Kuó u Kaihaʻa Nai mei he ʻOtuá?
Hilito Losilo Folōlesi, Piula, Pelū
Hili ha ngaahi uike siʻi mei hono papitaiso au ʻi hoku taʻu 30, ne kole mai ʻa e palesiteni ʻo homau kiʻi kolo ʻi Piula ʻi Peluú ke ne ʻinitaviu au ke fakapapauʻi ʻeku tuʻunga moʻui taau ke maʻu ʻa e Lakanga Taulaʻeiki Faka-ʻĒloné. Hili ʻeku tangutu ki laló, ne fakahoko leva ʻe Palesiteni Siaosi Kāsina ha lotu. Peá ne fehuʻi mai leva, “ ʻOkú ke tui ki he ʻOtuá?”
Ne u tali ange, “ ʻIo.”
ʻOkú ke tauhi ʻa e Lea ʻo e Potó?
Naʻá ku toe tali ange, “ ʻIo.”
“ ʻOkú ke angamaʻa?”
“ ʻIo.”
Naʻá ku fakahoko fiefia ʻeku ngaahi talí ʻo aʻu mai ki he taimi ko ʻení, pea hoko mai leva ʻa e fehuʻi hokó: “ʻOkú ke totongi vahehongofulu kakato?”
Naʻe ʻikai haʻaku tali. Naʻá ku lava ʻo sioloto ki he fakatātā naʻe fakaʻaliʻali mai ʻe he ongo faifekaú ʻi he taimi naʻá na akoʻi ai ʻa e lēsoni kau ki he vahehongofulú. Naʻá na pehē ko e vahehongofulu ʻe taha ʻo ʻetau paʻanga hū maí ʻoku ʻa e ʻEikí ia. Peá u toe fanongo ki ha fehuʻi ʻe taha: “ ʻIkai naʻe akoʻi atu ʻe he ongo faifekaú ʻa e fono ʻo e vahehongofulú kiate koe?”
Naʻá ku tali ange, “Naʻá na ʻosi akoʻi au, ka ʻoku ʻikai pē ke u totongi ia ʻe au.”
Naʻe pehē mai leva ʻa Palesiteni Kāsia ʻi he hili ha kiʻi taimi nounou, “Kātaki, ka kuo pau ke ke totongi hoʻo vahehongofulú kae lava ke ke maʻu ʻa e lakanga fakataulaʻeikí. Kamata leva he taimí ni, ʻo totongi ki he ʻEikí hoʻo vahehongofulú.”
Naʻá ku mavahe mei hono ʻōfisí ʻi ha loto faʻa fakakaukau lahi. Hili ʻeku toe fakamanatu ʻa e fono ʻo e vahehongofulú he ʻaho ko iá, ne u hū leva ki hoku lokí, tūʻulutui he falikí, ʻo kamata ke u lotu. “Tamai Hēvani, kapau kuó u kaihaʻa mei he ʻAfioná ʻi he ʻikai totongi ʻeku vahehongofulú, ʻoku ou kole ki he ʻAfioná ke ke fakamolemoleʻi muʻa au. ʻOku ou palōmesi he ʻikai ke u toe taʻetotongi ia.”
ʻI he lotú he Sāpate hono hokó, ne u kole ai ki he palesiteni fakakoló ke ma toe ʻinitaviu. Naʻá ku fakahā ange kuó u ongoʻi kuo fakamolemoleʻi au ʻe he ʻEikí pea kuó ne tali ʻeku tukupā ke totongi e vahehongofulú, pea naʻá ku kamata ʻi he Sāpate pē ko iá. Naʻá ku fehuʻi ange, “Kuó u taau nai ke maʻu ʻa e lakanga fakataulaʻeikí?”
Naʻá ne tali, “ ʻIo. Te u foaki kiate koe he ʻahó ni ʻa e Lakanga Taulaʻeiki Faka-ʻĒloné mo fakanofo koe ki he tuʻunga ʻo e tīkoní.”
Kuó u maʻu he ʻahó ni ha fakamoʻoni mālohi ki he vahehongofulú kaeʻumaʻā ʻa e ngaahi tāpuaki mahutafea ko ia ʻoku maʻu ʻi hono totongi iá. ʻI he ngaahi ʻinitaviu lahi talu mei he Sāpate ʻi he taʻu ʻe 35 kuohilí, ko e taimi pē ʻoku ʻeke mai ai ʻe he kau takí pe ʻoku ou totongi kakato ʻeku vahehongofulú, kuó u fiefia ke tali ʻio!