Nofotaha ʻa e Liahoná mo e Ensign ʻi he Tohi ʻa Molomoná ʻi he Pulusinga ʻo ʻOkatopá
ʻOku angamaheni ʻaki ʻe he ngaahi makasini ʻo e Siasí hono paaki ha pulusinga ʻoku nofotaha ʻi ha foʻi tefito ʻe taha. ʻI he pulusinga ʻo ʻOkatopa ʻo e taʻu ní ʻe fakatefito ʻa e Liahoná mo e Ensign ʻi he Tohi ʻa Molomoná.
ʻE nofotaha ʻa e pulusingá ʻi ha ngaahi fehuʻi mahuʻinga ʻe tolu: Ko e hā ʻa e Tohi ʻa Molomoná? Ko e hā nai e ʻuhinga ʻoku tau maʻu ai ʻa e Tohi ʻa Molomoná? Ko e hā e mahuʻinga ʻo e Tohi ʻa Molomoná kiate aú?
ʻE kau ʻi he pulusingá ʻa e hisitōlia ʻo e Tohi ʻa Molomoná, ngaahi aʻusia fakataautaha ʻa e kāingalotú, ngaahi fokotuʻu ki he ako folofolá, mo e fakamatala ki he anga ʻo hono fakaʻaongaʻi ʻi he ʻaho ní. ʻE fakakau atu ki he pulusingá ha ngaahi fakamoʻoni mo ha ngaahi fakakaukau ʻa ha kau palōfita mo ha kau ʻaposetolo ʻe 15 ki he Tohi ʻa Molomoná, pea pehē foki ki he Kau Palesiteni ʻo e Siasí kuo mālōloó.
Naʻe pehē ʻe Senifā Kuliniuti, ko e tokoni ʻētita pule ʻo e Liahoná, “ ʻOku ʻi ai e mālohi ʻi he ngaahi fakamoʻoni ʻa kinautolu ʻoku nau taki ʻa e Siasí. ʻOku makatuʻunga ʻenau ngaahi fakamoʻoní ʻi he Tohi ʻa Molomoná, ʻa ia ko e maka-tuʻu-loto ia ʻo ʻetau tui fakalotú. ʻOku ʻi ai haʻamau loto-holi lahi ke ongoʻi ʻe he kāingalotú ʻa e ngaahi fakamoʻoni ko iá.”
Naʻe pehē ʻe ʻEletā Paula B. Paipa ʻo e Kau Fitungofulú, ko e Talēkita Pule ʻo e Nāunau Fakalēsoní, ʻoku poupouʻi ʻa e kāingalotú ke ngāue ʻaki ʻa e pulusingá ʻi ha founga ʻe ua.
Naʻá ne pehē, “ ʻUluakí, ʻoku totonu ke toe vakaiʻi ia ʻe he kāingalotú mo e kau faifekaú ke langa hake pea ke fakamālohia fakataautaha ai ʻenau ngaahi fakamoʻoní ki he Tohi ʻa Molomoná. Ko hono uá, ʻoku totonu ke nau vahevahe ʻa e makasiní mo e niʻihi kehé, ʻo kau ai ʻa e kāingalotu māmālohi ʻo e Siasí mo e kakai ʻoku teʻeki ai kau mai ki he Siasí.”
Naʻe pehē ʻe Sisitā Kuliniuti, “ ʻOku mau fakaʻamu ke hoko e pulusinga ko ʻení ko ha maka-tuʻuʻanga maʻá e kakaí ke nau fakaava ʻa e Tohi ʻa Molomoná pea toe fakatukupaaʻi kinautolu ki ai. Ko e meʻa fakafiefia ke talanoa ʻo kau ki he Tohi ʻa Molomoná, lau ʻa e Tohi ʻa Molomoná, pea ke ako e ngaahi meʻa ʻo kau ki he Tohi ʻa Molomoná, ka ko e Tohi pē ʻa Molomoná ʻokú ne fai ʻa e fakauluí, ʻa ia ʻokú ne ʻomi e kakaí ke toe vāofi ange mo e ʻOtuá.”
Kuo matuʻuaki ʻe he Tohi ʻa Molomoná e ngaahi sivi ʻo taimí, ʻahiʻahí mo e fakamoʻoní pea ko e uho ia ʻo e ongoongolelei ʻa Sīsū Kalaisí.
Naʻe pehē ʻe ʻEletā Paipa, “Naʻe teuteuʻi ʻa e pulusinga ko ʻení mo e ʻamanaki te ne ʻomai ʻa e ueʻi fakalaumālié ki he ngaahi fāmilí mo e fakafoʻituituí ʻi heʻenau fekumi ki he mahinó, fakahoko mo vahevahe mo e niʻihi kehé ʻa e ngaahi akonaki ʻo e Tohi ʻa Molomoná.”
ʻE maʻu atu ʻa e pulusinga ʻOkatopá ʻi ha ngaahi lea fakafonua ʻe 42. ʻOku poupouʻi ʻa e kāingalotu kotoa pē ke nau maheni mo e ngaahi meʻa ʻoku ʻi aí. ʻE maʻu mei he pulusingá ʻi ha toe lea fakafonua makehe ʻe 39 ʻa e Pōpoaki ʻo e Kau Palesitenisī ʻUluakí mo e Pōpoaki Faiako ʻAʻahí. ʻE toe maʻu atu foki mo e pulusinga kakató ʻi he ʻInitanetí ʻi he ngaahi lea fakafonua kehekehé ʻi he ngaahi uepisaiti ʻa e Liahoná mo e Ensign.
ʻE lava ke ʻaʻahi atu ʻa e kāingalotu ʻoku fie maʻu makasiní, fie maʻu ke meʻaʻofa atu ʻaki ʻa e makasiní, pe maʻu ha ngaahi tatau lahi ange ʻo e pulusinga ʻo e Tohi ʻo Molomoná ki he Fale Nāunau ofi tahá pe hū ki he ʻinitanetí ki he store.lds.org.
ʻE nofotaha ʻa e pulusinga ʻOkatopa ʻo e Liahoná mo e Ensign ʻi he Tohi ʻa Molomoná.