Ko ʻEku Taumuʻa he ʻAkapulú
Naʻá ku fie vaʻinga ʻi ha timi lelei, kae mahalo naʻe fuʻu faingataʻa ʻa e feinga ki aí.
ʻOku ou manako ʻi he vaʻinga ʻakapulú. Ko hoku taʻu 14 ʻeni pea ne u vaʻinga ʻakapulu talu mei hoku taʻu 5. Kuo akoʻi au ʻe he sipotí ke u pikimaʻu ki he ngaahi tuʻunga moʻui māʻolungá mo e ngaahi meʻa mahuʻinga kuó u ʻosi fokotuʻu maʻakú, ʻo tatau ai pē kapau ʻe faingataʻa ʻa e ngaahi filí ʻi ha taimi ʻe niʻihi. Ko e taha ʻo e ngaahi fili faingataʻa ko iá pe te u vaʻinga ʻi he ʻaho Sāpaté pe ʻikai.
ʻI hoku taʻu hivá, naʻá ku fuʻu saiʻia mo fakaʻapaʻapaʻi ʻeku faiako sipoti, ko Hāsemí. Neongo ia, naʻá ku fie vaʻinga ʻi he timi tatau mo haku kaungāmeʻa he akó, ko ia, naʻá ku ʻahiʻahi ai ki ha timi kehe. Ko e timi ko ʻení naʻe lelei ʻaupito, pea naʻá ku ʻilo kapau te u lava ki ai, ʻe fie maʻu ke u mātuʻaki faivelenga mo vaʻinga mālohi. Naʻe tokolahi ha tamaiki tangata naʻa nau fie kau ʻi he timi ko ʻení, ka naʻá ku monūʻia ke lava ʻo kau ki he timí hili ia ha ngaahi feinga lahi.
Ne hoko ki he ʻaho ʻo e tau filifili fakaʻosí. Naʻe fai hoku lelei tahá, pea naʻá ku ongoʻi fiefia. ʻI heʻene ʻosí, naʻe haʻu ʻa e faiako sipotí kiate au mo ʻeku fineʻeikí ʻo ne pehē ʻokú ne fuʻu fie maʻu ʻaupito au he timí. Naʻá ku fiefia lahi. Ka naʻá ne toe ʻeke mai, “ ʻE lava ke ke vaʻinga he ʻaho Sāpaté? Kuo pau ke u fokotuʻutuʻu ha timi ki he feʻauhí, ʻa ia ʻe ʻi ai ha taimi ʻe fai ai e vaʻingá ʻi he Sāpaté.”
Naʻe tuku ʻe heʻeku fineʻeikí ke u tali ʻa e fehuʻí.
“ ʻIkai, tangataʻeiki, ʻoku ʻikai ke u vaʻinga Sāpate au.” Naʻá ku ʻilo ko e tali totonú ia, ka ʻoku ngalingali he ʻikai ke u kau ʻi he timí.
ʻI he pō ko ia, naʻe ʻikai fai mai ha telefoni ʻo fakahā mai kuo fili au ki he timí. Naʻá ku taʻefiemālie lahi ʻaupito.
Ka, naʻá ku kau leva ki ha timi ʻi homau feituʻú naʻe lahi ai haku ngaahi kaungāmeʻa. Ne mau maʻu ha taimi fiefia ʻi he ʻuluaki taʻú pea mau lavameʻa, ka ʻi he taʻu hono hokó naʻe faingataʻaʻia ʻa e timí pea ʻikai ke mau fuʻu tokanga fēfē ki he vaʻingá he taimi ʻe niʻihi. Naʻe fakaʻau ke u ʻita. Naʻe fai hoku lelei tahá ʻi he vaʻinga kotoa pē, ka naʻa mau meimei foʻi maʻu pē.
Hili haʻamau vaʻinga ʻe taha naʻe ʻikai ke sai, ne haʻu kiate au ʻa Hāsemi he malaʻe ʻakapulú, he naʻe lelei foki e vaʻinga ia ʻene timí. Naʻá ne ʻeke mai pe ʻoku ou fēfē. Naʻá ku talaange, “ ʻOku ʻikai ke fuʻu sai.” Naʻá ku talaange ʻoku ou ʻofa ki hoku ngaahi kaungāvaʻinga motuʻá. Naʻe faiako foki ʻa Hāsemi ʻaki ha taukei lahi pea ʻoku hangē naʻá ne meimei maʻu maʻu pē ʻa e lelei tahá mei heʻene kau vaʻingá.
Naʻe fehuʻi mai leva ʻe Hāsemi, “Ko e hā haʻo lau kapau te ke hoko ko ha tokotaha vaʻinga ʻoku fakaafeʻi ki heʻemau timí ʻi he taimi te mau ō ai ki he feʻauhi hokó?”
Naʻá ku tali fiefia ange, “Te u saiʻia ʻaupito ai!”
Naʻe malimali pē ʻa Hāsemi mo pehē mai, “Sai! Ka ʻoku ou fie fai atu ha fehuʻi ʻe taha. Te ke lava ʻo vaʻinga he Sāpaté?” Naʻe kamata ke tō hifo hoku lotó. Pea fakafokifā pē kuó u ongoʻi puke. Naʻá ku manatuʻi ʻa e meʻa ne hoko ʻi he taimi fakamuimui naʻe fai mai ai ʻa e fehuʻi ko ʻení.
Naʻá ku sio ki heʻeku fineʻeikí. Peá u sio ki heʻeku tangataʻeikí. Naʻá na tatali mo kinaua ki heʻeku talí. Naʻá ku sio kia Hāsemi.
Peá u pehē ange, “ ʻIkai, fakamolemole atu. ʻOku ʻikai ke u vaʻinga Sāpate au. ʻE ʻi ai hano faikehekehe?”
Naʻe tuʻu ai ʻa Hāsemi ʻi ha kiʻi taimi siʻi. Kuó ne fakatokangaʻi e mōlia vave atu ʻeku ʻamanakí ʻi heʻeku tali ʻene fehuʻí.
Naʻe pehē mai leva ʻa Hāsemi, “ ʻIkai, ʻoku sai pē ia. Mahalo pē he ʻikai ke mau aʻu ki he tau hau he Sāpaté. Te mau saiʻia pē ke ke vaʻinga mo kimautolu.”
Naʻe ʻikai fuoloa kuó u kamata ako vaʻinga mo e timi ʻa Hāsemí. Naʻe vaʻinga mālohi ʻaupito ʻa e timí, pea naʻa nau talitali lelei au heʻeku foki angé. Naʻá ku saiʻia he vaʻinga mo kinautolú.
Naʻe ʻikai ke mau mālohi kotoa ʻi heʻemau tau he feʻauhí, ka naʻa mau fai kotoa homau lelei tahá, pea ne mau maʻu ha taimi fiefia. Naʻe ʻikai fuoloa kuó u hoko ko ha mēmipa tuʻu maʻu ʻo e timi ʻa Hāsemí. Neongo naʻa nau ʻilo naʻe ʻikai ke u vaʻinga Sāpate, ka naʻa nau kei houngaʻia pē ʻi he meʻa naʻá ku tānaki atu ki he timí ʻi he ngaahi ʻaho vaʻinga kehé.
Kuó u hoko he taimí ni ko ha akonaki ʻi he Lakanga Taulaʻeiki Faka-ʻĒloné. ʻOku ou kei kau pē he feʻauhi ʻakapulú mo kei fili pē ke ʻoua te u vaʻinga he Sāpaté. Kuo teʻeki ai ke hoko ia ko ha palopalema kiate au pe ki he ngaahi timi kuó u vaʻinga aí. ʻOku ou tui ki hono fakaʻapaʻapaʻi ʻo e Sāpaté mo hono tauhi ke māʻoniʻoní. Kiate au, ʻoku ʻuhinga ʻeni ke ʻoua naʻa fakahoko ha sipoti he Sāpaté.
Tā fakatātaaʻi ʻe Greg Stapley