Naʻá Ku Haʻú Mei Fē?

Peti Holouela, ʻInitiana, USA

ʻI heʻeku kei siʻí naʻá ku faʻa fakakaukau, “Naʻá ku haʻú mei fē?” Ka ʻi hoku lotó naʻá ku ʻilo naʻá ku nofo ʻi ha feituʻu kimuʻa peá u toki haʻu ki hoku tuʻunga he taimi ní, ka naʻe ʻikai haʻaku ʻilo pe ko e fē ʻa e feituʻu ko iá.

Ne taʻu lahi mo ʻeku manavasiʻi ke tala ki ha taha—ʻo aʻu ki heʻeku ongomātuʻá—ʻi heʻeku manavasiʻi naʻa nau pehē ʻoku ou vale. Ka ʻi ha ʻaho ʻe taha, ʻi heʻeku taʻu hongofulu tupú, ne u loto lahi feʻunga ke fehuʻi ki he faifekau homau siasí, “Naʻa tau nofo ʻi fē kimuʻa pea tau toki haʻu ki māmaní?” Naʻá ne talamai ʻoku ʻikai totonu ke u fakakaukau ki he faʻahinga meʻa peheé. Naʻá ne pehē ʻoku ʻikai ke ʻi ai ha taha ia naʻe moʻui ʻi ha feituʻu kimuʻa pea toki fanauʻi maí; ʻoku ʻikai pē ke tau moʻui kitautolu kimuʻa ʻi ha faʻahinga founga.

Naʻá ku manavasiʻi ʻokú ne moʻoni pea ʻoku ou vale, ka naʻe ʻikai pē ke u lava ʻo toʻo ʻa e ngaahi fakakaukau ko ʻení mei hoku ʻatamaí. Naʻe hoko atu pē ʻeku fekumí, ka naʻe ʻikai ke ʻi ai ha tali ʻa ha taha.

ʻI hoku taʻu 18, ne hiki homau fāmilí. Ne u pehē ʻe ʻilo lahi ange ʻa e kau faifekau ʻi homau kolo foʻoú, ʻi he faifekau kimuʻá, ko ia ne u pehē leva ke u ʻeke ki ha taha ʻo kinautolu ʻeku fehuʻí. Naʻe tatau pē ʻene talí: naʻá ne talamai ʻoku ʻikai lelei ke fakakaukauʻi ʻa e faʻahinga meʻa peheé mo ne fokotuʻu mai ke u talanoa mo ha taha mataotao ki he palopalema fakaʻatamaí.

Naʻe ʻikai fuoloa mei ai kuo ʻikai ke u toe ʻalu ki he lotú. Ne maʻu ʻeku ngāue, feʻiloaki mo ha talavou, peá ma mali. Hili mei ai ha taʻu ʻe nima kuo fakaiku vete ʻema nofomalí. Ne u tānaki leva ʻeku fanga kiʻi ngaʻotoʻotá, taki mo e ongo kiʻi fānau ʻe toko ua pea kei feitamaʻi ʻa e toko taha, ʻo mau foki ki ʻapi.

ʻI he lolotonga ʻo e taʻu ʻe nima ko iá, ne kau ai ʻeku fineʻeikí ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne ʻosi fakamatala mai ʻo kau ki he Siasí ʻi haʻaku ʻeva ki ai mo ne kole mai ke u talanoa mo e kau faifekaú. Naʻe fāifai peá u loto ki ai, ka kimuʻa pea mau talanoá, naʻá ku ʻosi fakapapauʻi te u loto ke fai mai ʻa e ngaahi lēsoni fakafaifekaú kapau ʻe lava ʻe he ongo faifekaú ʻo talamai pe naʻá ku nofo ʻi fē kimuʻa peá u toki haʻu ki he tuʻunga ʻoku ou ʻi ai he taimi ní.

Naʻá ku ʻohovale, he naʻe ʻikai ngata pē ʻi heʻena tali ʻeku fehuʻí ka naʻá na toe ʻomi foki mo ha tali hangatonu mei he Tohi Tapú (vakai, Siope 38:4–7; Selemaia 1:5; Sute 1:6). ʻI he hili pē iá, naʻá na maʻu kakato ʻeku tokangá! Naʻe tokoni ʻena talí ʻo mahino kiate au ʻa e ʻuhinga ne u ongoʻi ai ʻi heʻeku moʻuí kotoa naʻá ku moʻui kimuʻá. Kuo mahino ʻeni kiate au naʻá ku moʻui kimuʻa ʻi he maama fakalaumālie fakataha mo ʻeku Tamai Hēvaní.

Naʻe ʻikai fuoloa kuó u hoko ko ha mēmipa ʻo e Siasí. Ko e fuofua taimi ʻeni heʻeku moʻuí ne u ongoʻi ai ko ha taha au pea ʻoku ʻi ai haku ikuʻanga ke u tulifua ki ai—ke foki ki ʻapi ki heʻeku Tamai Hēvaní.

ʻOku ou houngaʻia ʻi he lava ʻe he ongo faifekaú ʻo tali ʻa e fehuʻi naʻe ʻikai ke toe lava ia ʻe ha tahá.