Tokoniʻi ʻaki ʻEne ʻOfá

Ī Kaiungu Kū, Kōlea

ʻI he taimi ne ui au ko e taki he ngaahi ʻekitivitī ʻa e fānau akó, naʻá ku ongoʻi faingataʻaʻia ʻaupito. Ko ha taha mā au pea ne u ʻiloʻi ʻe faingataʻa ke u palani ha ngaahi ʻekitivitī. Naʻe fuʻu lahi ʻeku ongoʻi taʻefeʻungá, ilifiá, mo e faingataʻaʻiá.

ʻI heʻeku fuʻu fie maʻu vivilí, ne u kole tokoni ki he Tamai Hēvaní. Naʻá ku lotu, “ʻE anga fēfē haʻaku fai ʻení? ʻOku ou kei siʻi mo vaivai.”

ʻI he taimi pē ko iá, ne ongo ki hoku lotó ha fanafana leʻo siʻi: “Fai ia, ʻe hoku ʻōfefine. ʻOku ou ʻofa ʻiate koe.”

Naʻe hanga ʻe he tali ko ia mei he Tamai ʻofá ʻo fakamālohia au. Naʻe fakamālohia au ʻe he ueʻi ko iá, peá u ongoʻi te u lava ke fai ha faʻahinga meʻa pē. Ko e meʻa pē naʻá ku fie maʻu ke fakahoko lelei ai hoku fatongiá, ko hono ʻiloʻi ʻokú Ne ʻafioʻi au, ʻokú Ne ʻofa ʻiate au, pea te Ne tokoniʻi au.

ʻOku ou ʻiloʻi ʻe tatau ai pē pe ko e hā hotau faingataʻaʻiá, ʻoku ʻofeina kitautolu ʻe he Tamai Hēvaní pea fanongo mai ki heʻetau ngaahi lotú. ʻI heʻetau kole kiate Iá, ʻe lava ke tau maʻu ha fakahinohino mo e fakalotolahi ʻi heʻetau feinga ke fakahoko hotau ngaahi fatongiá.