Elder W. Christopher Waddell
No te Hitu Ahuru
Te hoê ture arata‘i papa‘i-ore-hia i vai noa na i roto i te utuafare o Elder Wayne Christopher Waddell o te « Ti‘aturi ïa i te Fatu ».
« Ia ti‘aturi ana‘e outou i te Fatu, eita ïa outou e haape‘ape‘a no ni‘a i te mau tauiraa rahi », te parau ra o Elder Waddell no ni‘a i te mau tauiraa i roto i te oraraa. « Ua ite tatou e te haapa‘o nei Oia i te mea maitai no tatou, e e haamaitaihia ïa tatou. »
Ua fanauhia o Elder Waddell i te ava‘e Tiunu 1959 i Manhatta Beach, California, Mau Hau Amui no Marite, e e tamaiti oia na Wayne e Joann Waddell. Ua farii oia i te parau tu‘ite i roto i te Aamu i te Fare Haapiiraa Teitei no San Diego State i reira to’na ha‘utiraa i te pa‘i popo. Ua rave oia i te ohipa i roto i te mau ti‘araa e rave rahi i roto i te hoê taiete faatupuraa ohipa.
Ua faaipoipo o Elder Waddell ia Carol Stansel i te 7 no Tiunu 1984 i roto i te Hiero no Los Angeles California. E maha ta raua mau tamarii. E mea faufaa rahi roa te tahoêraa i roto i te utuafare Waddell. Te tumu no taua tahoêraa ra no to ratou ïa tautooraa i te pee i te evanelia a te Faaora i roto i to ratou utuafare. E mea faufaa rahi roa te mau faaoaoaraa utuafare, te haere-amui-raa i te pae tatahi i piha‘i iho i to ratou fare e te haereraa ei utuafare i te mau ha‘utiraa tu‘aro
Hou to’na piiraahia i roto i te Pŭpŭ Matamua no te Hitu Ahuru, ua tavini o Elder Waddell ei misionare rave tamau i te Fenua Paniora, ei episekopo, melo no te apooraa teitei, tauturu no te peresideni misioni, peresideni tĭtĭ, peresideni no te Misioni no Barcelona Fenua Paniora, e Hitu Ahuru Area.
Ua parau Elder Waddell e na te hoê ohipa tei tupu e patu i ni‘a i te tahi e e tamau noa te reira i te amui atu i te « tao‘a rahi no te iteraa papû » ta’na e turu‘i atu no te faaruru i te mau tamataraa i roto i te oraraa.
No te faaineineraa no to’na piiraa apî, ua parau Elder Waddell no ni‘a i te hiero.
« Eaha tei faaineine ia tatou no teie ? « I to matou haereraa i te hiero no te taime matamua e i to tatou raveraa i te mau fafauraa, ua tapu tatou ia ineine i te rave i te mau mea atoa ta te Fatu e ani ia tatou, noa’tu e ere i te mea au maitai », o ta’na ïa i parau. « Te haereraa i te hiero, te taviniraa i te hoê misioni, te raveraa i te mau fafauraa, e i muri iho te iteraa i To’na rima e nahea oia i te faatere i te ohipa, o tera ana‘e ïa te mau mea ta outou e hinaaro. Aita tatou e rave nei i te tahi mea taa ê; te haapa‘o nei tatou i te mau fafauraa ta tatou i rave, mai te mau taata atoa ».