Ua Faaarahia te Faanahoraa Apî no te Hopoi‘a i te Atua

Mai te faaarahia i roto i te amuiraa rahi, ua hamanihia te hoê faanahoraa apî no te Hopoi‘a i te Atua i raro a‘e i te arata‘iraa a te mau peropheta ora no te tauturu i te feia apî tamaroa ia patu i te puai pae varua e no te faaoti i ta ratou mau ohipa autahu‘araa.

« Ua riro [te faanahoraa apî o te Hopoi‘a i te Atua] ei mauhaa puai », te parau ïa a te Peresideni Henry B. Eyring, Tauturu Matamua i roto i te Peresideniraa Matamua, i roto i te tuhaa pureraa po‘ipo‘i Mahana Maa. « E haapuai te reira i te iteraa papû o te feia apî tamaroa e i to ratou autaatiraa e te Atua. E tauturu te reira ia ratou ia haapii mai e ia hinaaro e rave i ta ratou mau ohipa autahu‘araa. E haapuai te reira i to ratou autaatiraa e to ratou mau metua, i rotopu i te mau melo o te pŭpŭ, e i to ratou mau ti‘a faatere ».

Ua faaohiehia te faanahoraa apî o te Hopoi‘a i te Atua e ua faatumuhia i ni‘a i te ohipa faufaa. Tei roto i te hoê noa iho buka te mau titauraa no na pŭpŭ matahiti e toru, e tae noa’tu i te mau arata‘iraa na te mau metua e te feia faatere. E ineine te faaohiparaa i teie mau buka e te mau materia i apitihia i te reira i roto e 27 reo i roto i te area no tiunu e atete 2010. E tamau noa te tahi atu mau iritiraa o te mau material i roto i te roaraa o te matahiti.

Ua faanahohia te mau ohiparaa no te tauturu i te feia apî tamaroa ia haapii mai i te hoê parau tumu o te evanelia e aore râ, te hoê ohipa o te aUtahau‘araa, ia faaohipa i te mau mea ta ratou i haapii mai, e i muri iho ia faaite i to ratou mau mana‘o e to ratou mau feruriraa i te mau metua, i te feia faatere o te Ekalesia, e aore râ, i ta ratou pŭpŭ.

« Ei diakono, haapii e tahu‘a, e rave outou i te mau ohipa o te tauturu ia outou ia patu i te puai pae varua e ia haapii mai e ia faaoti i ta outou mau ohipa aUtahau‘araa », te na reira ra o David L. Beck, peresideni rahi no te Feia Apî Tamaroa, i roto i te tuhaa pureraa autahu‘araa o te amuiraa rahi. « E arata‘i te faanahoraa apî o te Hopoi‘a i te Atua ia outou i roto i to outou tere no te faaoti i ta outou Hopoi‘a i te Atua e ia ite i te hanahana o te autahu‘araa a Aarona ».

Ua faataahia teie faanahoraa no te faaitoito i te feia apî tamaroa ia amo i te hopoi‘a o to ratou iho tupuraa i te rahi, tera râ, e horo‘a atoa mai te reira i te mau rave‘a no te haapuai i te mau auraa i rotopu i te feia apî tamaroa e to ratou mau metua, to ratou feia faatere e te mau melo no ta ratou pŭpŭ. E rave rahi mau ohipa e ti‘a ia faaô-ohie-hia i roto i te po utuafare e i te mau pureraa a te pŭpŭ e i roto i te mau ohiparaa.

« E ohipa faufaa roa ta te mau metua, te feia faatere e te mau melo o te pŭpŭ i roto i te faanahoraa no te Hopoi‘a i te Atua », te na reira ra te taea‘e Beck i ni‘a i te mau ve‘a a te Ekalesia. « Na te mau pureraa Sabati a te pŭpŭ e horo‘a i te mau rave‘a no te haapii mai, no te ohipa e no te faaite ».

Te faaitoitohia nei te feia apî tamaroa ia ohipa tamau noa i roto i te faanahoraa e vai ra i teie nei e tae roa’tu i te taime e faaohipahia ai te faanahoraa apî i roto i ta ratou paroita e aore râ, amaa. Ia haamata-ana‘e-hia te faaohipa i te faanahoraa apî, e titauhia i te feia apî tamaroa tata‘itahi ia haamata i te ohipa i ni‘a i te tuhaa tei tuati i to’na ti‘araa autahu‘araa i te reira taime. Mai te mea e, ua fatata oia i te faaoti i te mau titauraa no te parau faaite e aore râ, no te feti‘a i tuati i to’na toro‘a i roto i te faanahoraa tahito, e faaoti oia i te reira mau titauraa a haamata ai oia i te ohipa i ni‘a i te faanahoraa apî.

« Ua faanahonahohia te mau ohipa tata‘itahi i roto i te Faaotiraa i Ta‘u Hopoi‘a i te Atua ia ti‘a i te reira ia tauturu ia outou ia riro mai ei mau taea‘e no te autahu‘araa mai ta te Fatu e hinaaro nei », te na reira ra te taea‘e Beck.

E tuuhia’tu te tahi atu â mau haamaramaramaraa e te mau materia i ni‘a i te itenati i ni‘a ia DutyToGod.lds.org.