E parau i te opaniraa
Te faaama nei te fare mori a te Fatu i te mau tapa‘o ohie ia itehia e aita hoi te reira e mou.
Ua riro mau teie tuhaa pureraa opaniraa ei tuhaa nehenehe roa. E mea varavara roa to‘u faarooraa i te mau a‘oraa i haapiihia mai i roto i te tahi tau parau rii mai ta tatou i ite iho nei i teie mahana. Tei ô nei tatou paatoa no te mea ua here tatou i te Fatu. Te hinaaro nei tatou e tavini ia’na. Te haamana‘o mai nei to tatou Metua i te Ao ra ia tatou. Te faaite papû nei au i te reira. Te ite nei au i To’na rima i roto i te mau mea atoa.
Hoê irava iti poto noa:
« E ti‘aturi ia Iehova ma to aau atoa; eiaha râ e ti‘aturi i to oe ihora haapa‘o.
« Eiaha e haamo‘e ia’na i to oe atoa ra mau haerea, e na’na e faaite ia oe i to o era mau haerea ».1
Tera te aamu o to‘u oraraa.
E au mau taea‘e e au mau tuahine here, ua tae tatou i te hopea o te hoê amuiraa nehenehe roa e te î i te faaururaa. I muri a‘e i to tatou faarooraa i te a‘o e te mau iteraa papû o te feia tei paraparau mai ia tatou, te ti‘aturi nei au e, ua haamaitai-roa-hia tatou e ua rahi atu to tatou hinaaro papû ia ora i te mau parau tumu o te evanelia a Iesu Mesia. E mea au mau to tatou parahiraa i ô nei. Te faatae nei matou i to matou mauruuru i te taata tataihi tei paraparau mai ia tatou, e i te mau taata atoa tei horo‘a i te mau pure.
E mea nehenehe roa te mau himene. Haamana‘o atura vau i te irava i roto i Te Parau Haapiiraa e te mau Parau Fafau: « No te mea e e oaoa to to‘u nei varua i te himene o te aau oia ïa, ua riro te himene o te feia parau ti‘a ra ei pure ia‘u nei, e e pahonohia te reira na roto i te haamaitairaa i ni‘a iho i to ratou ra mau upoo ».2
A haamana‘o e, te mau parau poro‘i ta tatou i faaroo a’e nei i roto i teie amuiraa, e nene‘ihia te reira i roto i te ve‘a no me o te Ensign e o te Liahona. Te faaitoito nei au ia outou ia tai‘o i te mau parau poro‘i, ia feruri hohonu i ta ratou mau haapiiraa, e ia faaohipa i te reira i roto i to tatou oraraa.
Ua ite au e, te apiti atoa mai nei outou ia‘u no te faaite i te mauruuru i te mau taea‘e e te mau tuahine o tei haamauruuruhia i roto i teie amuiraa. Ua tavini maitai ratou e ua hopoi mai i ta ratou tautururaa rahi i te ohipa a te Fatu. Ua rave hope maitai ratou i ta ratou ohipa. Te haamauruuru nei matou ia ratou mai roto roa mai i te hohonuraa o to matou mafatu.
I teie nei, ua paturu atoa a‘e nei tatou, na roto i te afairaa i te rima i ni‘a, i te mau taea‘e e te mau tuahine tei piihia i roto i te mau ti‘araa apî i roto i teie amuiraa. Te hinaaro nei matou ia ite ratou e, te tia‘i nei matou i te taime e rave ai i te ohipa i piha‘i iho ia ratou i roto i te ohipa a te Fatu.
E au mau taea‘e e au mau tuahine, ia hi‘o ana‘e tatou i te ao e haati nei ia tatou, te ite nei tatou i te mau fifi rarahi no tatou nei. Mai te mea ra e, ua faaatea ê te ao nei ia’na i te vahi paruruhia e te hau.
Te farii noa, te viivii, te hoho‘a faufau, te haavare e ua rau ana‘e atu â te mau ino, ua riro ïa ei tumu i tura‘ira‘ihia ai te mau taata e rave rahi i tera pae e tera pae i ni‘a i te moana o te hara e i taorahia ai i ni‘a i te a’au taratara o te ereraa i te mau rave‘a, te mau haamaitairaa e te mau moemoea ite-ore-hia.
Ta‘u a‘o ia tatou paatoa maori râ, ia hi‘o tatou i ni‘a i te fare mori o te Fatu. Aita e rupehe me‘ume‘u, aita e po poiri ta‘ota‘o, aita e mata‘i u‘ana, aita e horo pahi mo‘e, e ore e faaorahia e to’na hihi maramarama. E anaana mai oia i ni‘a ia tatou i roto i te mau vero o te oraraa. E faatae mai fare mori o te Fatu i te mau tapa‘o ohie ia itehia e eita roa’tu e hape.
E mea au roa na‘u te mau parau e itehia i roto i te Salamo: « O Iehova tau papa, e tau pare, e tau ora, tau Atua, tau mato, tau e ti‘aturi nei… E tiaoro vau ia Iehova… e ora ïa vau i tau mau enemi ».3
Ua here te Fatu ia tatou, e au mau taea‘e e au mau tuahine, e e haamaitai Oia ia tatou ia ti‘aoro ana‘e tatou Ia’na.
Aue to tatou mauruuru no te evanelia a Iesu Mesia i faaho‘i-faahou-hia mai e no te mau maitai atoa ta’na i tuu mai i roto i to tatou oraraa. Ua ninii mai te Fatu i Ta’na mau haamaitairaa i ni‘a ia tatou paatoa. Te faaite nei au i to‘u iteraa papû ia outou e, e parau mau teie ohipa, te ora nei to tatou Faaora, e te arata‘i nei Oia i Ta’na Ekalesia i ni‘a i te fenua nei.
I teie taime, a tae ai tatou i te hopearaa o teie amuiraa, te horuhoru nei to‘u aau e te oto hoi. Te faaite atu nei au i to‘u here e to‘u mauruuru ia outou. Mauruuru no ta outou mau pure no‘u e no te mau Hui mana Faatere Rahi atoa o te Ekalesia. Te faaroo mai nei te Fatu i ta outou mau pure e te haamaitai mai nei Oia ia tatou e te arata‘i nei Oia ia tatou i roto i te mau ohipa o To’na basileia i ni‘a i te fenua nei. Te mauruuru roa nei tatou no te reira.
A faaru‘e mai ai tatou i teie amuiraa, te ti‘aoro nei au i te mau haamaitairaa o te ra‘i ia tae mai i ni‘a ia outou tata‘itahi. A ho‘i atu ai outou i to outou mau tiahapa ati a‘e te ao nei, te pure nei au i to tatou Metua i te Ao ra ia haamaitai mai Oia ia outou e i to outou mau utuafare. E ti‘a anei i te mau parau poro‘i e te varua o teie amuiraa ia itehia i roto i te mau mea atoa ta outou e rave – i roto i to outou mau tiahapa, i roto i ta outou ohipa, i roto i ta outou mau putuputuraa, e i roto i to outou mau haereraa e te ho‘iraa mai.
Ua here au ia outou. Te pure nei au no outou. Ia haamaitai mai te Atua ia outou. Ia vai mai To’na hau i fafauhia ra i ni‘a ia outou i teie nei e i te mau taime atoa, na roto i te i‘oa o Iesu Mesia ra, amene.