Elder LeGrand R. Curtis, Tamaiti.

No te Hitu Ahuru

Ua ite o Elder LeGrand Raine Curtis, Tamaiti e te « titau nei te Fatu i te aau e te mana‘o anaanatae » (PH&PF 64:34).

« Ua here oia i te taviniraa i roto i te Ekalesia, e e rave oia i te reira na roto i te rave-puai-raa i te ohipa e te mana‘o anaanatae », te na ô ra ta’na vahine faaipoipo, o Jane Cowan Curtis, ta’na i faaipoipo i roto i te Hiero no Roto Miti i te 4 no tenuare 1974. « Te taviniraa o to’na ïa mana‘o e hinaaro rahi roa‘e ».

Ua fanauhia Elder Curtis i te ava‘e Atete 1952 i Odgen, Utaha, Mau Hau Amui no Marite, i na metua o LeGrand R. e Patricia Glade Curtis. Ua riro mai to’na metua tane i muri mai ei melo no te Piti o te Pŭpŭ no te Hitu Ahuru (1990–95).

Hou to’na piiraa i roto i te Pŭpŭ Matamua no te Hitu Ahuru, ua tavini Elder Curtis Tamaiti i roto i te Misioni no Italia Apatoerau e ei episekopo, melo no te apooraa teitei, peresideni tĭtĭ, peresideni no te Misioni no Italia Padova, e ei Hitu Ahuru Area. Te tavini ra oia ei melo no te Pae o te Pŭpŭ Hitu Ahuru i roto i te Area no Utaha Salt Lake City i te taime a piihia ai oia i roto i te Pŭpŭ Matamua.

Ua noaa ia Elder Curtis te parau tu‘ite na te Fare Haapiiraa Teitei no Brigham Young no te pae tereraa faufaa e ua noaa ia’na te parau tu‘ite no te pae o te ture i te Fare Haapiiraa Teitei no Michigan. I te taime a piihia’i oia te rave ra oia i te ohipa ei paruru i roto i te hoê taiete paruru ture. Taa ê noa’tu te haapiiraa e te ohipa ua aupuru o Elder Curtis e ta’na vahine faaipoipo e pae tamarii.

I muri a‘e i te taviniraa ei Hitu Area mai te matahiti 2004 e tae atu i te matahiti 2011, ua parau o Elder Curtis e ua mauruuru oia i te taime a haa ai oia i piha‘i iho i te mau Hui Mana Faatere. Ua parau oia e, « Ua haamaita‘ihia vau i te haaraa i piha‘i iho i te tahi mau taata faatere faahiahia i roto i te Ekalesia ». « Ua riro te hi‘oraa ia ratou e te haapiiraa i piha‘i iho ia ratou e hoê haamaitairaa rahi roa ».

Ua parau te tuahine Curtis e ua anaanatae noa te rima e te aau o Elder Curtis. Ua parau oia e « ‘E rave ïa vau’ o to’na ïa huru i te mau taime atoa ».

E hope te Parau Haapiiraa e te Parau Fafau 64:34 ma teie mau parau : « E e amu hoi te feia anaanatae e te feia haapa‘o maitai i te maa maitai no te fenua no Ziona i teie mau mahana hopea nei ». Ua parau te taea‘e e te tuahine Curtis e ua haamaitai-rahi-hia raua e ta raua mau tamarii e mootua no te taviniraa i te Fatu.