Pōpoaki ʻa e Faiako ʻAʻahí
Ko ha Kautaha ʻo ha Houʻeiki Fafine Anga Māʻoniʻoni
Ako ʻa e fakamatala ko ʻení, pea ka feʻunga, aleaʻi ia mo e houʻeiki fafine ʻokú ke ʻaʻahi ki aí. Fakaʻaongaʻi ʻa e ngaahi fehuʻí ke tokoni ʻi hoʻo fakamālohia ʻa e kau fafiné pea ʻai ke hoko ʻa e Fineʻofá ko e konga maʻu pē ia hoʻo moʻui fakafoʻituituí.
Tuí • Fāmilí • Fakafiemālié
Ne akonaki ʻa ʻIlisa R. Sinou, ko e palesiteni lahi hono ua ʻo e Fineʻofá, ʻo pehē: “Naʻe lau ʻa e ʻAposetolo ko Paulá ʻi he kuonga muʻá ʻo kau ki he houʻeiki fafine anga māʻoniʻoní. Ko e fatongia ia ʻo kitautolu takitaha ke tau hoko ko ha fefine anga māʻoniʻoni. ʻE māʻolunga ʻetau ngaahi taumuʻá kapau ko ha kau fafine anga māʻoniʻoni kitautolu. Te tau ongoʻi ʻoku uiuiʻi kitautolu ke fakahoko ha ngaahi fatongia mahuʻinga. ʻOku ʻikai hao ha taha mei ai. ʻOku ʻikai ha fefine ia ʻe pehē ʻoku fuʻu nofo mamaʻo, pea fuʻu siʻisiʻi hono ʻātakaí te ne taʻe lava ke fakahoko ha meʻa ke langa hake ai ʻa e Puleʻanga ʻo e ʻOtuá ʻi he māmaní.1
Siʻi Ngaahi Tokoua, ʻoku ʻikai ke tau tuēnoa pe siʻisiʻi hotau ʻātakaí. ʻI heʻetau tali ʻa e meʻaʻofa ko ia ko e ngāue mālohi ʻi he Fineʻofá, ʻoku tau hoko ai ko ha konga ʻo e meʻa naʻe fakamatalaʻi ʻe he Palōfita ko Siosefá ʻo pehē ko ha kautaha ʻoku ʻʻfakamavaheʻi mei he ngaahi kovi ʻo māmaní—ʻo makehe, anga maʻa mo anga māʻoniʻoni.”2
ʻOku tokoniʻi kitautolu ʻe he kautahá ni ke fakamālohia ʻetau tuí mo tau tupulaki fakalaumālie ʻaki hono ʻomai moʻotautolu ha ngaahi faingamālie fakatakimuʻa, fai ha tokoni pea mo faiako. ʻOku toe tānaki mai ki heʻetau moʻuí ha ngaahi meʻa foʻou ʻi heʻetau fai ʻa e ngāue tokoní. ʻOku tau fakalakalaka fakalaumālie, pea tupulaki ʻetau ongoʻi ʻoku tau kaú, ʻiloʻi pe ko hai kitautolú, pea mo hotau mahuʻingá. ʻOku tau ʻiloʻi ai ko e taumuʻa fakalūkufua ʻo e palani ʻo e ongoongoleleí ke tau maʻu ha faingamālie ke aʻusia kakato ʻa e ngaahi meʻa ʻoku tau malavá.
ʻOku tokoni ʻa e Fineʻofá ke teuteuʻi kitautolu ke maʻu e ngaahi tāpuaki ʻo e temipalé, tauhi ʻa e ngaahi fuakava ʻoku tau faí, mo kau ʻi he ngāue ʻo Saioné. ʻOku tokoniʻi kitautolu ʻe he Fineʻofá ke fakatupulaki ʻetau tuí mo e anga māʻoniʻoni fakatāutahá, fakamālohia e ngaahi fāmilí, mo kumi pea tokoniʻi ʻa kinautolu ʻoku faingataʻaʻiá.
Ko e ngāue māʻoniʻoni ʻoku fai ʻe he Fineʻofá, pea ʻoku hanga ʻe hono fai ʻo e ngāue māʻoniʻoní ʻo fakatupu ʻetau anga māʻoniʻoní.
Silvia H. Allred, tokoni ʻuluaki ʻi he kau palesitenisī lahi ʻo e Fineʻofá.
Mei he Folofolá
ʻEkesōtosi 19:5; Saame 24:3–4; 1 Tesalonaika 4:7; Taitusi 2:3–4; Tokāteline mo e Ngaahi Fuakava 38:24; 46:33; 82:14; 87:8; Mōsese 7:18
Mei Hotau Hisitōliá
Naʻe fakamamafaʻi ʻe he Palōfita ko Siosefá ʻa e anga māʻoniʻoní ʻi haʻane lea ki he Kautaha Fineʻofa ʻo Nāvuú, ʻo ne pehē ʻe ʻilonga ʻa e ivi tākiekina lelei ʻo e houʻeiki fafiné ʻi māmani ʻi heʻenau hoko ʻo maʻa mo anga māʻoniʻoní. Naʻá ne fakamatala ange: “Ko e angamaluú, ʻofá mo e haohaoá—ko e ngaahi meʻa ʻeni ʻoku totonu ke [nau fakamāmaʻi kimoutolú]. … ʻE maʻu ʻe he Kautahá ni ʻa e mālohi ke tuʻutuʻuni ki he ngaahi kuini ʻi honau lotolotongá. … ʻE haʻu ʻa e ngaahi tuʻi mo e ngaahi kuini ʻo māmaní ki Saione, ʻo fakahā ʻenau fakaʻapaʻapá. Naʻe talaʻofa ʻe Siosefa ki he kau fafiné ʻe ʻikai ngata pē ʻi hono fakaʻapaʻapaʻi ʻe he kakai anga fakaʻeiʻeikí ʻa e kau Fineʻofa ʻoku tauhi ʻenau ngaahi fuakavá, ka “kapau te mou moʻui fakatatau mo e ngaahi faingamālié ni, he ʻikai lava ke taʻofi ʻa e kau ʻāngeló mei heʻenau hoko ko [hamou] takaua.”3
ʻOku fakamāʻoniʻoniʻi fakatāutaha e houʻeiki fafiné ʻi heʻenau ngāue tokoni mo fakahaofi e niʻihi kehé. Naʻe vahevahe ʻe Lusi Meki Sāmita, ko e faʻē ʻa e Palōfitá, ʻa e lelei ʻe lava ke fakahoko ʻe he Fineʻofá: “Kuo pau ke tau fefakahoungaʻiʻaki, [fetauhiʻaki], fefakafiemālieʻaki mo maʻu ha fakahinohino, ka tau lava ʻo nofo fakataha ʻi he langí.”4
Tā fakatātaaʻi ʻo e ʻatá ʻe Christina Smith