ʻOku Mau Lea ʻia Kalaisi
Te Ne Lava Ke Fakamoʻui Ha Kafo Pē
Naʻá ku fakakaukau ke u fakahoko moʻoni ʻa e faleʻi naʻe fai mai kiate aú mo fekumi pe ko e hā koā hono ʻuhinga moʻoni ʻo e tui ki he Fakamoʻuí.
Naʻe hoko ʻeni ʻi he ʻaho 16 ʻo Tīsema 1991—he kakato e taʻu hono valu ʻema malí. ʻI he ʻaho ko iá ne siʻi mālōlō ai homa ʻuluaki fohá tuʻunga ʻi ha ngaahi meʻa ne fakahoko ʻe he tokotaha naʻá ne tokangaʻí. Naʻe kei māhina ua mo e konga hono motuʻá.
Naʻe pulonga ʻa e ngaahi māhina mo e ngaahi taʻu hoko aí ʻi he mamahí, ʻitá, taʻe-fiemālié, pea siva mo e ʻamanakí. ʻOku ʻikai ke lava ʻo fakamatalaʻi ʻa e faʻahinga mamahi naʻá ku tofanga aí. Naʻe ʻikai pē ha meʻa ne lea ʻaki pe fakahoko ʻe ha taha te ne fakafiemālieʻi hoku mamahí.
Ne u lau ha ngaahi tohi mo e folofola lahi, ka naʻe ʻikai pē ha meʻa ʻe taha te ne fakafiemālieʻi ʻeku holi ki ha ngaahi talí.
Naʻá ku maʻu ʻa e faingamālie ke talatalaifale mo ʻEletā Sēmisi E. Fausi (1920–2007), ʻi heʻene ʻi he Kōlomu ʻo e Kau ʻAposetolo ʻe Toko Hongofulu Mā Uá, koeʻuhí ko ʻene kaungāmeʻa mo ʻeku ongomātuʻá. (Naʻe feʻiloaki mo ʻeku fineʻeikí, Falavia, pea mo hono fāmilí lolotonga ʻene ngāue fakafaifekau ʻi Palāsilá.) Naʻá ku fakapapauʻi ʻe lava ʻa ʻEletā Fausi ʻo fakafiemālieʻi au.
Naʻá ku fai ha ngaahi fehuʻi lahi kae fakafanongo pē. Ne pehē ʻe ʻEletā Fausi ko e meʻa ne u fouá naʻe fakamamahi moʻoni mo mātuʻaki faingataʻa ʻaupito. Naʻá ne vahevahe mai ha ngaahi potu folofola ʻe niʻihi mo fakamatala fekauʻaki mo e fie maʻu ke ngāue ʻi he lolotonga ʻo ʻeku mamahí pea mo tukulolo kakato ki he finangalo ʻo e ʻEikí kae lava ke u toe fakataha mo ʻeku tama tangatá. Naʻá ne pehē, “Silivia, ʻoku fekauʻaki ʻeni mo koe he taimí ni. ʻOku mahino kiate au ʻokú ke hohaʻa ki hoʻo tama tangatá, ka ko hono moʻoní, ʻoku totonu ke ke hohaʻa koeʻuhí ko koe pea mo ha founga ke toe langaki ai hoʻo moʻuí. He ʻikai faingofua, ka te ke lava pē ke fakaleleiʻi ho lotó tuʻunga ʻi he Fakalelei ʻa Sīsū Kalaisí.”
Hili iá, naʻá ne tāpuakiʻi au ke lava ʻo mahino kiate au ʻa e fatongia mahuʻinga ʻoku fakahoko ʻe Sīsū Kalaisi ʻi heʻetau moʻuí pea mo tuku ke Ne hoko ko e maʻuʻanga ivi ʻoku ou fie maʻú.
Naʻá ku mavahe mei heʻema talanoá ʻoku ou kei loto siʻi pē; naʻe ngali faingofua ʻene faleʻí kae hangē he ʻikai lava ke fakahoko ia. Naʻe mole mo e ʻamanaki lelei ʻeku fineʻeikí foki he naʻe hangē naʻe ʻikai tokoni ha meʻa ia naʻá ne talamai. ʻOku ou manatuʻi ʻene pehē mai, “Kātaki ʻo tui mo falala ki hotau Fakamoʻuí, pea tukuange ha taimi ke moʻui ai ho ngaahi kafó.”
ʻI heʻeku fononga fakatāutaha ke toe maʻu ha fiefiá, naʻá ku fakakaukau ke u fakahoko moʻoni ʻa e faleʻi naʻe fai mai kiate aú mo fekumi pe ko e hā koā hono ʻuhinga moʻoni ʻo e falala ki he Fakamoʻuí. Naʻe ʻikai vave e liliú. Ka mei he ʻaho ki he ʻaho pea mei he taʻu ki he taʻu, fakataha mo e tokoni ʻa ha fakamoʻoni ʻoku tupulaki, naʻe fakaʻau ke u ʻiloʻi taʻe toe veiveiua ʻe lava ʻe he Fakamoʻuí ke faitoʻo hotau ngaahi kafó.
ʻOku ou ʻiloʻi he ʻikai ke maʻu ʻe he taha kotoa pē ha faingamālie ke talanoa mo ha ʻAposetolo, ʻo hangē ko ia ne u maʻú. Ka ʻe lava ʻa e taha kotoa—mo maʻu—ha faingamālie ke ʻilo ʻa e Fakamoʻuí pea mo ʻoatu ʻenau ngaahi kavenga mafasiá kiate Ia. ʻIo, ʻe lava ʻe heʻetau maʻu ʻa Sīsū Kalaisi ʻi heʻetau moʻuí, ʻo holoki ha faʻahinga mamahi.
ʻOku ou ʻiloʻi ko e taimi ʻoku ʻi heʻetau moʻuí ai ʻa e ʻEikí te Ne ʻomi ʻa e fiefiá kiate kitautolu. Ko ia hotau kaungāmeʻa, hotau faifakahinohino, pea mo hotau faʻifaʻitakiʻanga ʻo e kātaki ki he ngataʻangá. Naʻá ne kātekina moʻoni ʻa e ngaahi meʻa kotoa pē, pea ʻokú Ne ʻafioʻi ʻa e meʻa ʻoku tau faingataʻaʻia aí (vakai, ʻAlamā 7:11–12). Kuo ʻomi ʻe Heʻene Fakaleleí ʻa e mana ʻo hono toe fakatahatahaʻi ʻo e ngaahi konga kuo maumau ʻi he moʻui ní ʻi he teuteu ki he moʻui ka hokó.
Te u fakafetaʻi maʻu ai pē ʻi he ngaahi lea ʻa ʻEletā Fausí mo ʻeku fineʻeikí. Naʻá na tokoniʻi au ke u ʻiloʻi ʻe tatau ai pē pe ko e hā hoku faingataʻaʻiá, ko Sīsū Kalaisi ʻa e maʻuʻanga tokoni paú pea mo e ʻamanaki lelei ʻoku ou maʻú.
Toʻohemá: Toʻo mei he Ko Kalaisi mo e Talavou Koloaʻiá, tā ʻe Heinrich Hofmann, ʻi he angalelei ʻa e C. Harrison Conroy Co.