Ahoana no Hanampian’ny Tempoly Antsika
Ny ray aman-dreny rehetra dia mahafantatra fa ny fitaizana ny zanaka dia mitondra fanamby sy fitahiana tsy ampoizina. Izaho sy ny vadiko dia samy nahita fa rehefa mandinika ny tanjona mandrakizain’ilay asan’ny ray aman-dreny izahay, dia mahatsapa andraikitra lehibe tena mavesatra miaraka amin’ny fanantenana lehibe tokoa.
Mazava ho azy fa ny Tompo dia nanome antsika valisoa ara-panahy mba hanamaivana ny enta-mavesatsika. Ho an’ny fianakavianay, ny valisoa ara-panahy lehibe indrindra dia ny fandehanana tany amin’ny tranon’ny Tompo handray ny Fanampiany rehefa nihalehibe ny zanakay ary nihasarotra kokoa ny fiainana. Hitanay fa afaka mitondra ireo olana manokana nanananay eo amin’ny Tompo izahay any amin’ny tempoliny.
Rehefa tonga teo amin’ny fahatanorana ireo zanakay dia tsapanay fa tena afaka manao fahadisoana lehibe izy ireo. Ny fahatsapana tena nampitahotra indrindra raha ny marina dia ny hoe, nanao ny zavatra rehetra fantatray fa tokony hatao izahay, nefa dia mbola nisy ihany ireo loza nananontanona anay.
Dia hitanay fa ny fivavahana any amin’ny tempoly dia lafiny iray manan-danja eo amin’ny ezaka ataonay mba hanampiana ireo zanakay hifidy ny tsara. Nahazo tanjaka lehibe sy fitahiana avy amin’ny fandehanana tany amin’ny tempoly izahay ao anatin’ny fanahin’ny fifadian-kanina sy ny vavaka ho an’ny zanakay. Nivavaka izahay mba hanana fahatsapana ny fiomanan’ny tena manokana, sy hanana eritreritra sy toetra tsara alohan’ny hidirana ny tempoly. Rehefa azo atao, ny fisaintsainanay rehefa ao anaty tempoly dia miompana amin’ny andraikitray amin’ny maha-ray aman-dreny anay ary ny zavatra ilain’ny zanaka iray manokana.
Matetika ny valiny dia tonga haingana sy mazava tsara. Tamin’ny nisehoan’izany voalohany dia noeritreretinay hoe fifanojoan-javatra angamba izany. Fa taoriana kely, dia tena niharihary fa tafiditra tao amin’ny dingana izay toa nanamaivana ny firotsahan’ny fitahian’ny lanitra izahay.
Ny valiny matetika dia avy any amin’ireo olona izay mifanerasera amin’ny zanakay, toy ny eveka be fitiavana izay nanampy ny zanakay vavy tao anatin’ny taonan’ny fianarana any amin’ny oniversite izay nandalo olana sarotra. Ireo zanaka hafa dia nandray fitahiana mitovitovy amin’izany koa. Ny tsirairay dia samy manana ny safidiny malalaka ary mety hisafidy hanao zavatra mifanohitra amin’izay antenanay izy ireo, kanefa dia tsapanay fa ny fanompoana nataonay tao amin’ny tempoly dia nitondra ny fanampian’ny lanitra teo amin’ny fiainan’ireo zanakay.
Ny tombontsoa azonay avy amin’ny fivavahana tany amin’ny tempoly dia nihoatra lavitra ireo fitahiana ny zanakay. Indray mandeha ny vadiko niatrika olana tena sarotra momba ny asa ka nanapa-kevitra ny hitondra izany any amin’ny tempoly. Tamin’izay andro izay dia nahazo fahatsapan-javatra avy tamin’ny Tompo izy fa soratra masina iray izay no valin’ny fanontaniany.
Rehefa tonga tany an-trano izy, dia nanokatra haingana ny soratra masina ary, akory ny hafaliany rehefa nahita fanampiana tamin’ny olany izy. Izany zava-niseho izany dia nanokatra ny fomba fampiharana vaovao ny soratra masina. Ny Tompo dia afaka miresaka amin’ny zanany amin’ny alalan’ny fampahatsiahivana antsika fa ny soratra masina dia ahitana ireo valin’ny olantsika. Tena nankasitrahanay izany fitsipika nianaranay tany amin’ny tempoly izany.
Eto amin’ity izao tontolo izao ity izay hanjakan’ny ratsy ary hanapariahan’i Satana ny heriny hanapotika ny tokantrano, dia tena mampahery tokoa ny mahafantatra fa afaka mandeha any amin’ny tranon’ny Tompo isika ary mikatsaka fitarihana. Na inona na inona olana atrehantsika eo amin’ny fikarakarana ny fianakaviantsika, dia mahita hafaliana isika rehefa mikatsaka ny fiarovana sy ny fampaherezan’ny tempoly.