Talafungani ʻo e Ongoongoleleí
Ko e Talanoa Fakatātā ʻo eLoki Tukuʻanga Koloá
Ko e hā ʻa e mahuʻinga ʻo e laumālié? ʻOku fuʻu mahuʻinga ʻaupito pea kuo pau ke maluʻi ia.
ʻOku kau ʻi he ngaahi ongoongo kimuí ni maí ha lipooti ʻo ha kaihaʻa, mo ha ngaahi meʻa ʻoku hāhāmolofia ʻene hā ʻi he hisitōlia ʻo e faihiá. Ko e taumuʻa ʻo e kaihaʻá ko ha tukuʻanga paʻanga malu ʻa ha fale hū koloa ʻoku ngāue ki he ngaahi siuelí mo e ngaahi maka koloá. Naʻe mahino mei he tokanga mo e pōtoʻi ngāue ʻi he palani naʻe fokotuʻutuʻu ʻe he ongo kaihaʻá, naʻá na taukei ʻi heʻena pisinisi taʻefaitotonu ko ʻení.
Naʻá na ʻāmio ʻo na toi ʻi he loto falé pea naʻe lokaʻi kinaua ʻi loto he taimi naʻe tāpuni ai ʻa e ngaahi matapā mamafa mo malú ʻi he poʻulí. Naʻá na ʻosi ʻilo ko e fuʻu loki ukamea mo piliki malu ko ʻení ko e lelei taha ia ʻo e langá pea ko ha faʻahinga loki ia naʻe fakapapauʻi he ʻikai lava ai ha kaihaʻa; naʻá na toe ʻilo foki naʻe ʻi loto ai ha koloa mahuʻinga lahi; pea naʻá na falala ʻe lava ʻeni ʻi heʻena kātakí, vilitakí, mo hona potó, ʻa ia naʻe fakalakalaka tupu mei haʻana ngaahi kaihaʻa seifi lahi, kae iiki pē, naʻe fai ki muʻa. Naʻe kakato ʻena ngaahi meʻangāué, ʻo kau ai ha vili, kili, mo ha ngaahi meʻangāue kehe, naʻe ngaohi ke ne avangi ha ukamea sitila fefeka pē ʻi ha matapā matolu, he ko ia pē founga ʻe lava ai ha hū ki he loki malú. Naʻe tuʻu ha kau leʻo naʻe ʻosi fakamahafu ʻi he loto holo ʻo e falé, pea naʻe leʻohi fefeka ʻaupito ʻa e fehūʻaki ki he loki malú ni.
Naʻe ngāue mālohi e ongo kaihaʻá he māʻuloloa ʻo e poó, ʻi he vili mo kili takai he foʻi loká, ʻa ia ko hono nāunau ʻi lotó he ʻikai ke lava ia ʻo fulihi ʻe ha taha ʻo aʻu ki he tokotaha naʻe maheni mo hono fiká, kae ʻoua kuo aʻu ki he taimi naʻe ʻosi seti ki aí. Naʻá na fakafuofua kapau te na ngāue taʻetuku he lolotonga ʻo e poó te na maʻu ha taimi ke fakaava ʻa e seifí ʻo toʻo ʻa e faʻahinga meʻa mahuʻinga te na lava ʻo ʻavé; pea naʻá na falala te na lava ʻi heʻena monūʻiá, loto lahí, pe mālohí ke hola. He ʻikai te na teitei momou ke fai ha tāmate kapau ʻe fakafepakiʻi kinaua. Neongo naʻe lahi ange e faingataʻa ʻo e ngāue naʻá na faí ʻi he meʻa naʻá na ʻamanaki ki aí, ka naʻe lavaʻi ʻe he ongo faihia taukeí ni ʻaki ʻena ngaahi meʻangāué mo ʻena ʻoné, ʻo aʻu ki he lotoʻi loká; peá na tohoʻi leva ʻa e polotá ʻo tekeʻi ʻa e fuʻu matapā matolú ʻo ava.
Ko e hā naʻá na sio ki ai ʻi lotó? ʻOku mou pehē ko ha ngaahi toloa kuo fakafonu ʻaki e maka koloá, ngaahi laulau taiamoni, lupi, mo e ngaahi mataʻitofe? Ko e ngaahi meʻa ia naʻá na ʻamanaki moʻoni te na maʻu mo ʻavé; ka naʻá na toe fehangahangai kinaua mo ha seifi ʻe taha ʻi loto, mo ha matapā naʻe matolu mo fefeka ange ʻi he ʻuluakí, kuo ʻosi tau ki ai ha loka naʻe fefeka ange hono ngaohí ʻi he ʻuluaki loka naʻá na ngāue ʻosiʻosi ivi aí. Naʻe fuʻu lelei ange ʻa e ukamea ʻo e matapā hono uá ia ʻo maumau ai ʻena ngaahi meʻangāue ne ngaohi leleí; pea neongo ʻena feingá ka naʻe ʻikai ke na teitei lava ʻo kohiʻi. Naʻe mole-noa hona iví; fehālaaki mo ʻena ngaahi palani māú.
ʻOku fakatatau ʻa e ongoongo pe ngeia ʻo ha taha, ki he matapā ki tuʻa ʻo e loki tukuʻanga koloá; pea ko hono ʻulungāngá ʻa e hūʻanga hono uá. ʻOku hoko ʻa e hingoa ongoongo leleí ko ha maluʻi lelei, pea neongo ʻe ʻohofi mo uesia pe maumauʻi, ka ko e laumālie ʻokú ne maluʻí ʻoku malu pē kapau he ʻikai malava ke ikunaʻi ʻa e ʻulungāanga ʻi lotó.
Tā fakatātaaʻi ʻe Daniel Lewis