Toʻu Tupú
Naʻe Fakahaofi Kimaua ʻe Heʻema Faʻeé
ʻI hoku taʻu onó, ne u sio mo hoku tehiná he vaʻinga pasiketipolo homa taʻoketé. Naʻe mavahe ʻema tangataʻeikí, peá ma loto ke ma foki mo ia ki ʻapi, ko ia ne ma lele mui atu ai he ʻuhá. ʻI he ʻikai ke ma ʻiloʻi iá ne ma foki leva ki he fale vaʻingá ke mau toki foki mo ʻema faʻeé, ka ʻi heʻema aʻu atu ki he fale vaʻingá, kuo ʻikai ke toe ʻi ai ha taha ai.
Ne u manatuʻi ʻeku tuʻu pē he veʻe matapaá, ʻo feinga ke ʻoua naʻá ma viku he ʻuhá, mo lotu ke haʻu ha taha. Peá u manatuʻi ʻeku fanongo ki hono haʻaki mai hono tāpuniʻi e matapā ʻemau veeni kulokulá, peá ma lele atu ki ai. Pea naʻe hoko e taha ʻo e ngaahi meʻa te u manatuʻi fuoloa taha mei heʻeku kei siʻí: ko hono puke atu kimaua ʻe heʻema faʻeé “ʻo hangē ko e tānaki fakataha ʻe he motuʻa moá ʻa hono ʻuhikí ʻi hono lalo kapakaú” (3 Nīfai 10:4). Naʻe fakahaofi kimaua ʻe heʻema faʻeé, pea naʻe teʻeki ai pē ha taimi ke u ongoʻi malu ai ʻo hangē ko e momeniti ko iá.
ʻI heʻeku fakakaukau ki heʻene tākiekina aú, ʻoku ou ʻilo naʻe tataki au ʻe he moʻui ʻeku faʻeé ki he Fakamoʻuí mo fakahā kiate au ʻa e ʻuhinga ʻo e “hiki hake ʻa e ngaahi nima ʻoku tautau ki laló, pea fakamālohi ʻa e ngaahi tui ʻoku vaivaí” (T&F 81:5). Naʻá ne fakafalala kia Sīsū Kalaisi, ke foaki kiate ia ha ivi ʻoku “ope atu ia ʻi [hono] iví” (“ʻEiki, te u Muimui Atu,” Ngaahi Himi, fika 127).