Ngaahi FakakaukauMaʻá e Efiafi Fakafāmili ʻi ʻApí
ʻOku ʻi he pulusinga ko ʻení ha ngaahi fakamatala mo e ʻekitivitī ʻa ia ʻe lava ke fakaʻaongaʻi ʻi he efiafi fakafāmili ʻi ʻapí. Ko e niʻihi pē ʻeni ʻo ha ngaahi sīpinga.
“Tāpuekina ʻe Hoku Uiuiʻí,” p. 11: ʻI hoʻo akoʻi ʻa e lēsoní, fakakaukau ke aleaʻi ʻa e founga naʻe fakamaʻamaʻa ai ʻe he ʻEikí ʻa e ngaahi kavenga ʻo e tokotaha faʻutohí ʻi heʻene fua fatongia ʻaki hono lotó kotoa. Fakaafeʻi ʻa e kau mēmipa ʻo e fāmilí ke vahevahe ʻa e founga kuo faitāpuekina ai kinautolú ʻi heʻenau tauhi ki he ʻEikí.
“Ko e Hā Naʻe ʻOmi ʻe he Kau Paioniá?”, p. 16: Fakakaukau ke lisi ha ngaahi meʻa ʻe fā ʻoku ʻomai ʻe Palesiteni Sitīveni L. Lisiate ʻi he fakamatala ko ʻení. Fealēleaʻaki ki he founga ʻe lava ke nau takitaha fakamālohia ho fāmilí mo faitāpuekina ʻa kinautolu ʻoku muimui ʻiate koé.
“Ko Hono Vahevahe ʻo e Ongoongoleleí ʻi he Lototoʻa,” p. 30: Fakakaukau ke fakaafeʻi ho fāmilí ke aleaʻi ʻa e founga ke fakaʻaongaʻi ʻa e fakamatala ko ʻení: “Kātaki ʻo manatuʻi ange ʻoku ʻikai fie maʻu ia ke mou ongoʻi ko ha meʻa pau ke mou fakatonuhiaʻi hoʻomou tuí; ko e meʻa pē ʻoku fie maʻú ke mou fakamatalaʻi kinautolu ʻi he laumālie ʻo e ʻofa mo e manavaʻofa. ʻOku ikuna maʻu pē ʻa e moʻoní ʻi he taimi ʻoku akoʻi ai ʻa e tokāteliné.”
“Naʻá ne Talamai Kiate Au, ‘He ʻIkai Teitei Lava Ia’ ”, p. 58: Hili hono lau pe fakamatalaʻi fakanounou ʻo e talanoá, fakakaukau ke fakatulamaʻi ʻa e ngaahi founga hono talí ʻi he taimi ʻoku mou fehangahangai ai mo e ʻahiʻahí. ʻE lava pē ke ako ʻa e kau mēmipa ʻo e fāmilí ke lea leʻo-lahi ʻaki ʻa e kupuʻi lea “ ʻIkai ʻaupito,” ʻo hangē ko ia naʻe fai ʻe Seisí.
Fēfē ʻa e Efiafi Fakafāmili ʻi ʻApí?
Naʻe fehuʻi mai ʻe hoku ʻofefine taʻu onó, ko Leilani, ʻo pehē, “Fēfē ʻa e efiafi fakafāmili ʻi ʻapí? He ʻikai ke tau fakahoko ia he pōní?” Naʻá ku ongoʻi loto tautea moʻoni. Naʻá ma feinga mo hoku husepānití ke fakahoko ʻa e efiafi fakafāmili ʻi ʻapí, ka koeʻuhí ko ʻema femoʻuekiná, naʻe ʻikai faʻa fakahoko ia. Naʻe hanga ʻe he fakamanatu ʻa Leilaní ʻo toe fakapapauʻi kiate kimaua ke ʻoua naʻá ma liʻaki ʻa e efiafi fakafāmili ʻi ʻapí ʻo tatau ai pē pe ko e hā.
ʻI he fakaʻau ko ia ke lahi ange ʻa Leilani mo hono tehina ko Nātiá, naʻá na loto maʻu pē ke akoʻi ʻa e meʻa naʻá na ako ʻi he Palaimelí lolotonga ʻa e efiafi fakafāmili ʻi ʻapí. ʻOkú na toe tā foki mo e ngaahi fakatātā ke fakamahinoʻi ʻa e tefitoʻi moʻoni ʻokú na fie akoʻí. ʻOkú ma fiefia ʻi heʻema hoko ko e mātuʻá ʻi heʻema sio kiate kinaua ʻokú na talanoa fekauʻaki mo e ongoongoleleí mo faʻa fakalahi atu ki he tefito kuó na filí.
ʻOku ou feinga ke ʻoua naʻá ku faʻa fanongo ki hono toutou lea ʻaki ʻo e kupuʻi lea ko e “Fēfē ʻa e efiafi fakafāmili ʻi ʻapí? He ʻikai ke tau fakahoko ia ʻi he pooni?” ʻOku ou ʻiloʻi ko e taimi lelei taha ki hono akoʻi e fānaú ko e lolotonga ʻenau kei īkí. ʻE lava pē ke feinga ʻa māmani ke ne tohoakiʻi ʻetau fānaú, ka ʻo kapau te tau ngāue mo tupu hake fakataha mo kinautolu, te tau lava ʻo aʻusia ʻa e taumuʻa ke ohi hake ha kau tangata mo ha kau fafine ʻoku nau moʻui ʻaki e ngaahi tefitoʻi moʻoní.
Petilisa Katinasi ti Palato, Kuatemala