaveʻi ʻeku tuí. ʻI ha ʻaho ʻe taha ʻi Tīsema, ne talamai ai ʻe hoku pule-ngāué ʻe fai ha paati fakamanatu ʻo ʻemau kautahá ʻi he fakaʻosinga ʻo e taʻú pea naʻe fie maʻu ke u ʻi ai. Naʻá ku hohaʻa pea naʻe ʻikai ke u fie ʻalu ki ai koeʻuhí he ko ha konga ia ʻo e meʻa ʻoku anga ʻaki ʻe heʻemau kautahá ke inu kava mālohi he ngaahi pātí. Naʻá ku toe ʻilo foki ʻe feinga hoku kaungā-ngāué ke fakamālohiʻi au ke u inu.
Ka naʻe tuʻutuʻuni mālohi ʻeku pulé kuo pau ke u ʻi ai. Naʻá ku fifili pe ʻe anga fēfē haʻaku ikunaʻi ʻa e faingataʻá ni.
Naʻe taʻofi au ki mui ʻe haku kaungā-ngāue ʻo ne ʻeke mai, “Ko e hā ʻoku ʻikai ke ke fie haʻu ai ki he pātí?” Naʻá ku talaange koeʻuhí ko ʻeku tui fakalotú, ʻoku ʻikai ke u inu kava mālohi.
Naʻá ne tali fakaʻita mai leva, “ ʻOku totonu ke ke hohaʻa he taimí ni ki he māmani ʻokú ke lolotonga moʻui aí, kae ʻikai ki ha māmani ʻoku ʻikai ke ʻi aí. ʻOkú ke fie maʻu paʻanga pe te ke liʻaki ia koeʻuhí ko hoʻo tui ngalivalé?” Ko e taimi naʻá ne fehuʻi mai ai ʻení, naʻá ku ongoʻi manavasiʻi. Naʻá ku ʻilo kapau he ʻikai ke u inu ʻi he pātí, ʻe mole ʻeku ngāué. Fakafokifā pē kuo haʻu ha potufolofola ki heʻeku fakakaukaú: “Ko au, ʻio, ko au ia ʻoku fakafiemālieʻi koé: ko hai koe, ke ke manavahē ki ha tangata ʻa ia ʻe mate, pea ki he foha ʻo e tangatá ʻa ia ʻe ngaohi ʻo hangē ko e mohukú; pea ʻokú ke fakangalongaloʻi ʻa [e ʻEikí] ko ho tupuʻangá, ʻa ia kuó ne fofola ʻa e ngaahi langí, pea ʻai mo e ngaahi tuʻunga ʻo e māmaní?” (ʻĪsaia 51:12–13).
Naʻá ku ʻilo he taimi pē ko iá ʻoku totonu ke u manavahē ki he ʻOtuá, kae ʻikai ko hoku kaungā-ngāué pe ko ʻeku pulé. Naʻá ku toe fakatokangaʻi foki ko ʻeku taumuʻa he māmaní ʻoku ʻikai ko e kumi ha paʻanga ka ke tupulaki fakalaumālie. Ko ia ne u taliange leva ʻo pehē, “Te u fili ʻeku tui fakalotú, pea ʻoku totonu ke ke fakaʻapaʻapaʻi ia.”
Hili ha ngaahi uike siʻi mei ai naʻá ku fakafisi mei heʻeku ngāué. ʻI hoku ʻaho fakaʻosi he ngāué, naʻá ma talanoa lelei ai mo hoku kaungā-ngāué. Naʻá ku fakamatalaʻi ange hono kehekehe ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo e ngaahi siasi kehé. Naʻá ku fakamatala ange fekauʻaki mo ʻeku tuí pea mo ʻeku holi ke tauhi ʻa e ngaahi fekaú.
Hili nai ha uike ʻe taha mei ai kuó u maʻu ha ngāue ʻe taha naʻe totongi lelei ange ia ʻi he ngāue naʻá ku fakafisi mei aí. Naʻe toe ʻomi foki ʻe heʻeku ngāue foʻoú ha taimi ke u teuteu ai ke ngāue fakafaifekau taimi kakato.
Naʻe ʻikai ngata pē ʻi hono akoʻi au ʻe he meʻa ne hokó ʻe hanga ʻe he tauhi ʻo e ngaahi fekaú ʻo fakafaingofuaʻi ʻeku foki ki he Tamai Hēvaní ʻi ha ʻahó, ka naʻá ne toe ʻomi kiate au ha loto lahi, neongo pe ko e hā ha faingataʻa te u fehangahangai mo ia ʻi he ʻaho kotoa pē, ka ʻe teuteuʻi ʻe he ʻEikí ha founga maʻaku (vakai, 1 Nīfai 3:7).
Tā fakatātā ʻa Gregg Thorkelson