Elder Gerrit W. Gong

No te Hitu Ahuru

Ua ite o Elder Gerrit Walter Gong i te mana o te pure e e faanahoraa ta te Metua i te Ao ra no Ta’na mau tamarii. I te apîraa o Elder Gong, i te hoê taime ua pohehia to’na mama i te hoê ma‘i rahi. Te haamana‘o nei oia i to’na pureraa « i roto i te mau parau e te mau mana‘o o te hoê tamaiti iti » e, e ora oia.

« Ua rau te pahonoraa i te mau pure e i te mau taime rau i roto i to tatou oraraa, tera râ, i taua taime ra, ma te oaoa, ua ite au e, e maitai mai oia », te parau ïa a Elder Gong. « Aita vau i feaa noa a‘e i taua taime ra e, e faaroo mai te Metua i te Ao ra i ta tatou mau pure, e i roto i To’na paari e Ta’na iho faanahoraa, e pahono mai Oia ».

E mai taua taime maira ua ite tamau o Elder Gong i taua aparauraa maru ra i te hoê Metua, te parau ra oia, i roto anei i to’na faaipoiporaa i ta’na vahine, te aupururaa i te hoê utuafare, te raveraa i te mau faaotiraa no te haapiiraa e no te toro‘a, e te taviniraa i roto i te Ekalesia.

Hou a piihia ai oia i roto i te Pŭpŭ matamua o te Hitu Ahuru, ua tavini o Elder Gong ei melo apooraa teitei, ei tia‘i pŭpŭ tahu‘a rahi, ei tauturu i roto i te peresideniraa Haapiiraa Sabati no te tĭtĭ, ei orometua haapii séminaire, ei episekopo, ei peresideni misioni tĭtĭ, ei peresideni tĭtĭ, e ei Hitu Ahuru Area.

I roto i te parau no te toro‘a, ua tavini o Elder Gong ei tauturu taa ê no te faatere hau no te mau ohipa no te mau fenua ĕ ê, e ei tauturu taa ê no te ti‘a hau marite i Beijing, i te fenua Tinito. Ua mau atoa oia i te mau ti‘araa i roto i te Pu No te mau Tuatapaparaa Faufaa e na te Ao atoa nei i Washington, D.C., HAM. I te taime o to’na piiraa, te rave ra oia i te ohipa ei tauturu no te peresideni i te fare haapiiraa teitei Brigham Young University i roto i te hopoi‘a no te faanahoraa e no te hi‘opo‘araa.

Ua fanauhia o Elder Gong na Walter e o Jean Gong i te ava‘e titema 1953 e ua paari i Palo Alto, Californie. Ua roaa ta’na parau tuite Licence i Brigham Young University i roto i te haapiiraa no te pae Asia. I muri a‘e ua roaa ta’na parau tuite master e te hoê PHD i roto i te mau auraa na te ao nei i te Fare haapiiraa tuatoru no Oxford, i reira oia i farii ai i te moni pute Rhodes Scholar.

Ua tavini oia i roto i te misioni no Taiwan e i muri iho ua faaipoipo ia SHAMn Lindsay i roto i te Hiero no Roto Miti i te ava‘e tenuare 1980. E maha tamaroa ta te Gongs.