Ko Hai ʻa Sīsū?
“Sīsū Hotau Kaumeʻa ʻOfá. [ʻOku takaofi maʻu pē]” (Tohi Hiva ʻa e Fānaú, 37).
1.“Tokanga! ʻE maʻu koe ʻe he tainasoá!” ko e kaila ia ʻa Teti ʻi heʻene tuli takai ʻaki e tainasoa ʻa Kolí ʻene tainasoaá he sea moluú.
Naʻe talaange ʻe Koli, mo tolo ʻene kiʻi tainasoá ki he holisí, “He ʻikai ke lava ʻe ha taha ʻo taʻofi au. Ko ha tainasoa au,”
2. Ne tukutaufetuli holo e ongo kiʻi tamaiki tangatá ʻi he falé ʻo hangē ha ongo fuʻu tainasoa longoaʻa mo fiekaiá kae ʻoua kuo ʻomi ʻe he Fineʻeikí ha kiʻi kai maʻamaʻa.
3.Naʻe ʻeke ange ʻe Teti, mo kai pē ʻene sīsí, “Ko hai ʻena ʻi ho holisí?”
Naʻe talaange ʻe Koli, “Ko Sīsū pē.”
Naʻe ʻeke ange ʻe Teti, “Ko hai ʻa Sīsū?”
Naʻe ʻikai ke ʻilo ʻe Koli ia pe ko e hā te ne lea ʻakí. Naʻá ne pehē ʻe ia ʻoku ʻilo ʻe he taha kotoa ʻa Sīsū.
Ko e meʻa pē naʻá ne lava ʻo tali ange, “ ʻOku nofo ʻi he langí. Pea ʻoku ʻofa ʻi he kakai kotoa pē.”
Naʻe pehē ange leva ʻa Teti, “SAI. ʻOkú ke fie ʻalu ki tuʻa?”
4. Naʻe kei tūʻulutui ʻa Koli ʻi hono veʻe mohengá ʻi he pō ko iá ʻo teuteu ke fai ʻene lotú feʻunga mo e hū mai ʻene Tangataʻeikí.
Naʻe ʻeke ange ʻe he Tangataʻeikí, “Naʻá ke fiefia mo Teti he ʻahó ni?”
“ ʻIo. Naʻá ma vaʻinga ʻi he ʻoneʻoné mo ʻema ongo tainasoá. Tangataʻeiki, naʻe ʻeke mai ʻe Teti pe ko hai ʻa Sīsū, pea naʻe ʻikai ke u ʻilo ʻe au pe ko e hā te u talaangé.”
5. Ne tuhu leva e Tangataʻeikí ki ha fakatātā he holisí ʻi ʻolunga he mohenga ʻo Kolí. Ko Sīsū ia ʻoku takatakaiʻi ʻe he fānaú. Naʻe ʻeke ange leva ʻe he Tangataʻeikí, “Ko e hā ʻokú ke fakakaukau ki ai ʻi hoʻo sio ki he tāvalivali ko ʻení?”
6. Naʻe talaange ʻe Koli, “ ʻOku ou fakakaukau ki heʻeku fie nofo mo Sīsū mo e Tamai Hēvaní ʻi ha ʻahó. Pea mo hono ngaohi leleiʻi ʻe Sīsū ʻa e kakaí ʻi Heʻene kei ʻi māmaní.”
7. Naʻe talaange ʻe he Tangataʻeikí, “ ʻOku ngali te ke lava ʻo tala kia Teti ʻa e ongo meʻa ko iá.”
Naʻe talaange leva ʻe Koli, “Mahalo ʻe fie haʻu ʻa Teti ki he lotú mo au ʻi ha taimi. Pea te ne lava ai ʻo ako ha ngaahi meʻa lahi fekauʻaki mo Sīsū. Pea ʻoku fakalata foki.”
8. Ne ʻuma hifo leva ʻa e Tangataʻeikí ki he tumuʻaki ʻo e ʻulu ʻo Kolí.
“Ko ha tamasiʻi lelei koe Koli. ʻOku fakatou laukau ʻaki koe ʻe he Tamai Hēvaní mo Sīsū. Pea ʻoku monūʻia ʻa Teti ke maʻu koe ko hono kaumeʻa.”