Elder Jairo Mazzagardi

No te Hitu Ahuru

Ua ite o Elder Jairo Mazzagardi eaha te aura no te parau ra e faatusia i roto i te taviniraa i te Fatu. I te matahiti 1990, ua farii o Elder Mazzagardi i te hoê niuniu no roto mai i te Peresideni Thomas S. Monson, e tauturu i roto i te Peresideniraa Matamua i taua taime ra, tei pii mai ia’na ia faatere i te misioni no Salvador Paratiria.

« Aitâ vau i moemoea a‘e nei e e riro vau ei peresideni misioni », te parau ïa a Elder Mazzagardi. « Ua riro na ei peresideni tĭtĭ i raro mai i te pae matahiti. E mea rahi roa te ohipa – e mea maitai – i roto i ta maua ohipa. Mai te mea e, e farii au i taua piiraa ra, te aura ra, e vaiiho ïa vau i te mau ohipa atoa ».

I te hopea o te paraparauraa i roto i te niuniu, ua vaiiho te Peresideni Monson ia Elder Mazzagardi i te taime no te feruri i taua piiraa ra. Tera râ, e rave rahi matahiti na mua roa, ua faaoti a‘e na o Elder Mazzagardi e ta’na vahine e, e horo‘a raua i to raua oraraa i te Fatu ra, no reira ua farii oia i te reira piiraa i taua iho taime ra. « Te mau mea atoa ta te Fatu e hinaaro ia maua, ua ineine maua no te haere », ta’na ïa parau.

Hou a piihia ai oia i roto i te Pŭpŭ piti no te Hitu Ahuru, ua tavini na o Elder Mazzagardi ei tauturu no te episekopo, ei melo apooraa teitei, ei tauturu i roto i te peresideniraa tĭtĭ, ei peresideni tĭtĭ, ei ti‘a retioni, ei Hitu Ahuru Area, ei tauturu i roto i te peresideniraa no te hiero no Campinas Paratiria, e ei peresideni no te Hiero no São Paulo Paratiria.

E taata patu fare o Elder Mazzagardi, ua tuu oia i te taime rahi o to’na oraraa i roto i te ohipa hamaniraa i‘o puaa, e i muri a‘e, ua fatu mai oia i te hoê taiete hooraa fare. Ua tavini atoa oia i roto i te nuu faehau no Paratiria ei sergent mai te 1965 e tae atu i te 1966. Ua fanauhia oia na Antonio e o Margarida Mazzagardi i te ava‘e eperera 1947 i Itú, Paratiria. Ua paari oia i reira e i Jundiaí, Paratiria. Ua farerei oia e ta’na vahine o Elizabeth Ienne i to raua tamariiriiraa e ua faaipoipohia i Hoboken, New Jersey, i te ava‘e tiurai 1970.

Noa’tu e, e rave rahi matahiti aita raua i anaanatae i te Ekalesia, i muri a‘e i to te Mazzagardis ho‘iraa i Paratiria, ua ani manihini mai te hoê hoa ia raua ia haere mai i te opani iriti no te hiero no São Paulo Paratiria. I reira, ua farii raua toopiti atoa i te hoê iteraa rau pae varua. Ua bapetizohia raua i te 31 no atopa 1978, e ua taatihia ei utuafare i te ava‘e novema 1979. E toru a Mazzagardis ma tamarii.