Ko Hono Tauhi ʻo ha Lekooti
ʻOku ngāue fakalongolongo pē ʻa e kau ngāue ʻo e Potungāue Hisitōlia ʻo e Siasí ke tauhi ʻa e hisitōlia ʻo e Siasí—pea pehē ki ho hisitōliá.
ʻOku vakaiʻi fakaʻauliliki ʻe he kau ʻaʻahi ki he Laipeli Hisitōlia ʻo e Siasí ʻa e ngaahi tohinoa, nusipepa mo e ngaahi hisitōlia fakafāmilí ʻo ofi ki he loki talitaliʻanga kakai ʻa e Laipeli Hisitōlia ʻo e Siasí, ʻa ia ʻoku tohi mataʻitohi lalahi ʻi he holisí ʻa e kupuʻi leá ni, “Vakai, ʻe tauhi ha lekooti ʻiate kimoutolu” (T&F 21:1).
Talu mei he taimi naʻe maʻu ai ʻe he Palōfita ko Siosefa Sāmitá ʻa e tuʻutuʻuni fakalangi ko ʻení ʻi he 1830 ʻo aʻu mai ki he lolotongá ni, kuo tauhi mo fakatolonga ʻe he Siasí ha lekooti lahi ʻi he ngaahi tohi fakahisitōlia, ngaahi tupenu mo ha ngaahi meʻa kehe ʻo tuʻunga ʻi ha kiʻi kau tauhi lekooti tokosiʻi kae ngāue māteaki.
Tauhi e Lekooti ʻo e Siasí
Ko e meʻa mahuʻinga taha ki he kau tauhi lekooti ʻo e Siasí ko hono fakatolonga ʻo e ngaahi lekōtí—ʻi hono taʻofi ʻa e anga fakaenatula ʻo e fakaʻau ke motuʻa mo taʻeʻaonga ʻa e ngaahi lekōtí.
ʻI he fungavaka fā ʻo e Laipeli Hisitōlia ʻo e Siasí, ʻi ha loki fakasaienisi ʻoku kakato ai ʻa e ngaahi meʻangāue fakaonopooni ki he tauhi lekōtí, ʻoku fakahoko ai ʻe he kau tauhi lekōtí ʻa e ngaahi ngāue hangē ko hono monomono ʻo e ngaahi peesi kuo motuʻa ʻaupito mo mahaehaé ʻaki ʻa e pepa aata ʻa e kau Siapaní mo hono fakahaofi ʻa e ngaahi filimi faitā kuo meimei maumaú. ʻOku tuku leva ʻa e ngāue kuo fakaleleiʻí pe fakatolongá ʻi ha tauhiʻanga tohi ke faingofua hono kumí pe tauhi atu ki he ngaahi tauhiʻanga malu ʻoku puleʻi ʻa e māfana mo e mokomoko ʻo e ʻeá ʻe ha meʻangāue fakaonopooni.
ʻI ha poloka ʻe ua mei ai ʻi he Musiume Hisitōlia ʻo e Siasí, ʻoku tuitui ʻe ha ngaahi nima poto ʻa e ngaahi tamapua, fakangingila ʻa e ukameá mo e papá, tuitui ʻa e ngaahi monomonó, mo faʻu ʻa e ngaahi tuʻuʻanga mo e poupou maʻá e ngaahi fakaʻaliʻalí. Ko e lahi ʻo ʻenau ngāué ʻoku fakaʻaliʻali ia ʻi he musiumé pe ʻave ki he ngaahi feituʻu fakahisitōlia ʻa e Siasí, kae teuteuʻi e niʻihi ʻo kinautolu ke tauhi ki ha feituʻu malu.
Naʻe pehē ʻa e tokotaha tauhi lekooti ʻo e Siasí ko Kulisitofā Makafī, “ʻOku ʻuhinga ʻa e tauhí ‘ke fakatolonga.’ ʻOku ʻikai ʻuhinga ke tohi pē ha hisitōliá kae fakapapauʻi ʻoku tolonga.”
ʻOku maʻu ʻe he kau tauhi lekooti ʻo e Siasí ha fakakaukau tatau ʻa ia ʻoku ʻi ai ʻa e mahuʻinga taʻe-hano-tatau ʻo e meʻa kotoa pē, mei he ngaahi tohinoa ʻa e kau palōfitá ki honau ngaahi hisitōlia fakafāmili fakatāutahá.
Naʻe pehē ʻe Misa Makafī, “Ko ha faʻahinga ongo kapau naʻe tokanga ha taha ke tauhi ia, ʻoku totonu leva ke u tokangaʻi ia. ʻOku mau hoko ko e kau tauhi ʻo e ngaahi ngāue kuo tānakí.”
Naʻá ne pehē ʻoku vave pē ke ngalo ʻa e moʻui ʻoku ʻikai tohí pea ʻoku pehē pē ʻa e mole pe maumau ko ia ʻa ha taha ʻo e ngaahi tohi ko iá.
Naʻe pehē ʻe Senifā Hetilī, ko e tokotaha tauhi lekooti ʻi he Musiume Hisitōlia ʻo e Siasí, “ʻOku tuʻutuʻuni fakafolofola ke tau tauhi ha hisitōlia. ʻOkú ne tokoniʻi kitautolu ke tau manatuʻi ʻa e meʻa kuo fai ʻe he ʻEikí maʻa Hono kakaí.”
Ko Hono Tauhi ʻo e Ngaahi Tohí
ʻOku ngāue ʻa e loki fakasaienisi ki hono tauhi ʻo e ngaahi lekooti mo e ngaahi tohi kehekehe, ʻo kau ai ʻa e ngaahi tohi, tohinoa, nusipepa, tohi tānaki meʻa kehekehe mo e ʻū laʻi tā. ʻOku fai e ngāue ki he lekooti takitaha, ʻo fakatatau mo e tūkunga ʻokú ne ʻi aí.
ʻOku ʻi ai ha ngaahi meʻangāue mo e mīsini, ʻa ia ko e niʻihi pē ʻeni—ko ha meʻa tutuʻu, sitapa koula ke paaki ʻaki ʻa e mataʻitohi mo e mataʻifiká, mīsini ke ne fakatahaʻi ha ngaahi laʻi pepa ke faʻu ha tohi ʻo ʻikai ai ha fie maʻu ke uesia ʻa e pepá, mo e mīsini ʻalatāsōnika (ultrasonic) ke ne silaʻi ʻa e ngaahi laʻi milemila ʻokú ne pukepuke ʻa e ngaahi lekōtí—ʻoku nau tuʻu takatakai ʻi he loki fakasaienisí, ke ngāue ʻaki ʻo fakatatau mo e fie maʻu takitaha.
ʻOku faʻa toʻo ʻa e takafi ʻo ha tohi pea fufulu mo monomono hono tuʻá (spine). ʻOku fakafonufonu ʻa e ngaahi mahaehae ʻi he ngaahi tohí ʻaki ʻa e pepa makehe faka-Siapani, ʻa ia ʻokú ne fakamālohia ʻa e pepá kae kei tauhi pē ʻene malava ke mapelú. ʻOku fakaʻaongaʻi ʻe he kau tauhi lekōtí ʻa e mahoaʻa uité mo e vaí ke fakapipiki ʻaki ʻa e tohí. ʻOku fakamālohia ʻa e tuʻunga lolotonga ʻo e tohí, ʻo lava ke hā lelei mai ʻa e tuʻunga naʻá ne tomuʻa ʻi aí.
Naʻe pehē ʻe Misa Makafī, “ʻOku ʻikai ke mau feinga ke hā haohaoa mo foʻou. ʻOku mau feinga ke tauhi leleiʻi ia. Ko e meʻa kotoa pē ʻoku mau faí ʻe malava ke toe fakafoki ki he tuʻunga ne ʻi aí.”
Ko ha toe founga ʻe taha ʻoku ngāue ʻaki ki hono tauhi ʻo e ngaahi tohí ko hono fufulú. ʻOku fakavai ʻa e pepá ʻi he vai kuo sivi, pea toki fufulu ʻi he vai ʻoku siʻisiʻi ai ʻa e ʻēsití (alkalized). ʻI hono fufulu taki taha, ʻoku hanga ai ʻe he vaí mo e ngaahi kemikalé ʻo toʻo ʻa e ʻulí mo fakavaivaiʻi ʻa e ʻēsití ke fakatuai ʻa e popo ʻa e pepá.
Ko Hono Tauhi ʻo e Ngaahi Tupenú mo e Ngaahi Meʻa Kehé
ʻOku toe fakafatongiaʻaki ʻa e kau tauhi lekōtí ʻa hono tauhi ʻo e ngaahi meʻa ʻoku fekauʻaki mo e hisitōlia ʻo e Siasí—ʻa e ngaahi tupenu, nāunau fale, ngaahi tā valivali mo e hā fuá.
Naʻe pehē ʻe Sisitā Hetilī, “Ko e meʻa kotoa pē ʻoku ʻi ai hano talanoa, ko ha hisitōlia. Ko e meʻa kotoa pē ʻoku mau maʻú ʻoku fehokotaki ia mo e Kāingalotu ʻi he Siasí ʻi māmani kotoa.”
ʻOku fonu ʻa e musiumé ʻi he ngaahi meʻa fakahisitōlia ʻo hangē ko e vala, tohi, tā valivali, sīpinga (fanga kiʻi tatau ʻo ha ngaahi meʻa lalahi) mo e ngaahi meʻa kehe—nofoʻa hoosi, meʻangāue pea aʻu pē ki ha sīpinga ʻo e loto Tāpanekale Sōlekí. Kuo pau ke mohu fakakaukau ʻa e kau tauhi lekooti ʻoku nau ngāue mo e ngaahi meʻa peheé ʻi heʻenau fehangahangai mo e meʻa foʻou taki taha, he ʻokú ne ʻomi ha pole foʻou.
Naʻe pehē ʻe Sisitā Hetilī, “Ko e meʻa taki taha ʻoku fakafoʻituitui ʻo hangē pē ko e tokotaha kotoa. ʻOku taki taha ʻi ai ʻene fie maʻu pau mo ha tali pau.”
ʻOku vakaiʻi fakalelei ʻa e meʻa kotoa pē. ʻOku faʻa ngāue fakataha ʻa e kau tauhi lekōtí ʻi hono fakapapauʻi e meʻa ke fai ki hono fakatolonga ʻo ha meʻá. ʻOku fufulu mo fakatolonga ʻa e ngaahi meʻa lahi. Ko e hā pē ʻa e ngāue te ne lava ke taʻofi e founga ʻene maumaú ko e meʻa ia ʻe faí. ʻI he taimi ʻe niʻihi ʻoku kau heni ʻa hono toʻo ʻa e ʻēsití, fakamālohia hono tuʻunga moʻoní, vali ia ʻaki ha meʻa ke malu mei hono ʻātakaí, faʻu ha tukuʻanga ke faʻo ai pe ko ha poupou pe tuʻuʻanga te ne puke hake ia. Ko e taimi ʻe niʻihi ʻoku faʻa fie maʻu pē ke tafitafiʻi ʻa e efú mei ha meʻa.
Naʻe kamata ke movete ha tatā faka-paionia, ko ia ai naʻe tuitui ki ai ha meʻa ke ne fakamālohia ia ke tauhi hono fōtungá. Naʻe toe tānaki atu ki ai ʻe Sisitā Hetilī ha konga silika tatau mo iá, ʻaki hono tuitui nimaʻi ʻa e fehokotakiʻangá.
ʻOku ngāue ʻa Sēmisi Leini, ʻa ia ʻoku ʻiloa ko e “tokotaha tauhi lekooti ʻo e ngaahi meʻa kehekehé,” ki ha faʻahinga meʻa ʻoku ʻikai kau ʻi he ngaahi tohí, tupenú pe tā valivalí. Naʻe mahae ʻa e kau ʻo ha uipi leta, ʻa ia naʻe fonu ʻi he pulu (lead) ʻo ʻikai toe lava ai ʻo mapelu pea fakatuʻutāmaki ki he moʻuí ʻa e mama ki tuʻa ʻa e pulú. Naʻe toʻo ʻe he kau tauhi lekōtí ʻa e ngaahi ukamea naʻe toé pea ʻai ki ai ha kau ke kei maʻu ʻa e fōtungá mo lava ʻo mapelu.
Naʻe pehē, ʻe Sisitā Hetilī, “ʻOku fekauʻaki ʻeni mo hono tauhi ʻa e meʻa fakahisitōliá ʻo hangē pē ko ia naʻe ʻi ai he taimi ko ia ʻo e hisitōliá. Kiate aú, ʻoku fakahoko ʻe he fakatolongá ha fehokotakiʻanga moʻoni mo e kuohilí.”
Ko e toʻo ʻe Kulisitofā Makafī ʻa e tepi mei ha tohi totonu ʻo e senituli hono 19.
Faitaaʻi ʻe Welden Andersen
Ko e tutuʻu ʻe Kefi Kātoni ʻa e pepa ʻi he loki fakasaienisi ʻa e kau tauhi lekōtí.
Faitaaʻi ʻe Welden Anderson