Ko e hā hono mahuʻinga ʻo e ʻAho Paioniá? ʻOku fakamanatua koā ia ʻi he Siasí kotoa?
ʻOku fakamanatua ʻe he ʻAho Paioniá e tūʻuta ʻa e fuofua kulupu paionia Māmongá ki he Teleʻa Sōlekí, ʻi he ʻaho 24 ʻo Siulai 1847. ʻOku hoko ia ʻi ʻIutā ko ha ʻaho mālōlō faka-siteiti, pea ko hono ngaahi fakafiefiaʻí, ʻoku kau ai ha laka, pea ʻoku ui ia ko e ʻAho ʻo e ʻ47. Ko ha taimi ia ke fakalāngilangiʻi ai ʻa e kakai kotoa pē ne nau tokoni ki hono langa ʻo e siteití, ʻo tatau ai pē pe ko hai, ko e hā ʻenau tui fakalotú, pe ko honau tupuʻangá.
ʻIkai ngata aí, ʻe lava ʻa e Kāingalotu ʻi ha ngaahi feituʻu pē he māmaní ʻo kau ʻi hono fakalāngilangiʻi ʻo e tukufakaholo fakapaionia ʻoku tau tatau kotoa aí. ʻOku fakahoko ʻe ha ngaahi kolo ʻe niʻihi ha ngaahi fakaʻaliʻali tulama, laka, koniseti mo fononga saliote ko ha konga ʻo ʻenau fakamanatú. ʻI he ngaahi feituʻu kehé, mahalo ko e fakamanatú ko ha ʻeva fakafāmili pē pe ko ha mōmeniti fakafoʻituitui ke fakakaukau ki aí. Tatau ai pē pe ko e fē ʻoku nofo ai ʻa e kāingalotu ʻo e Siasí, tatau ai pē pe ʻoku fai hano fakamanatua lahi pe ko ha kiʻi mōmeniti pē ʻo e fakakaukau lotó, ka ko ha taimi totonu ia ke manatua ai e ngaahi meʻa ne fai ʻe he Kāingalotu kimuʻá maʻatautolu kātoa, kau ai ʻa e kau paionia fakalotofonua ne nau fakamālohia ʻa e Siasí ʻi he feituʻu pē ʻoku mou nofo aí.
Naʻe pehē ʻe Palesiteni Tieta F. ʻUkitofu, Tokoni Ua ʻi he Kau Palesitenisī ʻUluakí: “Ko ha meʻa fakafiefia pea ko ha faingamālie lelei moʻoni ia ke tau kau atu ki he Siasi fakaemāmani lahi ko ʻení pea akonekina mo langaki hake kitautolu ʻe he kau palōfita, kau tangata kikite, mo e kau tangata maʻu fakahaá! … ʻI hono tali ko ia ʻe he māmaní he taimí ni ʻa e ongoongolelei ʻo Sīsū Kalaisi kuo toe fakafoki maí, ʻoku tau hoko kotoa pē ko ha kau paionia ʻi hotau ngaahi feituʻú mo e tūkunga.”1
Tatau ai pē pe ʻokú ke nofo ʻi fē, ka ko e ʻaho 24 ʻo Siulaí ko ha taimi lelei ia ke manatua ai e meʻa ne fakahoko ʻe he kau fuofua Kāingalotu ʻi he Ngaahi ʻAho Kimui Ní maʻatautolu kotoa.