ʻOku Mau Lea ʻia Kalaisi
Ko e Toʻo kiate Au Hono Huafá
“ʻOku ʻikai ke ʻi ai mo ha toe huafa kehe kuo foaki ʻa ia ʻe maʻu ai ʻa e fakamoʻuí; ko ia, ʻoku ou fakaʻamu ke mou toʻo kiate kimoutolu ʻa e huafa ʻo Kalaisí” (Mōsaia 5:8).
Hili ha ngaahi uike siʻi ʻeku ngāue fakafaifekaú, ne kamata ke u ongoʻi taʻelata mo manatu ki ʻapi. Ne u saiʻia ke hoko ko ha faifekau, ka naʻe faingataʻa ange e ngāué ia he meʻa ne u ʻamanaki ki aí. Ne u taʻelata he ʻikai ke sio ki hoku ngaahi kaungāmeʻá, fāmilí, mo e ngaahi meʻa kotoa pē ʻi ʻapi ne u anga ki aí. Ka ʻi he lolotonga ʻeku ako fakatāutaha he pongipongi ʻe taha, ne u tangutu fakalongolongo pē, ʻo fulifulihi holo hoku pine faifekaú, mo fakakaukau ki heʻeku fakaʻamu ke sio ki ha meʻa ʻoku ou angamaheni ki aí. Ne u fakaʻamu ke fanongo ki hano ui mai au ʻe ha taha ʻaki hoku hingoa ʻuluakí.
ʻI heʻeku sio ki hoku piné, ne u fakatokangaʻi neongo ʻoku ʻikai ʻasi ai hoku hingoa ʻuluakí, ka ʻoku ʻi ai hoku hingoa fakafāmilí, hingoa ʻo e Siasí, pea mo e huafa ʻo e Fakamoʻuí. Ne fakafokifā e liliu ʻeku fakakaukaú mo ʻeku tōʻongá. Ne u ʻiloʻi naʻe ʻikai ke u fakafofongaʻi pē au heʻeku hoko ko e faifekaú. Ka naʻá ku ʻalú ke fakafofongaʻi hoku fāmilí, pea mahuʻinga tahá ke fakafofongaʻi hoku Fakamoʻuí pea mo Hono Siasí. Ne u ʻai e piné ki he kato hoku soté, ofi ki hoku mafú. ʻI heʻeku fai iá, ne u palōmesi ki hoku Fakamoʻuí te u fakaʻatā ha feituʻu lahi ange Maʻana ʻi hoku lotó mo e ʻatamaí.
Hili e pongipongi ko iá ne ʻikai ke u toe ongoʻi ʻa hono taʻeui ʻaki au hoku hingoa ʻuluakí. Pea kamata mei ai ʻeku ngāue mālohi ki he lelei taha ne u malavá, pea laukauʻaki he ʻaho kotoa pē hono tui hoku piné. ʻI he taimi kotoa pē ne u ongoʻi loto-foʻi aí, ne u sio ki hoku piné, peá ne fakamanatu mai hoku fatongia ke muimui ki he sīpinga ʻa Sīsū Kalaisí.
Ne u feinga ke toʻo kakato kiate au Hono huafá pea feinga ke hangē pē ko Iá. ʻI heʻeku fai iá, ne u ʻofa lahi ange ʻi hoku ngaahi hoá mo kinautolu ne mau ngāué, pea fakamālohia ʻeku fakamoʻoní, pea fiefia he ngāue fakafaifekaú. Ne u fakangaloki leva e ngaahi meʻa ne u fie maʻú kae tukutaha ʻeku tokangá he ngāue maʻá e ʻEikí.
Kuo ʻosi atu eni ha ngaahi taʻu lahi mei heʻeku ngāue fakafaifekaú, ka ʻoku ou kei maʻu pē ʻa e faingamālie ke toʻo kiate au ʻa e huafa ʻo e Fakamoʻuí. Ko hono moʻoní, ʻi heʻetau hoko ko e mēmipa ʻo e Siasí, ʻoku tau tukupā kotoa ke toʻo kiate kitautolu e huafa ʻo Kalaisí he Sāpate kotoa ʻi heʻetau maʻu e sākalamēnití. ʻI heʻetau fai iá, ʻoku tau palōmesi ai ke fakafofongaʻi hotau Fakamoʻuí ʻi he lelei taha te tau malavá pea feinga ke tau hangē ko Iá. Pea hangē ko e akonaki ʻa e Tuʻi ko Penisimaní: “ʻOku ou fakaʻamu ke mou toʻo kiate kimoutolu ʻa e huafa ʻo Kalaisí. … Pea ʻe hoko ʻo pehē ʻilonga ia ʻokú ne fai ʻení, te ne maʻu ha nofoʻanga ʻo e nāunau ʻi he nima toʻomataʻu ʻo e ʻOtuá, koeʻuhí he te ne ʻilo ʻa e hingoa ʻoku ui ʻaki iá; he ʻe ui ʻaki ia ʻa e huafa ʻo Kalaisí” (Mōsaia 5:8–9). ʻI heʻetau toʻo Hono huafá kiate kitautolú, ʻe lahi ange ʻetau ʻilo e taumuʻa mo e fiefia ʻi hotau ngaahi misiona he māmaní.
Naʻe kamata ʻe he Fakamoʻuí ʻa e sākalamēniti mo ʻEne kau ʻAposetoló. Naʻá Ne pakipaki ʻa e maá ʻo ʻoatu kiate kinautolu, mo Ne pehē, “Ko hoku sinó ʻeni, ʻa ia kuo foaki koeʻuhi ko kimoutolú: fai ʻeni ʻi he fakamanatu kiate au. Pea hili ʻa e ʻohomohé naʻe toʻo foki ʻe ia ʻa e ipú ʻo pehē, Ko e ipú ni ko e fuakava foʻou ʻi hoku totó, ʻa ia ʻoku lilingi koeʻuhí ko kimoutolu” (Luke 22:19–20).
ʻI he Manatu Kiate Au, tā ʻe Walter Rane, ʻi he angalelei ʻa e Musiume Hisitōlia ʻa e Siasí