Ua faahanaha te Feia Faatere i te Faanahoraa Totauturu, e ua faaite i te mau Hiero apî

Hau atu i te 100.000 taata tei tae atu i na tuhaa e pae no te 181raa o te Amuiraa Rahi Matahiti a te Ekalesia a Iesu Mesia i te Feia Mo‘a i te mau Mahana Hopea nei i roto i te Pû Amuiraa i te Oire no Salt Lake City, Utaha, Mau Hau Amui no Marite, e e rave rahi mau milioni tei mata‘ita’i aore râ tei faaroo na roto i te mau haaparareraa a te Afata Teata, te ratio, te pee‘utari e te Itenati.

Ua faaroo te mau melo na te ao atoa i te amuiraa na roto e 93 reo. Tei ni‘a a‘ena te mau haapurororaa parau e te video na roto i te mau reo e rave rahi i te conference.lds.org e e haruharuhia te reira i roto i te DVD e te CD.

Ua iriti te Peresideni Thomas S. Monson i te amuiraa ma te faaite i te mau vahi ti‘araa o na hiero apî e toru—Fort Collins, Colorado, Mau Hau Amui no Marite; Meridian, Idaho, Mau Hau Amui no Marite; e Winnipeg, Manitoba, Canada—na te reira e faatae te rahiraa o te mau hiero tei faaitehia aore râ o te patuhia ra i te numera 26. Te vai nei e 134 hiero e faaohipa nei.

Ua haapuai atoa te Peresideni Monson i te faufaa rahi no te ohipa misionare, i te na-ô-raa e, « Te ohipa misionare o te toto ora ïa no te basileia ». Tau 52.000 misionare o te tavini nei i roto e 340 misioni na te ao atoa.

I te avatea Mahana Maa, 10 Hui Mana Faatere e 4 Hitu Ahuru Area apî tei paturuhia, e e 34 Hitu Ahuru Area tei haamauruuruhia. Ua pii-atoa-hia o Elder Don R. Clarke no te Piti o te Pŭpŭ Hitu Ahuru ia tavini i roto i te Pŭpŭ Matamua no te Hitu Ahuru. Ua faaite mai te Parau Faataaraa no te matahiti 2010 e ua roaahia te faito 14 milioni melo no te Ekalesia i teie nei.

E rave rahi mau a‘oraa tei horo‘ahia i roto i na mahana e piti no te amuiraa tei faatumuhia i ni‘a i te parau no te ohipa Totauturu a te Ekalesia e te faanahoraa Totauturu taa ê a te Ekalesia o tei faahanahana i to’na 75 matahiti i te matahiti 2011.

I te mahana Maa, ua faaite te Peresideni Henry B. Eyring, Tauturu Hoê i roto i te Peresideniraa Matamua, e no te faahaamana‘o i te 75 matahiti o te faanahoraa totauturu, e anihia ïa te mau melo na te ao taatoa nei ia rave i te hoê mahana taviniraa. E faatupuhia ïa te mahana taviniraa i roto i te paroita aore râ te tĭtĭ i te tahi taime i roto i te matahiti. E ti‘a i te feia faatere ia faanaho i te mau opuaraa, e e faaitoitohia te mau melo ia ani i te tahi atu mau taata ia haere mai i roto i te taviniraa.

Ua opani te Peresideni Monson i te amuiraa na roto i to’na iteraa papû no te Mesia : « I te taime hope‘a, ua nehenehe ia [Iesu Mesia] i te fariu i muri. Aita râ oia i na reira. Ua pou râ Oia i raro a‘e i te mau mea atoa ra ia ti‘a Ia’na ia faaora i te mau mea atoa ra. Ua horo‘a mai Oia i te ora ia tatou nei i muri a‘e i teie oraraa tahuti ».

I ni‘a: Te pafa‘i ra te hoê taure‘are‘a tane i te vine i te ô vine a te Ekalesia i Madera, California, Mau Hau Amui no Marite, o te horo‘a i te mau vine no te faanahoraa totauturu a te Ekalesia. I raro i te pae aui: Te mata‘ita‘i ra te hoê utuafare i te haapurororaa pee‘utari no te amuiraa rahi i Coimbra, Potutara.