Ko e Meʻa ʻOku Tau Tui Ki Aí

ʻOku Tāpuakiʻi ʻETAU MOʻUÍ ʻE HE HAOHAOA FAKASEKISUALÉ

ʻOku ʻuhinga ʻa e angamaʻá ke maʻa ʻetau fakakaukaú, leá, mo e tōʻongá. Ko e haohaoa fakasekisuale ko ʻení ʻoku “fakahōifua ia ki he ʻOtuá” ¹ Kuo foaki mai ʻe heʻetau Tamai Hēvaní kiate kitautolu ʻa e mālohi toputapu ʻo e fakatupú ʻi he taumuʻa ko hono ʻomi ʻo e fānaú pea mo hono fakahaaʻi ʻo e ʻofá ʻi he nofo mali ʻa ha tangata mo ha fefine. Kuó Ne toe foaki mai foki mo e fono ʻo e angamaʻá ke maluʻi kitautolu mei he maumau ʻoku hoko ʻi hono fakaʻaongaʻi ʻo e ngaahi feohi fakaesino ʻi tuʻa ʻi he nofo-malí.

Kuo ʻosi fokotuʻu ʻe he Tamai Hēvaní ha ngaahi fakangatangata mahino ki he angamaʻá. ʻOkú Ne fekauʻi kitautolu ke ʻoua naʻa ʻi ai ha faʻahinga fetuʻutaki fakasekisuale kimuʻa pea tau toki malí. Ka hili ʻetau malí, kuo fekauʻi kitautolu ke tau anganofo kakato ki hotau malí.² Kapau te tau maumauʻi ʻa e fono ʻo e angamaʻá, ʻoku tau fakahoko ai ha angahala mamafa.³ Naʻe akoʻi ʻe he palōfita ko ʻAlamaá ko e angahala fakasekisualé ʻoku mamafa ange ia ʻi ha toe faʻahinga angahala, tuku kehe pē ʻa e fakapoó pe ko hono fakaʻikaiʻi ʻo e Laumālie Māʻoniʻoní.⁴

ʻOku manukiʻi ʻe Sētane ʻa e angamaʻá pea mo hono toputapu ʻo e nofomalí ʻi he taimi ʻokú ne fakataueleʻi ai kitautolu ke tau tui ʻoku tali lelei pē e ngaahi feohi fakaesino ʻi tuʻa ʻi he malí kapau ʻoku feʻofaʻaki ʻa e tangatá mo e fefiné. ʻOku ʻikai moʻoni ʻeni. Ko ha angahala mamafa ʻeni ʻa ia ʻokú ne ʻuliʻi ʻa e mālohi ʻo e ʻOtuá kuó Ne foaki mai ke tau fakatupu ʻaki e moʻuí.⁵

Kuo ʻosi fekauʻi kitautolu kotoa heʻetau Tamai Hēvaní ke tau moʻui ʻaki ʻa e fono ʻo e angamaʻá. Ko e ngaahi tāpuaki ʻo e talangofua ki he fekaú pea mo e ngaahi nunuʻa ʻo hono maumauʻí ʻoku tatau ia kiate kitautolu kotoa, tatau ai pē pe ko e hā e ongo ʻoku tau maʻú, ʻetau ngaahi holí, pe ko e ngaahi ʻahiʻahi fakasekisualé.

Kapau ʻoku tau fakahoko ha ngaahi angahala fakasekisuale, ʻe fakamolemoleʻi kitautolu ʻe he ʻEikí kapau te tau fakatomala moʻoni.⁶ ʻE lava ke fetongi ʻa e mamahi ʻo e angahalá ʻaki ʻa e nonga fakafiemālie ʻo e fakamolemolé.⁷

Ko e taimi ʻoku tau tauhi ai kitautolu ke tau maʻa fakasekisualé, te tau ongoʻingofua ange leva ai ʻa e fakahinohino ʻa e Laumālie Māʻoniʻoní mo maʻu ha ivi, fakafiemālie pea mo ha maluʻi.⁸

1. Te ke lava ʻo fili ʻi he taimí ni ke ke angamaʻa pea ʻoua naʻá ke teitei tukulolo. Mahalo ʻe ongoʻi ʻe ha niʻihi te nau lava pē ʻo fakahoko ha ngaahi angahala fakasekisuale mo pehē te nau toki fakatomala pē ʻamui. ʻOku fakahaaʻi ʻe he faʻahinga fakakaukau ko ʻení ʻa e taʻe-ʻapasia ki he ngaahi fekau ʻa e ʻEikí mo e taʻe-mahino ʻo e fakatomalá mo e angatonú.⁹

2. ʻOkú ke fakahaaʻi ki he ʻOtuá ʻokú ke ʻiloʻi ko ho sinó ko ha fakatupu toputapu ia meiate Ia, ʻi hoʻo teunga tāú mo e fōtungá. ʻOku fakatupulaki ʻe he teunga tāú ʻa e angamaʻá.¹⁰

3. ʻOku ʻi ai ha ivi lahi ʻo e ponokalafí ke ne maʻunimā kita mo fakatupu ʻauha. Te ne kaihaʻasi meiate koe ho lāngilangí mo hoʻo mapuleʻi koé pea ʻoku faʻa fakaiku ia ki ha ngaahi angahala fakasekisuale mamafa ange.¹¹

4. Kapau ʻokú ke fekuki mo e ngaahi ʻahiʻahi fakasekisualé, kau ai ʻa e femanakoʻaki ʻa e tangata mo e tangatá pe fefine mo e fefiné, te ke lava pē ʻo fili ke tekeʻi ʻa e ngaahi ʻahiʻahi ko iá. ʻE hanga ʻe he ʻEikí ʻo “ ʻai ha founga ke ke hao ai” koeʻuhí ke ke lava ʻo “matuʻuaki ia.”¹²

5. Kapau kuó ke fakahoko ha ngaahi maumaufono fakasekisuale, talanoa mo hoʻo pīsopé pe palesiteni fakakoló. Te ne tokoni atu ʻi he founga ʻo e fakatomalá.¹³

6. Kapau ne tohotohoʻi koe, pe fakahoko ha angahala fakamalaʻia, ngaohikovia, pe ko ha toe ngaahi hia fakasekisuale, ʻoku ʻikai te ke halaia koe ʻi ha angahala. ʻE lava hoʻo pīsopé pe palesiteni fakakoló ʻo tokoni ʻi hono tataki koe ʻi he founga ʻo e fakamoʻui ho lotó.¹⁴

7. Kapau ʻoku teʻeki ke ke mali pea ʻokú ke teiti, hanga ʻo fakaʻapaʻapaʻi ʻa e tokotaha ʻokú ke teiti mo iá, palani ha ngaahi ʻekitivitī ʻoku langaki moʻuí, pea fakaʻehiʻehi mei he ngaahi talanoa pe ngaahi ʻekitivitī ʻoku nau fakatupu ʻa e ngaahi ongo fakasekisualé.

8. Kapau kuó ke ʻosi mali, anganofo ki ho malí ʻi he fakakaukaú, leá, pea mo e tōʻongá.¹⁵ ʻOku ʻikai ke taau ʻa e fehuaʻaki mo e kakai kehé. Fakamamaʻo mei he ngaahi tūkunga ʻoku ala tupu ai ʻa e ʻahiʻahí.¹⁶

Maʻuʻanga Fakamatalá

1. Sēkope 2:7

2. Vakai, T&F 42:22.

3. Vakai, ʻEkesōtosi 20:14; 1 Tesalonaika 4:3.

4. Vakai, ʻAlamā 39:5.

5. (Vakai, 1 Kolinitō 7:2).

6. Vakai, ʻĪsaia 1:18.

7. Vakai, T&F 58:42--43.

8. Ke maʻu ha fakamatala lahi ange, vakai, Ki Hono Fakamālohia ʻo e Toʻu Tupú (2001), 26–28; Ngaahi Tefitoʻi Moʻoni ʻo e Ongoongoleleí (2009), 263–73; mo e Tuʻu Maʻu ʻi he Tuí (2004), “Angamaʻá,” 7–12.

9. Vakai, ʻAlamā 42:30.

10. Vakai, Tuʻu Maʻu ʻi he Tuí, “Teunga Tāú,” 5.

11. Vakai, ʻAlamā 39:9; 3 Nīfai 12:28–30; T&F 42:23; 121:45.

12. 1 Kolinitō 10:13; vakai foki, Sēnesi 39:1–12.

13. Vakai, Ngaahi Akonaki ʻa e Kau Palesiteni ʻo e Siasí: Sipenisā W. Kimipolo (2006), 47, 50–51, 54; vakai, Mōsaia 26:29.

14. Vakai, Tuʻu Maʻu ʻi he Tuí, “Ngaohikoviá,” 146.

15. Vakai, ʻEfesō 5:28; T&F 42:22–23.

16. Vakai, 1 Tesalonaika 5:22.

17. “Ko e Fāmilí : Ko ha Fanongonongo ki Māmani,” Liahona, ʻOkatopa 2004, 49.

ʻIkai ʻoku mou ʻilo ko homou sinó ko e faletapu ʻo e Laumālie Māʻoniʻoní, ʻoku ʻiate kimoutolu, ʻa ia ʻoku mou maʻu mei he ʻOtuá, pea ʻoku ʻikai ʻamoutolu ʻa kimoutolu?

“He kuo fakatau ʻa kimoutolu ʻaki ʻa e totongi: ko ia ke fakaongoongolelei ʻa e ʻOtuá ʻi homou sinó, pea ʻi homou laumālié, ʻa ia ʻoku ʻo e ʻOtuá” (1 Kolinitō 6:19–20).

“ ʻOku mau fakahā ai heni ʻoku kei tuʻu maʻu pē ʻa e fekau ko ia ʻa e ʻOtuá ki heʻene fānaú ke nau fanafanau mo fakatokolahi ʻa māmaní. ʻOku mau toe fakahā foki heni kuo ʻosi tuʻutuʻuni ʻe he ʻOtuá ke toki ngāueʻaki pē ʻa e ngaahi mālohi toputapu ʻo e fakatupú ʻe ha tangata mo ha fefine, kuó na ʻosi mali fakalao ko ha husepāniti mo ha uaifi.”¹⁷

Faitaaʻi ʻe Welden C. Andersen; Lana Leishman; Robert Casey; Jan Friis, © Henrik Als; Matthew Reier; mo John Luke