Elder J. Devn Cornish

No te Hitu Ahuru

Ua ite o Elder John Devn Cornish e e mea faufaa rahi te mau melo e te mau piiraa atoa i roto i te Ekalesia.

Ua parau oia, « E mea faufaa rahi ia haamana‘o e ia feruri ana‘e tatou i te mau piiraa i roto i te Ekalesia e ere te mea faufaa rahi te vahi e parahi ai tatou i roto i te manureva, te mea faufaa rahi râ tei roto ïa tatou i te manureva ». « Te riroraa ei tufaa no te ohipa terâ te mea faufaa rahi e a muri noa’tu. E mea iti roa te faufaa o te ti‘araa ta tatou e mau nei ».

Mai to’na piiraahia ia tavini i roto i te Misioni no Guatemala El Salvador e tae mai i to’na piiraa i roto i te Piti o te Pŭpŭ Hiti Ahuru, ua itoito o Elder Cornish i te raveraa i ta’na mau piiraa i roto i te Ekalesia, peresideni no te Feia Apî Tane i roto i te paroita, peresideni no te pŭpŭ peresibutero, papa‘i parau faatere paroita, tia’i pŭpŭ tahu‘a rahi, melo no te apooraa teitei, episekopo, peresideni tĭtĭ, peresideni no te Misioni no te Repupirita Dominican Santiago, e Hitu Ahuru Area.

Fanauhia i te ava‘e Eperera 1951 i Salt Lake City, Utaha, Mau Hau Amui no Marite i na metua o George e Naomi Cornish, ua paari o Elder Cornish i Utaha, Georgia, e Virginia, Mau Hau Amui no Marite hou a ho‘i ai oia i Utaha no te fare haapiiraa teitei.

A ora ai oia i Provo, ua farerei oia ia Elaine Simmons i te hoê faaoaoaraa na te feia apî paari. Ua faaipoipohia raua i te Hiero no Manti Utaha i te ava‘e Atete 1973.

A aupuru ai oia i ta’na e ono tamarii e ta’na vahine faaipoipo, ua tavini o Elder Cornish i roto i te Pŭpŭ Taote no te Nuu Reva no te Mau Hau Amui no Marite, ua noaa ia’na te mau parau tu‘ite e te parau tu‘ite taote i te Fare Haapiiraa Teitei no Johns Hopskins, e ua rave oia i ta’na tau haapiipiiraa taote na te mau tamarii i te Fare Haapiiraa Taote no Harvard e te Fare Ma‘i na te mau Tamarii no Boston.

Ua faahaere te haapiiraa e te ohipa i te utuafare e rave rahi mau taime na roto i te mau matahiti e rave rahi i Idaho, Texas, California e Georgia, Mau Hau Amui no Marite, ua parau râ Elder e te tuahine Cornish e i te mau vahi atoa i reira ratou ua here ratou i te taviniraa i roto i te Ekalesia.

Ua parau o Elder Cornis, « Te tupu nei te ohipa i te rahi na te ao taatoa nei, e e haamaitairaa rahi ia nehenehe ia tauturu i te tavini i te mau tamarii a te Fatu i te mau vahi atoa i reira ratou ».

Teie piiraa i te Hitu Ahuru, « mai te mau piiraa atoa i roto i te Ekalesia, o te hoê ïa rave‘a no te riro ei tufaa no te ohipa a te Fatu », te na ô ra o Elder Cornish. « Te mauruuru nei matou no taua haamaitairaa ra ».