Ia riro ei mea itoito roa
E amuihia [te] mau arata‘iraa no roto mai i te buka a Iosua no te horo‘a mai i te puna mana no te itoito e te puai oia ho‘i : te faaroo i roto i to tatou Metua i te Ao ra e i Ta’na Tamaiti, o Iesu Mesia.
E rave rahi taime, a a‘o ai te mau hui mana faatere i te mau taea‘e no te autahu‘araa i te amuiraa rahi, e haamata ratou ma te parau e e aura e te a‘o ra ratou i te hoê « nuu puai » o te mau feia faatere o te autahu‘araa puai. I teie pô, e au ra e te ti‘a nei au i mua i te hoê « nuu puai » o te mau tamahine ma‘itihia a te Atua. Ua ma‘itihia outou no te nuu i mua, ia ti‘a i te pae o te feia itoito e mau nei i te autahu‘araa, i roto i te parau-ti‘a i teie mau mahana hopea nei. Ua riro outou ei hoê hi‘oraa teitei e te haviti.
Te hinaaro nei au e haamata i teie pô na roto i te hi‘o-poto-noa-raa i te aamu o ta tatou parau tumu, Iosua 1:9 : «E faaetaeta, e ia itoito roa ; eiaha e mata‘u, eiaha ho‘i e amiami ; tei pihai atoa iho ho‘i to Atua o Iehova ia oe i to mau haerea atoa ra ».
E peropheta puai o Mose o tei arata‘i i te mau tamarii a Iseraela i rapae i te fenua ra o Aiphiti, i reira to ratou faatîtî-raa-hia e i te haavi-raa-hia ia haamori i te mau atua hape (a hi‘o Levitiko 18: 1-3). I muri mai e 40 matahiti tamataraa i roto i te medebara, tei pihai iho roa ratou i to ratou utuafare apî, i reira ratou e ti‘amâ ai ia haamori i te Atua mau ra e te ora. I te poheraa o Mose, ua piihia Iosua e te Atua ia riro ei peropheta o te nehenehe e faaoti i teie tere semeio.
E taata faatere faauruhia o Iosua. Ua pii te Didionare o te Bibilia ia’na « te huru teitei o te aito itoito roa » e te faaite ra te auraa o to’na i‘oa « o te Atua te tauturu » (Bible Dictionary, « Iosua »). E mea hinaaro-roa-hia ta’na faatereraa faauru no te mea te toe ra e rave rahi anavai pape no te haere na roto e te mau tama‘i ia rê hou te mau mea atoa o ta te Fatu i fafau i te mau tamarii a Iseraela e tupu e e farii.
Ua ite maitai te Fatu i te peropheta Iosua e e hinaaro mau to te mau tamarii a Iseraela i te itoito rahi i taua taime ra. I roto i te pene matamua o te buka a Iosua, ua parau pinepine te Fatu ia Iosua e « e faaetaeta, e ia vai itoito roa ». Te ta‘o « itoito » ia tatarahia e « mana‘o e aore râ, e morare itoito no te faaoroma‘i e no te pato‘i i te ati, te mata‘u e aore râ, te fifi » (Merriam-Webster’s Collegiate Dictionary, 11th ed. [2003], « courage »; haapapûraa i apitihia’tu). Na roto i to ratou itoito e te haapa‘o, ua nehenehe Iosua e te mau tamarii a Iseraela e tomo i roto i te fenua i parauhia ra e ia farii i te oaoa na roto i te mau haamaitairaa a te Fatu.
Ua ora na Iosua e te mau tamarii a Iseraela e mea maoro a‘e nei. Area râ, i to tatou nei tau, o tatou atoa te tamata nei ia tomo i te « fenua i parauhia ra ». Ta tatou fâ rahi a‘e o te titauraa ïa i te ora mure ore i pihai iho i to tatou Metua i te Ao ra. I roto i te pene matamua o te buka a Iosua, e ite tatou e maha arata‘iraa papû o te tauturu ia tatou ia upooti‘a i to tatou mau fifi, ia faaoti i to tatou tere e ia oaoa i te mau haamaitairaa a te Fatu i roto i to tatou « fenua i parauhia ra ».
A tahi, i roto i te irava 5, ua fafau te Fatu ia Iosua e, « e ore ho‘i au e tahemo atu ia oe, e ore ho‘i e faarue ia oe ». E nehenehe tatou e farii i te itoito e te puai i roto i teie fafauraa e e ore ho‘i te Fatu e tahemo ia tatou e eita ho‘i e faarue ia tatou ana‘e iho. Ua haapiihia tatou e ua ite te Metua i te Ao ra ia tatou e ua here i Ta’na mau tamarii tata‘itahi. Ei tamahine faufaa rahi Na’na, e roaa ia outou Ta’na haapapûraa e te arata‘iraa na roto i te mana o te pure. I roto i te Mau Parau Haapiiraa e te mau Parau Fafau, e tai‘o tatou « ia vai haehaa noa oe; e na te Fatu to oe Atua e arata‘i ia oe na to oe rima ra, e e horo’tu ia oe te pahonoraa i ta oe mau pure » (PH&PF 112:10).
Te ti‘aturi nei au i teie mau parau e te fafau nei ia outou e e faaroo e e pahono mai te Metua i te Ao i ta tatou mau pure. Area râ, e mea pinepine e titauhia te faaoroma‘i a « tia‘i [ai tatou] ia Iehova » (Isaia 40:31). A tia‘i ai tatou, e haamata tatou i te ti‘aturi e ua faaru‘ehia mai tatou, e aore râ, aita ta tatou mau pure i faaroohia mai, e aore râ, penei a‘e aita tatou i ti‘amâ no te farii i ta ratou pahonoraa. E ere te reira i te parau mau. E mea au na‘u te mau parau tamahanahana a te Arii Davida : « Tia‘i maite atu ra vau ia Iehova, e ua fariu maira oia ia‘u e ua faaroo i ta‘u pure » (Salamo 40:1).
Noa’tu eaha ta outou e faaruru i roto i to outou iho tere, te arata‘iraa matamua i itehia i roto ia Iosua e faahaamana‘oraa ia tatou ia pure, ia faaoroma‘i e ia haamana‘o i te fafauraa a te Atua : « E ore roa ho‘i au e tahemo atu ia oe, e ore ho‘i e faaru‘e ia oe » (Iosua 1:5).
Te piti o te arata‘iraa i roto i te irava 7, ia parau te Fatu ia Iosua e « Ia haapa‘o hua oe i te ture atoa… eiaha oe e fariu ê i te reira i te rima atau e te rima aui, ia manuïa ho‘i oe i to mau haerea atoa ». Te haapii nei te Fatu ia Iosua ia haapa‘o maitai i te mau faaueraa, e eiaha e fariu ê i te e‘a o te Fatu. Ua haapii mai te Peresideni Howard W. Hunter e : « Ua ite Iosua e horo‘a mai to’na haapa‘o maitai i te manuïa, e noa’tu e aita oia i ite ti‘a roa e mea nahea oia e manuïa ai, te ti‘aturi nei râ oia i te hopea… E mea papû te iteraa rau o te peropheta rahi [e itehia i roto i te mau papa‘iraa mo‘a] o tei papa‘ihia [e tei faahereherehia] no te tauturu ia ia tatou ia maramarama i te faufaa rahi no te ma‘itiraa i te e‘a o te haapa‘o maitai » (« Commitment to God », Ensign, Novema 1982, 57, 58).
Hoê ava‘e i mairi a‘e nei ua farerei au i te hoê pŭpŭ tamahine apî. Ui atu ra vau i te mau tamahine paari a‘e eaha te mau a‘o o ta ratou e horo‘a na te hoê Tepure apî no te tauturu ia’na ia faaea haapa‘o e ia vai viivii-ore noa i roto i te mau ti‘araa atoa o ta’na e farerei. Ua parau maira te hoê tamahine e, « Ia haere oe na roto i te mau aroa o ta oe fare haapiiraa, e nehenehe oe, na te poro-mata, e ite i te hoê mea o te haru i to oe ara-maite-raa, te hoê mea e ere i te mea tano. E no to oe ui maere e ua hinaaro i te hi‘o. Ta‘u a‘o ia outou o teie ïa : Eiaha e hi‘o. Te fafau nei au e tatarahapa outou mai te mea e hi‘o outou. A ti‘aturi mai, a hi‘o ti‘a noa i mua ».
A faaroo ai au i teie tamahine apî, ua ite au e te faaroo ra vau i te a‘o a te Fatu ia Iosua « eiaha oe e fariu ê i te rima atau e te rima aui » (Iosua 1:7), a faaohipa i teie ti‘araa i te mau mahana atoa i teie tau hopea nei. E te mau tamahine apî, a ape i te mau faahemaraa o te haaati nei ia outou ma te pee etaeta i te mau faaueraa. E hi‘o i mua i ta outou fâ mure ore. Te faahaamana‘o mai nei te piti o te arata‘iraa ia tatou na roto i te raveraa i te reira, e paruruhia outou e e « manuïa ho‘i oe i to mau haerea atoa » (Iosua 1:7).
I roto i te irava 8 e ite tatou te toru o ta tatou arata‘iraa. I ô nei te parau ra te Fatu no te hoê « buka ture » e ua faaue ia Iosua « ia haapa‘o maite oe i te reira i te rui e te ao, ia haapa‘o hua i tei papa‘i-atoa-hia i roto ra… ei reira oe e manuïa roa‘i ». Te haapii nei te Fatu ia Iosua, e ia tatou paato‘a, ia tai‘o i te mau papa‘iraa mo‘a. Te tai‘oraa i te papa‘iraa mo‘a i te mau mahana atoa, te tai‘oraa i te Buka Moromona ihoa ra, e faati‘a te reira i te hoê niu papû no te faatupuraa i to outou iteraa papû no Iesu Mesia e no Ta’na evanelia. E ani te reira i te Varua i roto i to outou oraraa. Ua a‘o mai te Peresideni Harold B. Lee e, « mai te mea aita tatou e tai‘o i te mau papa‘iraa mo‘a i te mau mahana atoa, e pararai to tatou iteraa papû, [e] aita to tatou pae varua e tupu hohonu atu » (Te Mau Haapiiraa a te Mau Peresideni o te Ekalesia : Harold B. Lee [2000], 66).
I roto i te mau api o te papa‘iraa mo‘a e rave rahi mau arata‘iraa, mau fafauraa, te mau faaotiraa o te mau faahaamana‘oraa o te tauturu ia tatou i roto i to tatou tere i te « fenua i parauhia ra ». E faatano te arata‘iraa toru ia tatou ia tai‘o e ia feruri hohonu i te mau papa‘iraa mo‘a i te mau mahana atoa ia ite tatou i te maitai roa e te manuïa.
I muri iho i to te Fatu otiraa i te paraparau ia Iosua, ua a‘o Iosua i te mau tamarii a Iseraela. I te hoperaa o ta’na a‘oraa, i roto i te irava 16, ua pahono mai te mau tamarii a Iseraela i ta’na mau parau e o tei horo‘a mai i te maha o ta tatou arata‘iraa. Ua pahono mai ra ratou, « o ta oe atoa i faaue mai ia matou ra, o ta matou ïa e haapa‘o, e te mau vahi atoa ta oe e tono ia matou ra, e haere ïa matou i reira ».
Ei melo no Te Ekalesia a Iesu Mesia i te Feia Mo‘a i te Mau Mahana Hopea Nei, e rave‘a ta tatou no te rave i teie fafauraa ia pee i to tatou peropheta, te Peresideni Thomas S. Monson, tei rotopu ia tatou i teie pô. Na roto i te pure e te haapapûraa a te Varua, e nehenehe tatou tata‘itahi e farii i to tatou iho iteraa papû no te peropheta ora. E tupu teie iteraa papû a faaroo ai, a haapa‘o ai e a rave itoito ai no te faaohipa i ta’na mau haapiiraa i roto i to tatou oraraa i te mau mahana atoa.
Te faarooraa e te haapa‘oraa i te a‘o a to tatou peropheta e faati‘a ia tatou ia farii i te mau haamaitairaa taa ê. A faaroo na i te tahi o te mau fafauraa na te peropheta o ta te Peresideni Monson i hohora mai ia tatou i roto i ta tatou amuiraa rahi i ma‘iri a‘e nei : « Ia haamaitai mai te Atua ia outou. Ia tae mai Ta’na fafau no te hau i ni‘a ia outou i teie nei e a muri noa’tu » (Mau Parau Opaniraa », Liahona, Novema 2009, 110). « Te tia‘i noa maira te mau fafauraa rahi ia tatou mai te mea e mea parau mau e te haapa‘o maitai tatou » (« A aratai i to oe mau mana‘o e to‘u taea‘e », Liahona, Novema 2009, 69). « Te ani nei au i te mau haamaitairaa o te ra‘i ia tae i ni‘a ia outou tata‘itahi » (Liahona, Novema 2009, 110).
I teie hepetoma i mua i roto i ta tatou amuiraa rahi, te ani manihini nei au ia outou ia faaroo i te mau haapiiraa e i te mau fafauraa e horo‘ahia mai e to tatou peropheta e te mau aposetolo. Ei reira, a faaohipa te arata‘iraa maha na roto i te fafauraa ia pee i te a‘o a te peropheta e te haapapûraa e « te taato‘araa o [ta’na] i faaue mai ia tatou ia rave, e [ta’na] e tono ia tatou, e haere tatou » (Iosua 1:16).
I teie taime, teie e maha arata‘iraa – te pure, te haapa‘oraa i te mau faaueraa a te Atua, te tai‘oraa i te papa‘iraa mo‘a i te mau mahaha atoa, e te fafauraa ia pee i te peropheta ora – e au ra ïa mai te mau mea iti ra e te ohie. Te hinaaro nei au e faahaamana‘o ia outou te hoê papa‘iraa mo‘a e itehia i roto i te Alama : « Inaha râ, e parau atu vau ia oe na, na roto i te mau mea iti e te papû ra e faatupuhia‘i te mau mea rarahi » (Alama 37:6). Ia faaohipahia te reira i roto i to tatou oraraa i te mau mahana atoa, na teie na arata‘iraa « iti e te ohie » e maha no roto mai i te buka a Iosua e amuihia ratou no te horo‘a mai i te puna mana no te itoito e te puai oia ho‘i : te faaroo i roto i to tatou Metua i te Ao ra e i Ta’na Tamaiti o Iesu Mesia.
Ua ite to tatou Metua i te Ao ra e ere to tatou tere tata‘itahi i te mea ohie. Te faaruru nei tatou i te mau mahana atoa i te mau ti‘araa o te titau i te itoito e te puai. Te hoê aamu no teie iho nei i roto i te Church News tei haapapû i teie parau mau :
« Ua haamata te hoê orometua no te fare haapiiraa tuarua i te mau ava‘e i mairi a‘e nei i ta’na haapiiraa na roto i te aniraa i te mau piahi o tei paturu i te hoê uiraa politita ia ti‘a i te hoê pae o te piha, te tahi o tei pato‘i ua faauehia ia ti‘a i te tahi pae.
« I muri a‘e i to te mau piahi haereraa i to ratou pae, ua ti‘a te orometua i te tahi pae. Ma te tohu i te hoê tamahine apî i te pae o te mau taata turu, ua haamata ihora te orometua i te aro ia’na e i te tahi mau hoa o te piha no to ratou mau mana‘o.
« Teie tamahine apî, e Roti [Eglantine] oia i roto i ta’na paroita, ua horomii i te faahapa o te faaino i to’na ti‘aturiraa.
« Ua [faaea] hau noa oia i te mau aroraa a te mau taata atoa i faatupuhia e te hoê taata mana » (« What Youth Need », Church News, Mati 6, 2010, 16).
Ua faaite teie tamahine apî i te hoê itoito maere i ni‘a i ta’na tahua aroraa, o tei riro i taua mahana ra o ta’na iho piha haapiiraa. I te vahi i reira outou e eaha ta outou e faaruru ra, te mana‘o nei au e faafaufaa outou i te mau arata‘iraa e itehia i roto i te buka a Iosua ia nehenehe ia outou e ti‘aturi i te fafauraa a te Fatu : « E faaetaeta, e ia itoito roa ; eiaha e mata‘u, eiaha ho‘i e amiami ; tei pihai atoa iho ho‘i to Atua o Iehova ia oe i to mau haerea atoa ra » (Iosua 1:9).
Te hinaaro nei au e vaiiho i to‘u iteraa papû ia outou e ua ite te Metua i te Ao ra e te here nei ia outou tata‘itahi. Mai te mea e fariû ti‘a outou Ia’na, eita Oia e faarue ia outou ! E haamaitai mai Oia ia outou i te puai e i te itoito o ta outou e hinaaro no te faaoti i to outou Ho‘iraa Ia’na ra. Te mauruuru nei au no te mau papa‘iraa mo‘a, e no te mau hi‘oraa maitai puai, mai to te peropheta Iosua. Te oaoa nei au no te Peresideni Monson, o tei aro nei no te arata‘i ia tatou ma te fifi ore i to tatou Metua i te Ao ra. Te pure nei au, mai te mau tamarii a Iseraela, ia tapae tatou i to tatou « fenua i parauhia ra » e ia farii i te toe‘a o te mau haamaitairaa a te Fatu. Te parau nei au i teie mau mea na roto i te i‘oa o Iesu Mesia, amene.