Te mau haapiiraa no to tatou anotau

Te mau haapiiraa na te Autahu‘araa a Melehizedeka e na te Sotaiete Tauturu no te maha o te sabati, e faatumuhia ïa te reira i ni‘a i « Te mau hapiiraa no to tatou anotau ». E nehenehe te mau haapiiraa tata‘itahi e faaineinehia i ni‘a i te hoê e aore ra, e rave rahi a‘oraa i horo‘ahia i roto i te amuiraa rahi i ma‘iri noa a‘e nei. Na te mau peresideni tĭtĭ e te mataeinaa e ma‘iti i te mau a‘oraa e faaohipa, e aore ra, e horo‘a ratou i te reira hopoi‘a i roto i te mau episekopo e te mau peresideni amaa. Tera râ, e ti‘a i te feia faatere ia haapapû i te faufaa no te mau taea‘e o te Autahu‘araa e te mau tuahine no te Sotaiete Tauturu ia hoê ratou paatoa i ni‘a i te mau a‘oraa e haapii i te hoê sabati.

Te titauhia nei i te mau taata e haere atu i roto i te mau haapiiraa no te maha o te sabati ia tai‘o maite e ia ta‘ita‘i mai i roto i te piha haapiiraa i te ve‘a no ni‘a i te amuiraa i ma‘iri iho nei.

Te mau mana‘o tauturu no te faaineine i te hoê haapiiraa i ni‘a i te mau a‘oraa

A pure ia ti‘a i te Varua Mo‘a ia vai mai i piha‘i iho ia outou a tuatapapa ai e a haapii ai outou i te (mau) a‘oraa. E riro paha outou i te faaineine i te haapiiraa ma te hinaaro e faaohipa i te tahi atu mau materia, tera râ, o te mau a‘oraa no te amuiraa tei haamanahia. Ta outou hopoi‘a, o te tautururaa ïa ia vetahi ê ia haapii e ia ora i te evanelia mai tei haapiihia i roto i te amuiraa rahi a te Ekalesia i ma‘iri iho nei.

A hi‘o faahou i te (mau) a‘oraa, ma te imi i te mau parau tumu e te mau parau haapiiraa e tu‘ati i ni‘a i te mau hinaaro o te mau melo o te piha haapiiraa. A imi atoa i te mau aamu, te irava parau, e te mau faahitiraa parau i roto i te (mau) a‘oraa o te riro ei tauturu ia outou ia haapii i te reira mau parau mau.

A hamani i te hoê faahororaa haapiiraa no te haapii i te mau parau tumu e te mau parau haapiiraa. I roto i te reira faahororaa haapiiraa, a faaohipa i te mau uiraa o te tauturu i te mau melo o te piha haapiiraa:

Ia imi i te mau parau tumu e te mau parau haapiiraa i roto i te (mau) a‘oraa.
Ia feruri i ni‘a i to ratou auraa.
Ia faaite i te haroaroaraa, te mau mana‘o, te mau iteraa, e te iteraa papû.
Ia faaohipa i te reira mau parau tumu e te mau parau haapiiraa i roto i to ratou oraraa.

Ava‘e	Materia haapiiraa no te sabati maha
Me 2010– Atopa 2010	Te mau a‘oraa nene‘ihia i roto i te Liahona* no Me 2010
Novema 2010– Eperera 2011	Te mau a‘oraa nene‘ihia i roto i te Liahona* no Novema 2010