Elder Larry Y. Wilson
No te Hitu Ahuru
Ua riro te faaaifaitoraa i te mau titauraa a te ohipa, te Ekalesia, e te mau hopoi‘a utuafare e tamataraa na Elder Larry Young Wilson, ua haapapû râ oia e ua ite te mau melo no te utuafare e e mea faufaa rahi roa ratou no’na.
Ua parau Elder Wilson, « Te ohipa o tei haapii rahi mai ia‘u o te riroraa ïa ei tane faaipoipo e e metua tane ». « E mea varavara vau i te ma‘iri i te hoê ha‘utiraa a te hoê tamarii i roto i te tu‘aro, te upa aore râ te tahi ê atu ta‘urua. E tai‘o vau ia ratou te mau aamu i te taime taotoraa e e pure vau e ratou hou a faataoto atu ai ia ratou i te pô. E mea faufaa rahi roa ia ti‘atu i piha‘i iho ia ratou ».
Ua ite maitai o Elder Wilson i te mau titauraa e tuuhia i ni‘a i te hoê taata e ti‘araa arata‘i to’na i roto i te mau tufaa atoa no te oraraa nei. Ua fanauhia oia i te ava‘e Ditema 1949 i Salt Lake City, Utaha, Mau Hau Amui no Marite i na metua o George e Ida Wilson e ua paari oia i Pocatello, Idaho, Mau Hau Amui no Marite. Ua farii oia i te parau tu‘ite no te reo Marite e te Papa‘iraa Marite i te Fare Haapiiraa Teitei no Harvard, e i muri iho te hoê parau tu‘ite teitei a‘e i roto i te faatereraa o te mau ohipa tereraa faufaa i te Fare Haapiiraa Teitei no Stanford.
Ua rave o Elder Wilson i te ohipa ei taata tauturu e e faatere i roto i te ohipa no te ea. Noa’tu e mea ohipa roa oia, ua haapapû Elder Wilson e eita to’na toro‘a ohipa e faatere i to’na oraraa.
Ua parau oia « E ti‘a ia oe ia haamau i te mau oti‘a haati i to oe oraraa ohipa ». « Aita ana‘e, e horomii te reira i te mau mea ê atoa. Oia hoi, e ti‘a i te ohipa, te Ekalesia, e te taime no te utuafare ia tia’i i to ratou taime. A pure ia arataihia oe e e ite ïa oe eaha te na mua roa i te hoê mahana tata‘itahi ».
Ua tavini itoito o Elder Wilson ei misionare i roto i te Misioni no Berezilia Ropu e ei episekopo, peresideni tĭtĭ, e Hitu Ahuru Area hou a piihia’i i roto i te Piti o te Pŭpŭ Hitu Ahuru.
No te tauturu ia Elder Wilson ia ite i taua aifaitoraa faufaa rahi i roto i te taatoaraa o ta’na taviniraa o ta’na ïa vahine faaipoipo, o Lunda Mackey Wilson, ta’na i faaipoipo i te 10 no Tiurai 1974 i te Hiero no Logan Utaha. E maha tamarii ta te mau Wilson i aupuru.
« I te mau taime atoa e haere au i te mau apooraa a te Ekalesia, e parau ïa ta’na vahine, ‘A haere ra e ta’u here’. A haere e tavini i te Fatu’, te pahonoraa ïa a Elder Wilson. « Te haapii ra oia i ta maua mau tamarii i te auraa hohonu a‘e o ta’u taviniraa. Na mua roa hou a parau ai ratou e, « A haere ra, e Papa. A haere e tavini i te Fatu ! »