Naʻá ku Ongoʻi e Mole ʻa e Laumālié
Vikatōlia Mikulina, Lūsia
ʻI hoku taʻu 16, naʻá ku kau ai ʻi ha polokalama fakafetongi ako ki muli ʻi ha taʻu ʻe taha. Ne u mavahe mei hoku ʻapí ʻi ʻIukuleiní ki ha kiʻi kolo ʻi ʻAlesona ʻi he USA, ʻo u nofo ai mo ha fāmili Siasi. Naʻe teʻeki ai pē ke u ʻilo ʻe au ha taha Siasi ki muʻa.
Naʻe ʻikai fakangofua ʻe he polokalama fakafetongí ke malanga e fāmilí kiate au, pea naʻe ʻikai ngofua ke u feʻiloaki mo e kau faifekaú. Ka naʻá ku ʻalu mo e fāmili ne u nofo aí ki he lotú pea kau he ngaahi ʻekitivitī kotoa ʻa e Siasí.
Naʻá ku ongoʻi ʻa e Laumālié he fāmili ko iá, pea ongoʻi moʻoni mo e ʻofa ʻa e kāingalotú. ʻI he taimi ko iá ne ʻikai ke u ʻilo ko e laumālie ne u ongoʻí, ka naʻe ongo ia ki hoku lotó.
ʻI heʻeku foki ki ʻIukuleiní, naʻe ongo ʻaupito ʻeni. Naʻá ku manatuʻi e anga ʻeku moʻuí heʻeku ʻalu ki he lotú pea moʻui ʻaki e ngaahi akonaki ʻo e ongoongoleleí. Naʻá ku fakatokangaʻi e meʻa naʻe molé, ka naʻe ʻikai ke ʻi ai e siasí mo e kau faifekaú he feituʻu ne u nofo aí, pea ne u pehē he ʻikai pē ke u toe maʻu ʻa e ongo ko iá.
Hili ha taʻu ʻe fā mei ai, naʻe tukituki mai e ongo faifekaú ʻi homau ʻapí. Naʻá ku fuʻu fiefia ke fetaulaki mo kinaua. ʻI he lolotonga ʻena ngāué, naʻá na fakafanongo ki he Laumālié, ʻo taki mai ai kinaua ki homau ʻapí. ʻOku hounga moʻoni kiate au ʻena talangofuá. ʻIkai fuoloa mei ai naʻe papitaiso pea hilifakinima au.
Pea kuo silaʻi au ʻi he Temipale Sitokiholomu Suetení ki hoku husepānití, ko ha tamasiʻi mei Lūsia ne ʻosi ngāue fakafaifekau. Pea ko ʻeni kuo ʻi ai ha temipale ʻi Kievi. ʻOkú ma palani ke ʻalu maʻu pē ki ai.
Ko e temipalé ʻa e feituʻu fakaofo taha he māmaní. Ko ha feituʻu ia te ke lava ke ofi ai ki he Tamai Hēvaní. ʻOku hounga kiate au he ʻoku lava ke tau maʻu ʻi he temipalé ʻa e taha ʻo e ngaahi meʻaʻofa mahuʻinga taha mei heʻetau Tamai Hēvaní: ke silaʻi kitautolu ko e ngaahi fāmili ke taʻengata.
ʻOku hounga kiate au ʻa e kau mēmipa ʻo e fāmili Siasi naʻa nau tokoni ke u ongoʻi ʻa e Laumālié, ʻo ʻai ke u kamata ha fononga ʻe tataki atu au ke maʻu ai haku fāmili ʻe silaʻi ke taʻengata.