Hivá ʻi Singapoa
Naʻe ako e toʻu tupu ʻo e Siteiki Singapoá ki he ngaahi tāpuaki ʻo e feilaulaú mo e ngāue mālohí ʻi hano teuteuʻi ha polokalama hiva.
ʻI he taimi naʻe tatangi ai e uasí he 5:00 pongipongí, naʻe tuʻu leva ʻa Ī Mani Limi ʻo teuteu. Naʻá ne mavahe mei ʻapi ki he seminelí he 5:20. ʻI he 6:30 naʻá ne fakavave atu ai ki he akó, ʻo nofo ai ki he 7:00 efiafí he ngaahi kalasí mo e ngaahi ʻekitivitī kehekehe. Pea fakavave mai leva he pasí ki he siteiki senitaá ke ako e polokalama hiva ʻa e siteikí.
Ko e taimi tēpile anga maheni fakaʻaho ia ʻa e toʻu tupu tokolahi ʻo e Siteiki Singapoá he Falaite kotoa pē he māhina ʻe nima. Taimi ʻe niʻihi ʻoku hoko e heleʻiá mo e ongosiá, ka ʻi he kotoa e teuteu e polokalama hiva, Ko e Taimi ʻoku Lea ai ha Palōfitá, naʻe ʻikai ha lāunga ia pe loto mamahi, koeʻuhí he naʻe ongoʻi ʻe he toʻu tupú ʻoku mahuʻinga e feilaulau naʻa nau faí. Naʻe pehē ʻe Ī Muni ʻo e Uooti Singapoa Uá, “Ko e meʻa fakaofo, fakaʻofoʻofa, tupulaki fakalaumālie, fonu-fiefia, mo fakalotomāfana taha ʻeni kuó u kau ki aí.”
Founga Hono Kamatá
Naʻe pehē ʻe Keiti Loleto, ko e palesiteni ʻo e Kau Finemui he siteikí, “Ko ʻemau tefitoʻi taumuʻá ke fakatahatahaʻi ʻa e toʻu tupú.” “ʻOku haʻu e toʻu tupú mei he uooti kehekehe ʻe valu pea kehekehe mo honau puipuituʻa fakafonuá. ʻOku faingataʻa ke nau feohi mo e niʻihi kehé. Ko ia naʻa mau fakakaukau, ʻikai ʻoku sai ke ʻai ha polokalama hiva ke fakatahatahaʻi mai ai kinautolu?”
Naʻe fili ʻe he kau takí e mūsika ʻoku fakatefito he ngaahi akonaki ʻa Palesiteni Kōtoni B. Hingikelií (1910–2008).1 Naʻe pehē ʻe Koni Ū ko e talēkita lahi ʻo e polokalama hivá, naʻe fili ʻa e mūsika ko ʻení “koeʻuhí ke tō-kakano e lea ʻo e ngaahi hivá ʻi he loto ʻo e toʻu tupú, ʻo nau ongoʻi e Laumālié, pea moʻui ʻaki e ngaahi tuʻunga moʻuí.” Naʻe pehē ʻe Sisitā Ū, “Naʻa mau loto ke kau mai ʻa e tokolahi taha ʻo e toʻu tupú.” Naʻe kau fakakātoa mai e toʻu tupu ʻe toko 78.
Mahalo naʻe ʻikai ke haʻu kotoa e toʻu tupú mo ha taumuʻa tatau he kamataʻangá, ka naʻe hokohoko atu ʻenau haʻu ki he ako polokalamá he naʻa nau fiefia he fakakaungāmeʻá, hivá, kae tautefito ki he Laumālié.
Ko e Kau Ki aí
Hili hono fili e kaveingá pea fokotuʻutuʻu e ako polokalamá, naʻe vahe leva e toʻu tupú ki he ngaahi konga kehekehe pea mo e kōmiti kehekehe naʻe feʻunga mo honau talēnití.
Naʻe loto ʻa ʻAlai Seni, taʻu 18 mei he Uooti Singapoa Uá ke tokoni he kōmiti ʻoku nau ʻai e teungá. Naʻá ne pehē, “Naʻa mau fili e vala ʻoku taau, ʻa ia naʻe fuʻu mahuʻinga ia, pea maʻamaʻa, ngali mo e toʻu tupú, pea ke hā matamatalelei he siteisí.” Naʻe ʻikai ngata pē heʻene ako ki hono fakahoko ha fili ʻoku fakatefito he ngaahi tuʻunga moʻui ʻo e ongoongoleleí pea ngāue mo e niʻihi kehé, ka naʻe toe fiefia foki he anga e fotu ʻa e toʻu tupú.
Naʻe fili ʻa Kaniteni Pitasoni, taʻu 15, ʻo e Uooti Singapoa ʻUluakí ko e palesiteni ia ʻo e kuaeá ke fakapapauʻi ʻoku lele lelei ʻa e ako faiva kotoa pē. Naʻe kau heʻene ngāué hono vahe e lotú, fokotuʻutuʻu mo fakatahatahaʻi e toʻu tupú ki he ako polokalamá mo e vaʻingá, pea tala mo honau nofoʻanga he siteisí. Naʻá ne pehē, “Naʻe toe kole mai foki ke u kumi ha kau talavou ke fokotuʻu mo tukuhifo ʻa e ngaahi meʻa ngāué pea tokangaʻi ke fakahoko ʻe he toʻu tupú honau fatongiá. Naʻá ku ongoʻi ʻoku sai e ngāué ni ki he toʻu tupú. ʻOku ou ʻamanaki naʻe tokoni kiate kinautolu ke mahino ʻoku ui ʻe he ʻEikí ha kau taki he taimí ni, ʻo ʻikai mei he kakai lalahí pē. ʻOku nau lava pea ʻoku totonu ke nau poupouʻi honau kau takí ʻo tatau ai pē pe ko e hā honau taʻu motuʻá pe ko ʻenau tuʻunga taukeí.”
Naʻe fua ʻe Keniteisi Limi, taʻu 18, ʻo e Uooti Utilení e ngaahi fatongia kehekehe, kau ai ʻene mēmipa he kōmiti ki he teungá, kōmiti fakahaká, kōmiti faitaá, pea toe hivaʻi ha foʻi solo. Ko ʻene lea ʻeni fekauʻaki mo e ngaahi fatongia naʻa ne maʻú, “Naʻe tokoni mai ʻeku faʻeé ke u fakahoko e ngaahi ngāué ni. Naʻá ne akoʻi au ka ʻi ai ha faingamālie ke ngāue, pea fai ia. Kapau te ke tali e ngāué pea fai ho lelei tahá, ʻe tokoniʻi koe ʻe he ʻEikí ke ikunaʻi ha faʻahinga faingataʻa pē te ke fetaulaki mo ia.”
Makehe mei he fatongia fakapule ko ʻení, naʻe toe fie maʻu mo ha kau faiva. Naʻe loto lahi ʻa Sione Lī, taʻu 17, ʻo e Uooti Kelemenitī ke ne hiva tokotaha pē. Naʻe mahinongofua pē ʻene ʻuhingá: “ʻOku ou saiʻia pē au he hivá! He ʻoku ne ʻai ke u ongoʻi ʻoku ou makehe.”
Naʻe ongoʻi ʻe ʻĒsela Tatina, taʻu 17, ʻo e Uooti Utilení he ʻikai ke ne lava ʻo hiva, pea naʻe tokoni leva ia he tafaʻaki ʻe taha. Naʻá ne pehē, “Ne u loto ke u kau, pea ko au ʻoku ou fakamatalaʻi ʻa e konga fekauʻaki mo e kau ʻi he meʻa ʻoku faí. ʻOku ou ongoʻi ʻa e pōpoakí he ʻoku ou ʻilo ʻoku moʻoni ia.”
ʻIkai ko ha Feilaulau Siʻisiʻi
Naʻe lele ʻa e ako faivá mei Nōvema 2009 ki Māʻasi 2010. Lolotonga e taimi ko ʻení, naʻe fakataha mai e toʻu tupú he pō Falaite kotoa ki he siteiki senitaá ʻo ako faiva ai, tuku kehe e ngaahi ʻaho mālōloó. Naʻe ʻikai ko ha feilaulau siʻisiʻi ʻa e taimi mo e meʻa naʻe fie maʻu mei he toʻu tupú, tautefito ki he taimi femoʻuekina ʻoku angamaheni ki ai e toʻu tupu ʻo Singapoá.
Naʻe fili ʻa ʻOlivia Hoi ko ha taʻahine ako taʻu ʻuluaki he kolisí mei he Uooti Petokí ke kaú koeʻuhí “he ʻoku tatau ai pē pe ko e hā e lahi ʻo e faingataʻa te u fepaki mo iá, ka ʻi he ʻosi ʻa e ʻahó, ko e ongoongoleleí ʻokú ne tokoniʻi ke u kātakí pea fakahaofi au mei he ngaahi faingataʻá. ʻI hono ʻiloʻi ko ia ʻoku ʻi ai ha Taha ʻokú ne tokangaʻi mo ʻofa moʻoni ʻiate aú ʻokú ne ʻomi ai ʻa e nonga moʻoni, pea ʻoku ou pehē ʻoku feʻunga ʻānoa ia ke u maʻu ai e loto-toʻa he ʻaho kotoa pē.”
Ko e tokolahi ʻo e toʻu tupú naʻe ʻi ai mo e ngaahi meʻa kehe ne nau moʻua ai, ka naʻa nau ʻilo naʻe ʻosi hanga ʻe he ʻEikí ʻo tofa mai ha hala. Ko e meʻa ia naʻe hoko kia ʻAmanitā Hoi ʻo e Uooti Singapoa Uá. Naʻá ne pehē, “Naʻe ʻi ai hoku taimi tauʻolunga, naʻe fepaki ia mo e ako faivá, ka naʻe hoko ha mana ʻo liliu ʻe he akó ʻenau taimi ako tauʻolunga, kau lava ʻo maʻu ha taimi ki he ako faivá.”
Ko e Taimi Fakaʻaliʻalí
Hili ha ngaahi māhina ʻo e ako faivá, kuo maau leva ʻa e faivá ke fai. Fakamālō ki he ngaahi feinga taʻehela ʻa e toʻu tupú, naʻe laka hake he kakai ʻe toko 700 naʻe ō mai ke sio he faivá ʻi hano fai tuʻo tolu. ʻI hono vahevahe mai ʻe he toʻu tupú ʻenau pōpoakí ʻi he hivá, hulohulá, ngaahi fasi tā ʻe he meʻaleá, mo ʻenau ngaahi fakamoʻoní, naʻe ongo ia ki he kau mamatá.
Naʻe toe fakatukupaaʻi e kulupú ke fakaafeʻi mai ha ngaahi kaungāmeʻa naʻe ʻikai siasi ke sio he faivá pea ʻai ia ko ha faingamālie ki he ngāue faifekaú. Naʻe tali fakamātoato ʻe Maikolo Lī taʻu 18, ʻa e tukupā ko ʻení. Naʻá ne pehē, “Naʻá ku fakaafeʻi haku kaungāmeʻa ʻe toko ono ke nau ō mai, pea haʻu haku kaungāako ʻe toko tolu mo ha faiako ʻe taha.” Naʻe ongo ʻaupito ʻenau faivá ki heʻene faiakó. “Naʻá ne pehē ko ha meʻa fakaʻofoʻofa ia naʻá ne aʻusiá. Naʻá ne kole ha tatau ʻo e tohi tufa Ki Hono Fakamālohia ʻo e Toʻu Tupú. Naʻá ne pehē naʻá ne ongoʻi e mālohi ʻo e loto fakatuʻamelie ʻa e toʻu tupú.”
Naʻe lava ke fakahoko e tefitoʻi taumuʻa ʻa e kau takí ki hono fakatahatahaʻi mai ʻo e toʻu tupú. Naʻe pehē ʻe Sisitā Ū, “ʻI heʻeku tangutu ʻo sio hake ki heʻenau faivá, naʻe fonu hoku lotó he fiefia.” “Naʻe ʻikai ʻuhinga ia ki he matamatalelei ʻenau fotu mai, pe ko e lelei ʻenau hivá mo hono fakatātaaʻí, pe ko e sai ʻenau lea naʻe faí. Naʻe ʻikai ko e ako pe fonua ne nau haʻu mei aí. Ka naʻa nau taha.”
Ko e Pōpoaki ʻi he Mūsiká
Naʻe tokoniʻi ʻe he faiva hivá ha tokolahi ke toe mālohi ange ʻenau fakamoʻoní. Naʻe pehē ʻe ha niʻihi naʻa nau ngūnguuʻi pē ʻa e hiva pea hivaʻi e lea ʻo e ngaahi hivá he feituʻu kotoa pē ne nau ʻi aí, pea tokoni e pōpoaki he ngaahi hivá ke nau matuʻuaki e ngaahi faingataʻa fakaʻahó. Ko e tokolahi ʻo kinautolu naʻe ʻikai ngata heʻenau hoko pē ko e ngaahi kaungāmeʻa leleí ka ne mau toe hoko ko ha poupou fakalaumālie ʻe lava ke nau felangaʻakihake ʻi he taimi ʻoku faingataʻa ai e fonongá. ʻOku lava ke nau fetokoniʻaki ke nofo he hala fāsiʻí pea tupulaki fakalaumālie.
ʻŪ faitā ʻa Daniel Soh
ʻAmanitā Hoi
ʻOlivia Hoi
Maikolo Lī
Ī Muni Limi
Kaniteni Pitasoni
Keniteisi Limi
ʻĒsela Tatina
ʻAlai Seni
Kelisi ʻOngi
Sione Lī