Elder Per G. Malm
No te Hitu Ahuru
16 matahiti to Elder Per Gösta Malm i tavini ai oia ei misionare rave ohipa no te tauturu i te paturaa i te mau fare pureraa apî i Purutia, Finland, Netherlands, e i Sweden. Ua itoito oia i te tautururaa i te paturaa i te Ekalesia .
Ua fanauhia o Elder Malm i te ava‘e setepa 1948 i Jönköping, Sweden, na Karl Gösta Ivar e o Karin Anna-Greta Malm. Ua haapii mai oia e rave rahi haapiiraa faufaa no te oraraa nei mai roto mai i to’na na metua, paturuhia e te iteraa papû ta to’na metua tane i faaite hou a pohe ai oia i te 48raa o te matahiti: « A haapa‘o tamau noa i te evanelia ».
« Ua haapii mai oia ia matou e, i roto i te evanelia e itehia ai ia tatou te mau rave‘a no te mau ohipa faufaa roa a‘e », te parau ïa a Elder Malm.
I muri a‘e i na 18 ava‘e o te misioni rave ohipa, ua rave o Elder Malm i te hoê misioni rave tamau i roto i te Misioni no Sweden Stockholm. I to’na ho‘iraa mai, ua faaipoipo oia ia Ingrid Agneta Karlsson i roto i te Hiero no Bern Switzerland i te ava‘e atopa 1969, ua rave oia i te ohipa hoo fare a to’na metua tane, e ua roaa te parau tuite master i te Fare haapiiraa tuatoru no Göteborg e te parau tuite no te ture (LLM) i roto i te Fare haapiiraa tuatoru no Lund.
Ua rave oia i te ohipa na te Ekalesia ei taata haapa‘o i te hooraa fenua. I muri a‘e, ei raatira no te mau ohipa pae tino, ua faaue te Episekoporaa Faatere ia’na ia haamata i te faanaho i te amuitahiraa o te mau ohipa pae tino i roto i te mau Area no Europa Ropu, Hitia o te râ, e te pae Apatoerau.
A faaamu ai o Elder e o te tuahine Malm i ta raua mau tamarii e va‘u, ua tavini oia ei peresideni misioni no te tĭtĭ, ei peresideni amaa, ei melo apooraa teitei, ei peresideni tĭtĭ, ei peresideni misioni, ei raatira no te haapurororaa parau no Sweden, e ei Hitu Ahuru Area.
Ua riro to’na mau iteraa rau ei haapapûraa i te mau haapiiraa a to’na na metua, o ta’na e ti‘aturi nei e faaite na roto i to’na piiraa i roto i te Pŭpŭ piti no te Hitu Ahuru. « Te evanelia to tatou tutau », te na reira ra oia. « Mai te mea e e haapa‘o tamau noa tatou, e faahotu mai te reira i te hoê hau eita e rae‘ahia i te haroaroaraa.