Ko e Kau Paionia ʻo Onopōní
ʻOku akoʻi kitautolu ʻe he kau taki ʻo e Siasí kau ki he mahuʻinga ʻo e tokoni ʻoku tau fai he ʻaho ní.
Ko e Kau Paionia Kotoa Kitautolu
“Naʻe ʻikai kau ha taha ʻo ʻeku ngaahi kuí ʻi he kau paionia ʻo e senituli hongofulu mā hivá. Ka ko e talu mei he fuofua ʻaho ne u kau ai ki he Siasí mo ʻeku ongoʻi vāofi mo e kau paionia ko ia ne nau fononga mai he [ngaahi potu tokaleleí]. Ko ʻeku ngaahi kui fakalaumālie kinautolu, ʻo hangē pē ko e mēmipa takitaha ʻo e Siasí, ʻo tatau ai pē pe ko e hā ho tangataʻifonuá, lea fakafonuá pe tala fakafonuá. …
“ʻI hono tali ko ia ʻe he māmaní he taimí ni ʻa e ongoongolelei ʻo Sīsū Kalaisi kuo toe fakafoki maí, ʻoku tau hoko kotoa ai ko ha kau paionia ʻi hotau ngaahi feituʻú mo e tūkungá.”
Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Ko e Tokanga ki he Leʻo ʻo e Kau Palōfitá,” Liahona, Siulai 2008, 3.
ʻOku Faitāpuekina e Taha Kotoa ʻe he Toʻu Tangata ʻUluakí
“ʻI hoʻo hoko ko e fuofua tokotaha ho fāmilí ke tali e ongoongoleleí, ʻokú ke hoko ai ko e ʻuluaki toʻu tangatá, ko ha toʻu tangata fili ʻe tāpuekina ai e ngaahi toʻu tangata ʻo e kuohilí, lolotongá, mo e kahaʻú. …
“… ʻOku lahi ʻetau laukonga mo fakamatala he Siasí ʻo kau ki he kau paionia ʻi he konga ki muʻa ʻo e hisitōlia ʻo e Siasí. Ko ha toʻu tangata ʻuluaki kinautolu ʻo tatau pē mo koe. …
“ʻE lava ke ʻamoutolu honau tukufakaholó, ʻi hoʻomou hoko ko e ʻuluaki toʻu tangatá. Faivelenga, tokoniʻi ho kāingá, tāpuekina ho fāmilí pea fai ʻa e ngaahi fili ʻoku totonú. Ko e ʻuluaki toʻu tangatá koe, ko ha toʻu tangata kuo fili ke ne faitāpuekina e kuohilí, lolotongá, mo e kahaʻú.”
ʻEletā Paul B. Pieper ʻo e Kau Fitungofulú, “Ko e Toʻu Tangata ʻUluakí,” Liahona, Nōvema 2006, 11, 13.
ʻOku Fie Maʻu Kotoa Kitautolu
“ʻOku fie maʻu ke tau fakaʻosi ʻa e ngāue ko ia ne kamata ʻe he Kāingalotu paionia he taʻu ʻe 175 kuo hilí, pea ʻi he ngaahi taʻu hokohoko mai aí, ʻe he Kāingalotu faivelenga ʻo e toʻu tangata kotoa pē. ʻOku fie maʻu ke tau tui ʻo hangē ko ʻenau tuí. ʻOku fie maʻu ke tau ngāue ʻo hangē ko ʻenau ngāué. ʻOku fie maʻu ke tau tokoni ʻo hangē ko ʻenau tokoní. Pea ʻoku totonu ke tau ikuna ʻo hangē ko ʻenau ikuná. …
“… ʻOku ʻikai kole mai e ʻEikí ia ke tau fakaheka ha saliote teke; ʻokú Ne kole maí ke fakamālohia ʻetau tuí. ʻOku ʻikai te Ne kole mai ke tau kolosi ʻi ha konitinēniti; ka ʻokú Ne kole maí ke tau kolosi ki he kauhala ʻe tahá ʻo ʻaʻahi ki hotau kaungāʻapí. ʻOku ʻikai te Ne kole mai ke foaki kotoa ʻetau koloa fakamāmaní ke langa ʻaki ha temipale; ʻokú Ne kole maí ke tau foaki mei heʻetau koloá mo hotau taimí neongo e ngaahi fie maʻu ʻa e moʻui ʻi onopōní, ke kei hokohoko atu hono langa e ngaahi temipalé pea ke tau ʻalu maʻu pē ki he ngaahi temipale kuo ʻosi langá. ʻOku ʻikai te Ne kole mai ke tau mate fakamāʻata; ʻokú Ne kole maí ke tau moʻui ʻo hangē ha ākongá.
“ʻE kāinga ʻofeina, ko ha taimi maʻongoʻonga ʻeni ke moʻui ai, pea ʻoku ʻatautolu ke hokohoko atu ʻa e tukufakaholo fakaʻofoʻofa ʻo e moʻui līʻoa ne ʻulungāanga ʻaki ʻe he Kāingalotu ʻo e ngaahi toʻu tangata ki muʻá.”
ʻEletā M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻE Laka Atu e Moʻoni ʻa e ʻOtuá,” Liahona, Nōvema 2008, 81, 83.
Tā fakatātaaʻi ʻo e ʻatá ʻe Craig Dimond