Ko e Meʻa ʻOku Tau Tui Ki Aí

NAʻE TUKU MAI Kitautolu ʻe he ʻOtuá ki he Māmaní ko ha Mēmipa ʻo ha Fāmili

ʻOku ʻi ai ha palani ʻa ʻetau Tamai Hēvaní maʻatautolu, pea ko e konga ʻo e palani ko iá hono ʻomi kitautolu ki māmani ko ha mēmipa ʻo ha fāmili. Ko ʻĀtama mo ʻIvi ʻa e fuofua fāmili he māmaní; naʻe fakatahaʻi kinaua ʻe he Tamai Hēvaní ʻi he mali pea fekauʻi ke na fanafanau (vakai, Sēnesi 1:28). Naʻe finangalo e ʻOtuá ke maʻu Heʻene fānau fakalaumālié ha sino. ʻI he taimi ʻoku ʻomi ai ʻe he mātuʻá e fānaú ki he māmaní, ʻoku nau tokoni ai ki he Tamai Hēvaní ʻi hono fakahoko ʻEne palani ʻo e fakamoʻuí. ʻOku talitali lelei ki honau fāmilí e fānau foʻou kotoa, ko ha fānau ʻa e ʻOtuá.

Naʻe ʻafioʻi heʻetau Tamai Hēvaní ko e hoko ko ia ko ha mēmipa ʻo ha fāmilí te tau lava ke maʻu ai e faingamālie lelei taha ke ʻofeina mo tokangaʻi kitautolu takitaha lolotonga ʻa ʻetau ʻi he māmaní. ʻOku ngāue fakataha e fāmilí ke ako e mapuleʻi kitá, feilaulaú, mateakí, mo e mahuʻinga ʻo e ngāué. ʻOku nau feinga foki ke ako ke ʻofa, ke vahevahe, pea ke fetauhiʻaki (vakai, Mōsaia 4:14–15). ʻOku ako ʻa e fānaú ke fakahā e ʻofa ki heʻenau mātuʻá, ʻo talangofua, pea feinga ke moʻui ʻaki e faʻahinga moʻui te ne ʻomai e lāngilangi ki he hingoa ʻo e fāmilí.

ʻI he fakalotolahi ʻa e kau mēmipa ʻo e fāmilí mo felangaʻakihaké, ʻe tupulaki leva e falalá mo e ʻofá. ʻOku fotu mai mei he ngaahi fāmili lavameʻá ʻa e ʻamanakí mo e vilitakí ʻi hono tokoniʻi takitaha e kau mēmipa ʻo e fāmilí ʻi heʻenau fie maʻu fakafoʻituituí pea fetokoniʻaki ke ako mo ngāue fakataha ʻi he ʻofá. Ko ʻenau taumuʻá ke hoko ko ha fāmili fiefia mo taʻengata.

Ko e ngaahi ʻekitivitī ʻeni ʻe tokoni ke tau maʻu ai ha ngaahi fāmili fiefia mo lavameʻa:

• Lotu fakataha ko e husepāniti mo e uaifi.

  Fai e lotu fakafāmilí he pongipongi mo e pō kotoa pē (vakai, 3 Nīfai 18:21).

  Akoʻi e ongoongoleleí ki he fānaú ʻi he uike takitaha he efiafi fakafāmili ʻi ʻapí.

  Ako fakafāmili maʻu pē ʻa e folofolá.

  ʻAlu ki he ngaahi fakatahaʻanga ʻa e Siasí he Sāpate kotoa (vakai, T&F 59:9–10).

  Ako ke angaʻofa, faʻa kātaki pea mo manavaʻofa (vakai, Molonai 7:45–48).

  Fai fakafāmili e meʻa kotoa, hangē ko e maʻu meʻatokoni efiafí, ngāue fakataha, ʻalu ʻo ʻeva, mo kau ʻi hono fili e ngaahi meʻa ke faí.

Ki ha fakamatala lahi ange, vakai, Ngaahi Tefitoʻi Moʻoni ʻo e Ongoongoleleí (2009), 243–48; mo e M. Russell Ballard, “Ko e Meʻa Mahuʻinga Tahá ʻA ia ʻOku Tolonga Tahá,” Liahona, Nōvema 2005, 41–44.

“Ko e mali ʻi ha vā ʻo ha tangata mo ha fefiné naʻe tuʻutuʻuni ia ʻe he ʻOtuá. … “Ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú” (“Ko e Fāmilí: Ko ha Fanongonongo Ki Māmani” Liahona, Nōvema 2010, 129.)

TĀ FAKATĀTAAʻI ʻO E ʻATÁ ʻE David Stoker, Craig Dimond, John Luke, Matthew Reier, Robert Casey, MO Frank Helmrich