Ne u Fuʻu Femoʻuekina Nai ke Tokoni?

Ngosi Felenisisikā ʻŌkolo, Naisīlia

ʻI he 1997, ne fakahā mai heʻemau palesiteni fakakoló ʻe fakahoko ʻe he koló ha ngāue tokoni ʻi he tukuiʻapi takatakai ʻi homau falelotú. Naʻa mau fakahoko ʻa e ngāué ni ke kau fakataha mo e kāingalotu ʻo e Siasí he funga ʻo e māmaní ʻi hono fakamanatua ʻo e taʻu 150 ʻo e tūʻuta ʻa e Kāingalotu Paionia ʻo e Siasí ki he Teleʻa Sōlekí.

Naʻe kau ʻi he ngāué hano fakamaʻa ʻo e ngaahi halá mo fakafonufonu ʻa e ngaahi luoluó. Naʻe pehē ʻe he palesiteni fakakoló te mau ʻuli ka ʻe lava ʻe he ngāué ni ʻo ʻomi ha faingamālie ke mau talanoa ai mo e niʻihi kehé ʻo fekauʻaki mo e Siasí.

Naʻe ʻikai ke u fakakaukau te u ʻalu koeʻuhí he naʻe fakataimi-tēpileʻi ʻe heʻeku palōfesá ha kalasi makehe ʻi he taimi tatau pē mo e ngāué. Naʻá ku ongoʻi ʻe mahino pē ki he taha kotoa, ka naʻá ku maʻu ha kiʻi tohi tufa ʻoku ui ko e Faith in Every Footsteps [Tui ʻi he Foʻi Laka Kotoa Pē]. Ko e taimi naʻá ku lau ai ʻa e konga fekauʻaki mo e ngaahi faingataʻaʻia ʻa e Kāingalotú ʻi heʻenau fononga ki he fakahihifo ʻo e ʻIunaiteti Siteití, ne u ongoʻi māfana peá u tangi. Naʻe ʻi ai ha Kāingalotu ʻe niʻihi ne nau tuku honau ngaahi ʻapi nongá ka nau ō ki ha toafa, ʻo taʻe-pau ʻa e meʻa te nau maʻu aí. Naʻe ʻi ai mo ha niʻihi ne nau tuiaki atu neongo ko e ʻosi ia ha siʻi mālōlō ʻa e mēmipa kotoa pē honau fāmilí he fonongá. ʻI he lotolotonga ʻo e puke, mamahi, fiekaia, mo e masivá, naʻa nau tui kapau te nau hiki ki he Hihifó, te nau tauʻatāina ai mei he fakatangá.

Naʻe ʻikai ke u ongoʻi fiemālie ʻi he fakahoko ʻe he ʻuluaki Kāingalotú ha ngaahi feilaulau lahi, pea aʻu pē ʻo mole ai siʻenau moʻuí ʻi ha ngaahi meʻa ʻe niʻihi, ke kei fakapapauʻi pē ʻoku kei laka atu ʻa e Siasí kimuʻa. Koeʻuhí ko ʻenau ngaahi feilaulaú mo ʻenau tuí, kuó u fiefia ai he taimí ni ʻi he ngaahi tāpuaki ʻo e ongoongoleleí.

Naʻá ku fakatokangaʻi ai e siʻisiʻi ʻo e faʻahinga feilaulau te u fai ʻi hono fakafehoanaki atú. Naʻe kole mai ke u foaki ha houa ngāue pē ʻe ua ke vahevahe ai ʻa e ongoongoleleí mo ha kakai tokosiʻi, pea naʻá ku kumi ʻuhinga he ʻikai ke u ʻalú.

Naʻá ku tuku leva ʻa e kalasí ka u kau atu ʻi he ngāué. Naʻá ku ʻuli, ka naʻe omi ʻa e kakaí ʻo fehuʻi mai fekauʻaki mo e Siasí. Naʻá ku ongoʻi fiefia ʻi heʻeku kaú, pea kuó u ʻosi ʻeni mei he ʻunivēsití—neongo ne u liʻaki ha ngaahi kalasi ʻe niʻihi.