E mea faahanahana maitai-a‘e-hia te 400raa o te matahiti o te Bibilia na roto i te tai‘o-rahi-raa, te mau mana‘o ïa a te mau Aposetolo.
« E ere na roto noa i te tupuraa aore râ te hape i farii ai tatou i te Bibilia i teie mahana », te parau ra o Elder M. Russell Ballard no te Pŭpŭ no te Tino Ahuru ma Piti Aposetolo.1 Ua haamaramarama oia e te vai nei te Bibilia no te haapa‘o-maitai-raa o te mau taata parau-tia tei pee i te mau muhumuhur’aa ia papa‘i i te mau ohipa mo‘a e te mau haapiiraa, e te faaroo e te itoito atoa o vetahi ê, mai te feia iriti, tei faatusia rahi i muri mai no te « paruru e te faaherehere » i te Bibilia.
Te 2 no Me 2011, o te 400 raa o te mahana fanauraa no te nene‘iraa matamua no te Iritiraa a te Arii Iakobo no te Bibilia. Ua haamata a‘ena te mau taata na te ao nei i te faahaamana‘o te nene‘iraa o te Bibilia na roto i te mau rururaa, te mau faahanahanaraa, te mau arui himeneraa, te mau tata‘uraa orero, e te tahi atu â. Te horo‘a mai nei te mau melo no te Pŭpŭ no te Tino Ahuru ma Piti Aposetolo i te tahi rave‘a ê no te tapa‘o i taua oro‘a ra : na roto i te faatupuraa i te hoê here no te Bibilia a tai‘o ai tatou i te oraraa e te taviniraa a te Faaora e te mau parau a te mau peropheta e te mau aposetolo tahito.
Ua parau Elder Ballard, « E ti‘a ia tatou ia mauruuru no te Bibilia Mo‘a ». « Te here nei au i te Bibilia, ta’na mau haapiiraa, ta’na mau parau tumu, e to’na varua… Mea here na’u te hi‘oraa atea e te hau o te tae mai na roto i te tai‘oraa i te Bibilia ».2
Ua farii atoa Elder Jeffrey R. Holland no te Pŭpŭ no te Tino Ahuru ma Piti Aposetolo i taua mana‘o ra. Ua parau oia, « Te here nei e te faatura nei tatou i te Bibilia ». « Ua ite-matamua-hia te reira i roto i ta tatou mau papa‘iraa mo‘a. » 3 Ua faahaamana‘o mai oia ia tatou e ua tupu te Faaho‘i-raa-hia mai te Evanelia no te mea ua tai‘o o Iosepha Semita i te Bibilia e ua faaohipa i te faaroo i roto i te fafauraa tei papa‘ihia i roto i te Iakobo 1:5 e e pahono te Atua i ta tatou mau pure.
Ma te haamana‘o i te mau ohipa tei arata‘i i te e‘a no te Faaho‘i-raa-hia mai te Evanelia, ua parau o Elder Robert D. Hales no te Pŭpŭ no te Tino Ahuru ma Piti Aposetolo ma te mauruuru no te feia atoa tei faatupu i te iritiraa e te nene‘iraa o te Bibilia. No ta ratou ohipa, i noaa’i te iritiraa a te Arii Iakobo no te Bibilia i te mau taata atoa ia tai‘o e no te reira i noaa’i ia Iosepha Semita, ua faaho‘ihia mai te Ekalesia mau i te fenua nei. « E mea maere anei e ua riro te Iritiraa a te Arii Iakobo no te Bibilia te Bibilia reo Paratane haamanahia a te Ekalesia a Iesu Mesia i te Feia Mo‘a i te mau Mahana Hopea nei ? » Ua ui Elder Hales.4
Ua parau Elder Ballard, « E ti‘a ia tatou ia haamana‘o noa i te mau rahiraa taata tei pohe e tei ite i te mana o te [Bibilia] e tei horo‘a i to ratou mau ora ia nehenehe ia tatou ia ite i roto i ta’na mau parau te oaoa mure ore e te hau no te basileia a to tatou Metua i te Ao ra ».5
Ua faaite mai te Peresideni Boyd K. Packer, Peresideni no te Pŭpŭ no te Tino Ahuru ma Piti Aposetolo, i te hoê aamu no ni‘a i te mata‘ita‘iraa i te hoê Bibilia utuafare tahito roa e te iteraa i te hoê parau i ni‘a i te api upoo parau o te parau ra, « Te Nene‘iraa maitai roa‘e o te Bibilia o te nene‘iraa ïa i te reira i ni‘a i te aau o te taata tai‘o ».6 Ua parau oia i muri iho i teie papa‘iraa mo‘a: « O outou hoi ta matou episetole, i papa‘ihia i roto i to matou aau, ua itea e ua taiohia e te taata atoa » (2 Korinetia 3:2).
Na roto i te iteraa e te hereraa i te Bibilia e te mau papa‘iraa mo‘a, e nehenehe ïa ia tatou ia faaite i to tatou mauruuru e ia oaoa i te mau haamaitairaa no te Faaho‘i-raa-hia mai te evanelia.
Ua parau o Elder D. Todd Christofferson, « A feruri na i te hanahana o ta tatou mau haamaitairaa i te fariiraa i te Bibilia Mo‘a e na 900 apî no te papa‘iraa mo‘a ». « Ia tamau noa tatou i te oaoa i te mau parau a te Mesia o te parau mai ia tatou i te mau mea atoa e ti‘a ia tatou ia rave ».7
Te tamau noa nei te Iritiraa a te Arii Iakobo no te Bibilia Mo‘a e 400 matahiti i teie nei i te haamaitai i te mau melo no te Ekalesia i teie mahana.
© IRI