Elder Carl B. Cook

No te Hitu Ahuru

Ei misionare apî i roto i te Misioni Haapiipiiraa Reo (te faanahoraa na mua‘e o te Pû Haapiipiiraa Misionare) e faaineine ra no te haere atu i Hamburg, Fenua Purutia, ua fifi o Carl Bert Cook i te haapii i te reo Purutia. A tamata ai oia i te harû mai i te mau faanahoraa tumu ohie no te reo, ua nuu vitiviti atu te mau melo no ta’na mataeinaa i te mau faanahoraa fifi hau atu i te fifi no te reo.

No to’na mauruuru ore i to’na taere i te parau i te reo, ua titau Elder Cook i te tautururaa a te ra‘i na roto i te hoê haamaitairaa autahu‘araa e te pure. I muri a‘e ihoa râ i te hoê pure u‘ana, ua haamana‘o Elder Cook i te fariiraa i te hoê pahonoraa papû: aita te Fatu i pii ia’na ia ite maitai i te reo Purutia ia tavini râ ma to’na aau, mana‘o e puai atoa.

« Ua mana‘o ‘oi‘oi au, ‘E nehenehe ta’u ia na reira », ua parau maira Elder Cook, tei piihia iho nei ei melo no te Pŭpŭ Matamua no te Hitu Ahuru. « ‘E nehenehe ta’u e tavini ma to’u aau, mana‘o e puai atoa.’ Ua ti‘a mai au e ua ore to’u taiâ. Ua taui ta‘ue noa ta’u raau faito mai nahea to to’u hoa e te mau melo no to’u mataeinaa raveraa i te ohipa i te huru o to te Fatu mana‘oraa no ni‘a i ta’u ohipa ra.

Noa’tu e ua parau Elder Cook e aita oia i haapii ‘oi‘oi atu i te reo i muri a‘e i taua ohipa tei tupu ia’na, aita râ oia i taiâ faahou no te mea ua ite oia e te mea ta’na e rave ra o te mea ïa ta te Fatu i hinaaro ia’na ia rave. Ua parau oia e ua riro taua haapiiraa ra ei mea faufaa rahi roa i roto i te mau piiraa atoa ta’na i mau mai taua taime ra, e episekopô, tauturu i roto i te hoê peresideniraa tĭtĭ, peresideni tĭtĭ, peresideni no te Misioni no Niu Terani Auckland, Hitu Ahuru Area, e i teie nei i roto i to’na piiraa apî.

Ua noaa ia Elder Cook te hoê parau tu‘ite no te pae faarava’iraa faufaa no te Fare Haapiiraa Teitei no Weber e te hoê parau tui’te i roto i te faanahoraa ohipa faarava’iraa faufaa na te Fare Haapiiraa Teitei no Utah State. Ua rave oia i te ohipa i roto i te ohipa hooraa fenua.

Ua fanauhia Elder Cook i Ogden, Utaha, Mau Hau Amui no Marite i te ava‘e Atopa 1957 i te metua vahine Ramona Cook Barker e i te metua tane Bert E. Cook tei pohe. Ua faaipoipo oia ia Lynette Hansen i te 14 no Ditema 1979 i roto i te Hiero no Ogden Utaha. E metua raua no na tamarii e pae.