Rosemary M. Wixom

Peresideni rahi no te Paraimere

I roto i te hoê ao tei î roa i te maniania e te papû ore, e ti‘a i te mau tamarii ia ite e mea nahea ia faaroo i te muhumuhu a te Varua, te parau ïa a Rosemary Mix Wixom, tei paturu-apî-hia ei peresideni rahi no te Paraimere.

« E nehenehe te mau tamarii e ite i te parururaa i roto i te pure », ta’na ïa parau. « E ite ratou e, eita ratou e vai otahi noa, e haere te Faaora na pihai iho ia ratou, e ua here Oia ia ratou – noa’tu e, e rave ratou i te hape ».

Ua fanauhia oia i te ava‘e titema 1948 na Robert Wayne e o Mary Mix, ua paari te tuahine Wixom i Roto Miti, Utaha, HAM. A tupu ai oia i te paariraa, ua riro to’na tuahine maehaa ei hoa rahi roa no’na, e ua haapii to’na na metua ia’na ia horo‘a ma te aau oaoa. « Ia tomo ana‘e matou na te uputa fare, e ite au i te hoê parururaa », te parau ïa a te tuahine Wixom.

I te 12raa o to’na matahiti, ua paari faahou atu â to’na aau hau. A parahi noa ai oia i roto i te pureraa iritiraa mana‘o, ua ite a‘era oia i te hoê hinaaro puai ia faaite i to’na mau mana‘o no ni‘a i te Faaora. « Ua ti‘a a‘era vau i ni‘a, e ua tae maira to‘u here no Iesu », te parau ïa a te tuahine Wixom. Ua tauturu to’na metua vahine ia’na ia haroaroa e, na te Varua Maitai i horo‘a mai i tera mau mana‘o to’na.

« Aita vau i ite e, e mana rahi to te Varua Maitai e te parau mau hoi », te parau ïa a te tuahine wixom. E rave rahi matahiti i muri iho ua horo‘a te Varua Maitai ia’na i te hoê mana‘o rahi o te hau a pure ai oia no te hoê tamarii ta’na. Ta’na ti‘aturiraa i teie nei maori râ, ia ti‘a i te mau metua e te feia faatere e te mau orometua o te Paraimere ia tauturu i te mau tamarii ia haapii i te faaroo i te muhumuhu a te Varua Maitai.

Ua roaa ta te tuahine Wixom parau tuite Licence no te haapiiraa, i roto i te Fare haapiiraa tuatoru no Utaha State. Ua faaipoipohia oia e ta’na tane o Blaine Jackson Wixom, i roto i te hiero no Roto Miti i te 18 no atete 1970. E ono ta raua mau tamarii.

E melo te tuahine Wixom no te apooraa rahi o te Paraimere hou a tavini ai oia e ta’na tane a faatere ai oia i te Misioni no Washington D.C. South. I muri a‘e ua tavini te tuahine Wixom i roto i te apooraa rahi na te Feia Apî Tamahine, i reira oia i te taviniraa e tae roa’tu i te taime a piihia ai oia ei peresideni rahi no te Paraimere.