Pōpoaki ʻa e Kau Palesitenisī ʻUluakí
Fekauʻaki mo e Mateuteu Fakalaumālié
Faleʻi mei Hotau Palōfitá
Ko ha Fakavaʻe ʻo e Tuí
“Kapau he ʻikai ke ʻi ai ha fakavaʻe loloto ʻo e tuí mo ha fakamoʻoni mālohi ki he moʻoní, ʻe faingataʻa ke tau matuʻuaki e ngaahi matangi mālohi mo e havili ʻaisi ʻa e filí ʻa ia kuo pau ke hoko mai kiate kitautolu taki taha.
“Ko e moʻui fakamatelié, ko ha taimi ia ʻo e siviʻi, ko ha taimi ke tau fakamoʻoniʻi ai ʻetau taau ke toe foki ki he ʻao ʻo ʻetau Tamai Hēvaní. Kuo pau ke tau fehangahangai mo e ngaahi faingataʻá mo e ʻahiʻahí kae lava ʻo siviʻi kitautolu. ʻE lava ʻe he ngaahi meʻá ni ʻo maumauʻi ʻetau moʻuí, pea motuhia mo hōloa ʻa e fakafōtunga kituʻa hotau laumālié—ʻo kapau ʻoku ʻikai loloto hono fakatoka ʻiate kitautolu ʻa e fakavaʻe ʻo e tuí mo ʻetau fakamoʻoni ki he moʻoní.”1
Ngaahi Meʻa Mahuʻinga ʻOku Ako mei he Kuo Hilí
“ʻE tataki kitautolu ʻe ha ngaahi fehuʻi lahi ʻi heʻetau fekumi ke ʻiloʻi ʻa e ngaahi ʻulungāanga lelei taha ʻoku tau maʻú: ʻOku ou aʻusia nai e tuʻunga ʻoku ou fakaʻamu ki aí? ʻOku ou ofi ange nai ki he Fakamoʻuí he ʻahó ni ʻi he ʻaneafí? Te u toe ofi ange nai ʻi he ʻapongipongí? ʻOku ou maʻu nai ha loto toʻa ke u liliu ʻo toe lelei ange? …
“Kuo hoko mai e ngaahi taʻú pea nau puli atu, ka ʻoku kei mahuʻinga ʻaupito ʻa e fie maʻu ko ia ke ʻi ai ha fakamoʻoni ki he ongoongoleleí. ʻI heʻetau laka atu ki he kahaʻú, kuo pau ke ʻoua naʻa tau siʻaki e ngaahi lēsoni ʻo e kuo hilí.”2
Ko Hoʻo Liahona Fakatāutahá
“[Ko ho tāpuaki fakapēteliaké ʻoku ʻaʻau tokotaha pē ia. ʻE lava pē ke nounou pe lōloa, mahinongofua pe ʻuhinga loloto. ʻOku ʻikai ko e lōloá mo hono fakaleá ʻokú ne ʻai ke hoko ko ha tāpuaki fakapēteliaké. Ko e Laumālié ʻokú ne ʻomi hono ʻuhinga totonú. ʻOku ʻikai ʻai ho tāpuakí ke pelupelu fakalelei pē ʻo tuku. ʻOku ʻikai totonu ke fakaʻesia pe pulusi. Ka, ʻoku ʻaí ke lau. ʻOku totonu ke ke saiʻia ai. ʻOku totonu ke ke muimui ki ai. ʻE tokoniʻi koe ho tāpuaki fakapēteliaké ʻi he taimi ʻokú ke puputuʻu aí. Te ne tataki koe ʻi he ngaahi faingataʻa ʻo e moʻuí… ʻOku hoko ʻa ho tāpuaki fakapēteliaké ko haʻo Liahona fakatāutaha ke ne hoko ko haʻo siate folau mo ne fakahinohino ho halá]. …
“ʻE ala fie maʻu ʻa e faʻa-kātakí ʻi heʻetau vakavakai, tatali, pea mo ngāueʻi ha tāpuaki ne talaʻofa ʻe fakahoko.”3
Haʻu kiate Ia
“Manatu ʻoku ʻikai ke ke fononga toko taha pē. … ʻI hoʻo fononga ʻi he moʻuí, fononga maʻu pē ki he māmá, pea ʻe tō leva ʻa e ngaahi ʻata fakapoʻuli ʻo e moʻuí ki ho tuʻá. …
“[ʻI heʻeku fekumi ʻi he folofolá ki ha tataki fakalaumālié, ʻoku eʻa maʻu pē ha foʻi lea ʻe taha ʻi he taimi kotoa pē. Ko e foʻi leá [ko e] ʻhaʻu.’ Naʻe folofola ʻa e ʻEikí, ʻHaʻu kiate au.’ Naʻá Ne folofola, ʻHaʻu ʻo ako ʻiate au.’ Naʻá Ne toe folofola foki, ʻHaʻu, ʻo muimui ʻiate au.’ ʻOku ou saiʻia ʻi he foʻi lea ko iá, haʻu. Ko ʻeku kolé ke tau haʻu ki he ʻEikí.]”4
Ko e Hala ki ʻEmeasí, tā ʻe Jon McNaughton
Faitaaʻi ʻe Craig Dimond; tā fakatātaaʻi ʻe Steve Kropp