Ngaahi Ongoongo Nounou mei Māmani

ʻAmanaki ke Fakaleleiʻi e Temipale ʻOkitení

ʻE fakahoko ha fakalelei lahi ʻo feʻunga mo ha mahina ʻe 18 ki he 24 ki he Temipale ʻOkiteni ʻIutaá ʻa ia kuo taʻu 40 hono motuʻá. Ko e tefitoʻi palani ʻo e loto temipalé ʻe kei tatau pē, ka ʻe hā foʻou ʻa e palani ki tuʻá, ʻaki ʻa e maka mo e sioʻata foʻou. ʻE fakaleleiʻi ʻa e falé ke ne aʻusia ʻa e ngaahi fie maʻu ʻo ka hoko mai ha mofuike, maʻu ʻa e ngaahi tekinolosia fakamuimui tahá, mo maʻu ha ngaahi nāunau ʻoku ngāue lelei ʻaki ʻa e ivi fakaenatulá. ʻE toe tānaki atu foki mo ha tauʻanga meʻalele ʻi lalofonua.

Kamata Foʻou ʻo e Kahoa Hone Fakalāngilangí

Ne fakahoko fakataha mo e ngaahi liliu ki he polokalama Fakalakalaka Fakatāutahá, kuo ʻi ai ha kahoa Hone Fakalāngilangi maʻá e kau finemui ʻoku mahulu atu ʻenau ngāué mei he ngaahi fie maʻu anga mahení. Ke maʻu ʻa e kahoá, ʻe lava ʻe ha finemui ke toe lau ʻa e Tohi ʻa Molomoná mo fakakakato ha ngāue tokoni feʻunga mo e houa ʻe 40 hili ʻene maʻu ʻa e mētali Fakalāngilangi ʻo e Tuʻunga Fakafinemuí. Kuo pau ke kau ʻi he konga ko ʻeni ʻo e ngāué haʻane tokoniʻi ha finemui ʻe taha ke ne fakakakato ʻene ngaahi taumuʻa Fakalakalaka Fakataautahá. Ko e pale ko ʻení ko ha kiʻi fakaʻilonga ʻoku tuiʻi he kahoa tatau pē ʻoku ʻi ai ʻa e mētalí.

Fakatefito ha Fakaʻaliʻali ʻi ha Kāingalotu Amelika Latiná

Naʻe toki fakaava ʻe he Musiume Hisitōlia ʻo e Siasí ha fakaʻaliʻali foʻou ʻi ha lea fakafonua ʻoku ui ko e “Mi Vida, Mi Historia: Ngaahi Talanoa ʻo e Tuí mo e Ueʻi Fakalaumālie ʻo e Kāingalotu ʻo ʻAmelika Latiná,” ʻa ia ʻokú ne fakamamafaʻi ʻa e ngaahi aʻusia fakalaumālie ʻo ha kāingalotu ʻe toko 24. ʻOku tautau honau ngaahi taá ʻi he fakaʻaliʻalí, pea ʻoku fakafaingamālieʻi ʻe he ngaahi ʻekitivitī ʻo e ʻatá-mo-e-leá a e kau ʻaʻahí ke nau toe fakakaukau ki he moʻui ʻa e niʻihi ʻoku kau maí. ʻOku maʻu ʻa e fakaʻaliʻalí ʻi he ʻInitanetí ʻi he lea faka-Sipeiní mo e faka-Pilitāniá ʻi he lds.org/museum. Lomiʻi ʻi he Exhibits and Galleries, pea hoko atu ki he Current Exhibits.