ʻE Totonu Nai ke Ma Fakatau Atu Homau ʻApi Fakaʻofoʻofá?
Suliveni Lisiatesoni, Nevata, USA
ʻI he 1998 naʻe talamai ai ʻe he Laumālié ke fakatau atu homau ʻapi ne fakaʻamuá, ʻa ia naʻe ʻosi hono ngaohí pea mau hiki mai ki ai he taʻu pē ʻeni ʻe fā. ʻI he kamata ke ʻosi ʻema fānau lalahí mei he ako māʻolungá pea mavahe atu mei ʻapí, naʻe mahino ʻoku fuʻu lahi homau falé pea fuʻu lahi e fakamole ki hono tokangaʻí he meʻa te ma fie maʻú. Ne toki fetongi pē ʻeni ʻeku ngāué pea mahino ʻa e tuʻu laveangofua ʻeku maʻuʻanga paʻangá pea ʻe faingofua pē ke ʻi ai ha maumau ʻe hoko.
ʻI heʻeku ʻalu ki he fakataha ʻa e lakanga fakataulaʻeikí ʻi he konifelenisi lahí ʻi ʻOkatopá, naʻe ongo kiate au e ngaahi lea ʻa Palesiteni Kōtoni B. Hingikelií (1910–2008). ʻI heʻene lea kau ki he meʻa fakapaʻangá, naʻá ne tala ki he kau maʻu lakanga fakataulaʻeikí, “Kuo hokosia e taimi ke fakamaau ai hotau ngaahi falé.” Peá ne fakatokanga mai, “ʻOku ʻi ai ha ngaahi fakaʻilonga ki ha ngaahi matangi mālohi ʻoku hanga mai mei muʻa ʻa ia ʻoku totonu ke tau tokanga ki ai.”
ʻI he konga ki mui ʻene leá naʻá ne pehē: “ʻOku ou ʻiloʻi ʻe fie maʻu ke te nō ke fakatau hato ʻapi. Ka tau fakatau muʻa ʻa e ʻapi ko ia te tau lava ʻo totongi pea fakasiʻisiʻi ai ʻa e totongi ʻa ia [te tau mafasia ai ʻi ha taʻu ʻe 30 he ʻoku ʻikai ha manavaʻofa pe ha toloi ia ʻi he totongi noó.”]1
Naʻá ku tala ki hoku uaifí ʻa e faleʻi ʻa Palesiteni Hingikelií, peá u talaange ʻoku ou ongoʻi ʻoku totonu ke fakatau homau ʻapí. Naʻá ku ʻohovale heʻene loto ki aí.
ʻI he ngaahi māhina hokó, naʻá ma mateuteu ke fakatau atu homau falé pea toe kumi ha fale ʻe taha. Ko ha meʻa naʻe taimi lōloa pea pau ke fai ki ai ha lotu lahi mo ha ʻaukai fakafāmili. Hili ha taʻu ʻe taha, ne mau hiki ki homau ʻapi foʻoú, ʻa ia naʻe siʻisiʻi ange hono totongi fakamāhiná.
Naʻe fakamoʻoniʻi e ngaahi lea fakakikite ʻa Palesiteni Hingikelií. ʻI he taʻu hono hokó naʻe holo e mahuʻinga ʻo e māketi fefakatauʻakí ʻi ʻAmelika. Pea hokohoko mai ai ha ngaahi taʻu lahi ʻo e tō lalo fakapaʻangá, ʻa ia naʻá ma fakaʻaongaʻi lelei ia ki hono totongi homa moʻua he mōkesí.
ʻI he taimí ni ʻoku hoko ha tō lalo faka-ʻekonōmika foʻou ʻi he ngaahi fonua lahi ʻo e māmaní. ʻOku kei moʻoni pē ʻa e ngaahi lea ʻa Palesiteni Hingikelī he ʻaho ní ʻo hangē ko ia ʻi he 1998.
ʻOkú ma fiefia naʻá ma muimui ki he faleʻi ʻa e palōfitá pea mo e ueʻi ʻa e Laumālié. ʻOku ʻikai ke toe ʻi ai hama moʻua mōkesi, pea ʻokú ma fiefia ke sio ʻoku moʻui ʻema fānaú ʻo fakatatau ki he meʻa ʻoku nau maʻú.
ʻOkú ma vēkeveke ke aʻu ki he konifelenisi lahi kotoa pē ke fanongo ki he faleʻi ʻa e kau taki hotau Siasí. ʻOkú ma ʻiloʻi ʻe tāpuekina kitautolu kapau te tau talangofua ki heʻenau fakahinohinó.