Ia rave i te amuiraa ei tuhaa no to tatou oraraa.

A haaman‘o i te faaohipa i te tahi o teie mau ohipa e mau uiraa ei haamataraa no te aparauraa utuafara e aore râ, no te taata iho ta outou e rave, ma te feruri i te mau haapiiraa o te amuiraa rahi e tuhaa no to outou oraraa.

E nehenehe outou e farii i te mau a‘oraa atoa o te amuiraa rahi i ni‘a i te reni conference.lds.org.

Nota : Te numera o te api i raro nei e faaite ia i te api matamua o te a‘oraa i parauhia.

Na te mau tamarii

Ua faaara te peresideni Thomas S. Monson e e patu te Ekalesia e toru hiero apî, o te horo‘a mai te numera taatoa o te mau hiero e ohipa nei, te hamanihia ra, e aore râ i faaarahia mai e 160. A hi‘o i te hoê hoho‘a o te fenua a imi Meridian, Idaho, USA ; Fort Collins, Colorado, USA ; Manitoba, Canada ; e te hiero piri i to outou vahi faaearaa. A tai‘o e aore râ a faati‘a i te mau aamu ta te peresideni Monson i parau no te mau melo haapa‘o o tei faatusia rahi no te haere i te hiero (api 90) A rave i te faaotiraa ia haere i te hiero e ti‘a ai ia outou e haere, e aore râ a aparau i te mau rave‘a no te faaea ti‘amâ noa no te tomo i roto i te hiero.
A ora ai Adamu e o Eva i ni‘a i te fenua nei, hoê o te mau rave‘a no te haamoriraa i te Metua i te Ao ra mea na roto i te faatusiaraa i te mau animala. Ua haapii mai o Elder L. Tom Perry e ua faaite te Faaora i te oro‘a i Ta’na mau pĭpĭ i te mahana sabati ei hoê huru haamoriraa apî. Te tamau noa nei tatou i te haamori na roto i te amuraa i te oro‘a i te sabati. A hi‘o faahou i te a‘oraa a Elder Perry (api 6) e te utuafare no te haapii mai no ni‘a i te ahuraa i te mahana sabati e te tahi atu mau rave‘a no te faatura i te oro‘a e te sabati.
Ua haapii mai o Elder D. Todd Christofferson e ua haapii mai Iesu Mesia ia tatou e mea ti‘a ia tatou ia riro mai Ia’na ra e to tatou Metua i te Ao ra te huru (api 97) I te tahi taime e « papa‘i » to tatou Metua i te Ao ra i Ta’na mau tamarii no te tauturu ia tatou i riro mai Ia’na ra te huru. A aparau te auraa no te papa‘i A tai‘o e aore râ a faati‘a i te aamu o te tumu vine. A aparau e nahea te hoê taupupuraa e aore râ te hoê manuïa-ore-raa i te tauturu-mau-raa ia outou ia riro ei mea puai atu â e te hotu maitai.
Ua haapii mai o Elder Richard J. Maynes e ua riro te mau utuafare mai te mau taura (api 37) E rave rahi to te hoê taura mau anave e mea paruparu ra o ratou ana‘e iho, e puai mai ratou mai te mea e firi-amui-hia te reira. Mai te reira atoa, ia rave te mau melo atoa o te utuafare i te mea maitai e ia tauturu te tahi i te tahi, e haapuaihia te taata tata‘itahi i roto i te utuafare e e rave hau atu oia i te rave ona ana‘e. A horo‘a i te melo tata‘itahi o te utuafare i te hoê anave taura e aore râ hetehete. A aparau i ni‘a i te mau rave‘a ta te melo tata‘itahi o te utuafare e tavini e e haapuai i te tahi atu mau melo. I muri iho a hi‘o te puai o te mau anave o te taura e aore râ o te hetehete ia amuihia ratou.

Na te feia apî

E mea tahoê mau anei ta outou piha e aore râ pŭpŭ ? I muri a‘e i te hi‘o-faahou-raa i te a‘oraa a te peresideni Henry B. Eyring no ni‘a i te hoêraa (api 62) a hamani i te hoê tapura no te mea ta outou e nehenehe e rave no te faatahoêraa i ta outou pŭpŭ.
Ua parau o Elder Russell M. Nelson no ni‘a i te haapa‘oraa « mai tei au i roto i te fare tamaaraa » (api 34) A aparau e to outou utuafare, te piha e aore râ te pŭpŭ eaha te auraa o te reira e no te aha aita te reira e tupu maitai.
Ua faahoho‘a o Elder M. Russell Ballard i te here mau o te Mesia mai te hoê here ohipa (api 46) o tei faaitehia i roto i te mau ohipa ohie o te hamani maitai e te taviniraa. A faanaho e ta outou piha e aore râ pŭpŭ i te hoê rave‘a no te faaite i te here ia vetahi ê i roto i ta outou paroita, amaa, e aore râ te oire e i muri iho e faatupu i ta outou opuaraa.
Ua faati‘a o Elder Quentin L. Cook i te aamu no te hoê pute tei itehia i muri a‘e i te oriraa a te feia apî (api 18) Te mea tei itehia e te feia faatere i roto i te pute ua riro ei parau faahiahia no te tamahine apî e na’na te reira pute. Eaha te mau mea e vai ra i roto i ta outou pute, te pute moni, e aore râ pute haapiiraa e parau ra no ni‘a ia outou, e eaha te mau tauiraa ta outou e hinaaro e rave i roto i te mau mea ta outou e tape‘a i piha‘iho ia outou ?
Ua parau o Elder Lynn G. Robbins no ni‘a i te riro-hau-raa’tu mai te Faaora (api 103) A feruri i te auraa mau te riroraa mai ia Iesu Mesia hau atu i te raveraa i te mea Ta’na i ani mai. No reira a feruri no te mau tauiraa ta outou e rave i roto i to outou oraraa no te riro-hau-raa’tu mai te Faaora.

Na te feia paari

Ua faaite mai te peresideni Dieter F. Uchtdorf (api 58) i te hoê aamu no te hoê taata tei ora i raro mai i to’na mau maitai, ua ere oia i ni‘a i te mau faaanaanataeraa, te mau maa maitai i pûpûhia i ni‘a i te pahi rahi no te mea aita oia ite e teie mau mea atoa tei roto i te moni o ta’na titeti. A aparau e te mau melo o te utuafare e mau nei i te autahu‘araa i te mau rave‘a ta ratou e ora nei ia au i te faito o to ratou « mau maitai i roto i te parau no te mana mo‘a, te mau horo‘a, e te mau haamaitairaa i faataahia no [ratou], [ratou] tei mau i te autahu‘araa o te Atua ?
Ua haapii mai o te peresideni Boyd K. Packer no ni‘a i te mana no te faaoreraa hapa (api 30) Te vai ra anei te feia ta outou e hinaaro i te faaore i te hapa, e aore râ te vai ra anei te mau iteraa fifi ta outou e hinaaro e « ia vaiihohia i te hiti ? » A imi i te tauturu a ta Fatu na roto i te iteraa i te hau e te mana no te faaoreraa i te hapa.
Ua faati‘a o Elder Richard G. Scott e nahea to’na e ta’na vahine o Jeanene, i te faaiteraa i te here na roto i te papa‘iraa i te mau irava na te tahi e te tahi (api 94). A feruri i te papa‘i i te hoê irava e parau ra e ua here outou e te mauruuru nei outou i to outou hoa faaipoipo. A tuu i te vahi i reira to outou hoa faaipoipo e ite ai te reira.
Ua faahiti o Elder David A. Bednar i te iteraa o te peresideni Joseph F. Smith i te fariiraa i te hoê iteraa papû (api 87) A hi‘opo‘a maite i teie aamu e a feruri eaha te mau iteraa rau tei faauru i to outou iteraa papû.

Ljubljana, Slovenia

Coatzacoalcos, Mehiko