Ko e Maʻu ʻo ha ʻApi ʻi he Ongoongoleleí
ʻI heʻeku tupu hake ʻi Peefi ʻi ʻAositelēliá, ne ʻikai hoko ʻa e meʻa fakalotú ia ko ha meʻa ne u faʻa kau ki ai. Naʻe papitaiso au ʻi he Siasi Metotisí, ako ʻi he ngaahi akoʻanga ʻa e Siasi Metotisí, pea tātātaha pē ke u ʻalu mo ʻeku kui fefiné ki he haʻofanga ʻa e Siasi Papitaisó. Ka neongo ʻa e ʻikai ke napangapangamālie fakalaumālié, ka naʻe hangē ne fakanatula pē ʻa e lotú kiate aú,—ʻoku ou fakamālō ki heʻeku kui fefiné, ʻi heʻene vahevahe mai ʻene tuí mo akoʻi au ke lau ʻa e Tohi Tapú. ʻOku ou fakamālōʻia ʻi hono ivi tākiekina ʻi heʻeku moʻuí koeʻuhí, neongo ʻeku ngaahi tōʻonga fakamāmaní, naʻá ku kamata ke langa ha tui kia Sīsū Kalaisi. ʻI heʻeku fakakaukau atu ki aí, ʻoku ou fakatokangaʻi naʻe teuteuʻi ʻe he Tamai Hēvaní hoku lotó ke tali ʻa e ongoongolelei kuo toe fakafoki maí ʻi heʻeku moʻuí.
Naʻe hoko ha meʻa ʻe taha ke u teuteu ai ʻi he taimi naʻá ku fepaki ai ʻi ha meʻalele lolotonga haʻaku ʻaʻahi ki Falanisē. ʻI ha ngaahi mōmeniti siʻi mei hono ueʻi mālohi au ke u fakamaʻu hoku leta maluʻí, kuo heke ʻa e kaá ia ʻo tō ʻi ha luo fute ʻe 20 (mita ʻe 6) he tafaʻakí. Koeʻuhí ko e leʻo ʻo e fakatokangá pea mo ʻeku lava ʻo toe fakaʻaongaʻi hoku ongo vaʻé neongo ʻoku mamatea ʻaupito ha niʻihi ʻi he faʻahinga lavea peheé, naʻe kamata leva ke mahino kiate au naʻe pule ha mālohi fakalangi ʻoku mālohi ange ia ʻiate au.
Hili mei ai ha taʻu ʻe ua, lolotonga haʻaku toe foki ki Falanisē ko ha taha ako fakafetongi, ne fakaafeʻi au ʻe Keila Paati, ko ha taha kaungāako mei Kalefōnia, ke u ʻalu mo ia ki he lotú. Naʻá ku ongoʻi ʻa e vēkeveke ʻa Keila ki he ongoongoleleí. Naʻá ku fakatokangaʻi ʻa e foʻi lea kotoa pē ʻi heʻene fakamatala mai ʻa e palani ʻo e fakamoʻuí. Naʻe ongo maheni kotoa ʻeni kiate au, ʻo hangē pē ne u ʻosi fanongo ai kimuʻá.
Ko e taimi naʻá ku fuofua hū atu ai ki he falelotu ʻAkolimí, naʻe hangē naʻe kofu ʻaki au ha sipi kafu māfaná. Kuó u foki mai ki “ ʻapi.” ʻI he ʻaho tatau pē, ʻi he kalasi ʻo e Ngaahi Meʻa Mahuʻinga ʻo e Ongoongoleleí, naʻe fai ai ʻe he faifekau naʻá ne akoʻi ʻa e lēsoní, ha fakamoʻoni mālohi ki he ʻUluaki Mata Meʻa-Hā Maí. ʻI heʻene fakamatalaʻi e founga ʻoku fakamoʻoniʻi mai ai ʻe he Laumālie Māʻoniʻoní kiate kitautolú, naʻe ake hake ha māfana ʻi hoku lotó ʻo ne fakafonu hoku sinó kotoa. Naʻe tuku ʻe he fakamoʻoni mālohí ni ha ongo tuʻuloa ʻiate au, ʻa ia naʻá ne pouaki au ʻi he ngaahi faingataʻa kuo nau siviʻi ʻeku tuí.
Hili ha māhina nai ʻe taha mei heʻeku fuofua hū ʻi he falelotu ʻAkolimí, ne u pehē leva ke u papitaiso. Naʻá ku taʻu 18 pea naʻe ʻikai toe fie maʻu ha ngofua mei he mātuʻá. Ka ʻi heʻeku telefoni ki hoku fāmilí ʻi ʻAositelēlia mo e ongoongo fakafiefia ko ʻení, naʻá ku ʻohovale mo taʻe-fiemālie ʻi heʻeku ʻiloʻi ʻoku ʻikai ke nau saiʻia ʻi he Siasí mo fakafepakiʻi ʻeku fie papitaisó.
Naʻe ongo fakamamahi ʻeni ki hoku lotó. Te u hoko atu nai ʻo fakafepakiʻi e fakaʻamu ʻa hoku fāmilí, ʻa ia ʻoku ou ʻofa lahi aí? Pe te u toloi e papitaisó kae ʻoua ke u foki ki ʻAositelēlia ʻo fehangahangai mo ha fakafepaki ʻoku ngali ʻe toe lahi angé?
Naʻe tokoni ʻa e Mātiu 19:29 ʻi he fai ʻo ʻeku filí: “Pea ko ia fulipē kuó ne liʻaki ʻa e falé, pe ʻa e kāingá, pe ko e tuofefiné, pe ko e tamaí, pe ko e faʻeé, pe ko e ʻunohó, pe ʻa e fānaú, pe ʻa e fonuá, koeʻuhí ko hoku hingoá, te ne maʻu ʻo taki teau, pea te ne maʻu mo e moʻui taʻengatá.” Ne u fie fakamuʻomuʻa nai ʻa e Fakamoʻuí—ʻo muʻomuʻa ia ʻi hoku fāmilí? Ko e talí ko e ʻio, pea ʻi he ʻaho 16 ʻo Tīsema 1989, naʻá ku papitaiso ai pea fakamaʻu au ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe fonu fiefia hoku toenga taimi ʻi Falaniseé ʻi ha fiefia naʻe teʻeki ke u ʻilo kimuʻa.
ʻI heʻeku foki ki Pēfí, naʻe talitali lelei mo fiefia au ʻe hoku fāmilí. Ka naʻe fakafepakiʻi fefeka ʻeku feinga ke vahevahe ʻa e ongoongoleleí mo kinautolú. Naʻe aʻu ʻo nau aleaʻi ke u talanoa mo ha “kau mataotao” fakalotu te nau lava tokua ʻo “fakamāmaʻi” au mo tokoniʻi ke u ʻilo ʻa e “fehālaaki” ʻo e hala ne u filí. Ko hano sivi lahi ʻeni ʻo e tuí kiate au, pea ʻi he hili ha taulōfuʻu ʻo ha ngaahi fakafepaki lahi ki he tui faka-Māmongá, ne u fakatokangaʻi kuó u fehuʻia ʻeku fili ne faí.
Ka ʻi he ngaahi ongoʻi lōngonoa ʻo hoku lotó, naʻe ʻikai ke u lava ʻo fakaʻikaiʻi naʻe mei he ʻOtuá e meʻa ne u aʻusia ʻi Falaniseé, ko ia, naʻá ku kolea ai ʻa e Laumālie ʻo e ʻEikí ke ne fakamālohia au. Naʻá ku ʻaukai mo lotu he Sāpate kotoa pē ʻo laulau-uike, naʻá ku kīkīvoi ʻi hono lau ʻo e folofolá, naʻe fakahoko ha ngaahi tāpuaki ʻo e lakanga fakataulaʻeikí kiate au ke u maʻu ha fakahinohino mo ha mālohi, pea naʻá ku maʻulotu he uike kotoa pē ke feohi mo e Kāingalotú. Naʻe ʻikai ke u nofo ʻi he meʻa naʻe ʻikai mahino kiate aú pe ko ia naʻe ʻikai ke u ʻiló, ka naʻá ku tokanga taha ki he ngaahi meʻa naʻá ku ʻosi ʻiló. Ko ha fānau au ʻa e ʻOtuá, ko e Kalaisí ʻa Sīsū, naʻe fakafoki mai ʻe Siosefa Sāmita ʻa e Siasi ʻo e ʻEikí, ko e Tohi ʻa Molomoná mo e Tohi Tapú ko e folofola ʻa e ʻOtuá, pea ʻoku taʻengata e ngaahi fāmilí. ʻI he fakakaukau foʻou ko ʻení, naʻe kamata ai ke tupulaki mo toe mālohi ange ʻeku fakamoʻoní.
Ko e palopalema fakaʻosi naʻe pau ke u fehangahangai mo ia he taʻu ko iá ko e mali ʻi he temipalé ʻo ʻikai ke ʻi ai hoku fāmilí. Naʻe ʻalu ange ha talavou mei Kalefōnia naʻá ma fetaulaki ʻi Falanisē peá ma faʻa fetohiʻaki ke ʻeva ange ʻi ha uike ʻe tolu. Naʻe mahino kiate kimaua fakatouʻosi ʻokú ma fie mali, ka naʻá ku fehangahangai mo ha toe fili faingataʻa ʻe taha: te u mali ʻi he temipalé ke sila ai ki he moʻuí ni pea mo ʻitāniti kotoa, pe te u mali ʻi ha feituʻu pē koeʻuhí ke lava hoku fāmilí ʻo kau ki he ouau ʻo e malí?
Naʻá ku muimui ʻi he faleʻi ʻa ʻeku palesiteni fakasiteikí ʻo mali ʻi he temipalé ʻi Fēpueli ʻo e 1991. ʻI he taimi ko ʻení, naʻe mamahi lahi moʻoni hoku fāmilí, ka kuo nau fakatokangaʻi kuo hoko ʻa e Siasí ko ha tāpuaki ʻi heʻeku moʻuí. ʻI heʻenau vakai ko ʻeni ki he tupu hake ʻema fānaú ʻi he ongoongoleleí, kuo nau fakahaaʻi ʻenau houngaʻia ʻi he ngaahi meʻa ʻokú ma akoʻi kiate kinautolú pea mo e faʻahinga tuʻunga ʻoku nau aʻusiá. Naʻe fakahaaʻi kimuí ni mai ʻe he taha ʻo ʻeku fānaú, ʻene houngaʻia ʻi he fili naʻá ku fakahoko ke tali ʻa e ongoongoleleí pea mo ʻohake ha fāmili ki he ʻEikí. Naʻe hanga ʻe heʻene loto-moʻoní ʻo ʻai au ke u tangi koeʻuhí naʻá ku fakatokangaʻi ai ko e fili ke moʻuiʻaki ʻa e ongoongoleleí ʻoku ʻikai ngata pē ʻi heʻene tāpuekina ʻeku moʻuí ka ʻoku tāpuekina foki mo ia.
ʻOku ʻi he ngaahi mana mo e ivi tākiekina ʻo e kau ʻāngelo ʻi he māmaní, ʻa ia kuó ne tataki au ki ʻapi ki he ongoongolelei ʻo Sīsū Kalaisí. Hili ha taʻu ʻe uofulu, kuó u fakatokangaʻi naʻe ʻaonga e ngaahi ʻahiʻahi, langa ʻulu mo e ngaahi faingataʻá.
Tā fakatātaaʻi ʻe Jeff Ward
Ko e taimi naʻá ku fuofua hū atu ai ki he fale lotu ʻAkolimí, naʻe hangē naʻe takatakai ʻaki au ha sipi kafu māfaná. Kuó u foki mai ki “ʻapi.”