Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.
“Tāpuekina e Toʻu Tangata Lahi Tuʻunga ʻi ha Paionia Loto Toʻa ʻe Taha,” peesi 16: ʻI hoʻo vahevahe ʻa e fakamatala ko ʻení mo ho fāmilí, fakakaukau ke mou fealeaʻaki ki hono tākiekina ʻe he sīpinga ʻa Salá ʻa ʻene tamaí. Aleaʻi pe ʻe lava fēfē ʻe hoʻo hoko ko ha sīpingá ʻo tākiekina e niʻihi ʻoku mou feohi ki he leleí pe koví. Fokotuʻu ha taumuʻa ke hoko ko ha “paionia lototoʻa” ʻi he ʻaho kotoa pē.
Naʻá Ne ʻEke Mai Ia Kiate Au?”, peesi 42: Lolotonga hono vakaiʻi e fakamatalá, fakaʻilongaʻi mo fakafehoanaki e ngaahi meʻa ʻoku hohaʻa ki ai e kāingalotu e Siasí fekauʻaki mo honau ngaahi uiuiʻí. Lau ʻa e konga ʻo e lea ʻa Palesiteni Monisoní pea toki aleaʻi e ngaahi founga ke fakaafeʻi ai ʻa e tokoni ʻa e Tamai Hēvaní ʻi hono fakahoko ho ngaahi fatongiá. Fakakaukau ke toe vakaiʻi ʻa e ngaahi maʻuʻanga tokoni ʻoku lisi atu ʻi he “Maʻu Tokoni mei he Ngaahi Maʻuʻanga Tokoni Kehé.”
“Ko e Siasi Moʻoni mo Moʻui Pē Taha,” peesi 48: Fakakaukau ke lisi ʻa e ngaahi meʻa ʻe tolu naʻe pehē ʻe ʻEletā ʻOakesi ʻokú ne ʻai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e Siasi moʻoni mo moʻui pē taha ʻi he māmaní. Aleaʻi ʻa e konga taki taha mo e founga ʻokú ne tāpuekina ai ho fāmilí. Mahalo te ke fakakaukau ke fakafaivaʻi e founga ʻe lava ai ho fāmilí ʻo fakamoʻoni ki he ngaahi konga ko ʻení kiate kinautolu ʻo e ngaahi siasi kehé.
“Ngaahi Fakalaulaulotó,” peesi 60: Hili hoʻomou lau fakataha ʻa e fakamatalá, tuku ki he mēmipa takitaha ʻo e fāmilí ke nau sio ki ha sioʻata pea fakamatala ʻa e meʻa ʻoku nau sio ki aí. Tokoniʻi e tokotaha takitaha ke ne ʻiloʻi ʻokú ne sio ki ha fānau ʻa e Tamai Hēvaní. Mahalo te ke fie maʻu ke aleaʻi mo fai ha fakamoʻoni ki he lahi ʻo e ʻofa ʻokú Ne foaki kiate kitautolu taki taha mo e mahuʻinga ke tuku ʻetau falalá kiate Iá. Mahalo naʻá ke fakakaukau ke mou lau fakataha ʻa e Saame 56:4 mo e 1 Kolinitō 2:9.
Ko ha Lēsoni Fakamoʻoni
ʻI he taimi naʻá ku fuofua mali ai mo hoku husepānití, naʻá ku hohaʻa naʻa ʻikai fakafiemālie pe toutou fai e meʻa tatau heʻema efiafi fakafāmilí he ʻokú ma toko ua pē. Naʻá ku fakakaukau ʻe ʻosi ʻa e ngaahi meʻa ke ma feakoʻaki aí. Ka naʻe fakaʻohovaleʻi au ʻe hoku husepānití ʻi heʻema ʻuluaki pō Mōnité ʻaki ʻene pehē mai, “ ʻOku ou fie fai ʻeku fakamoʻoní.” Naʻá ne hoko atu ke vahevahe ʻene fakamoʻoní ki he Fakamoʻuí mo e nofo malí. Hili ʻene fakamoʻoní, naʻá ku vahevahe leva ʻeku fakamoʻoní. Naʻe hoko ia ko ha efiafi te u mataʻikoloaʻaki maʻu pē. Neongo naʻe ʻikai ke ne ʻiloʻi ʻeku hohaʻa ki he efiafi fakafāmili ʻi ʻapí, ka naʻá ne fakahoko e tali ki aí, peá u ʻiloʻi ko e efiafi fakafāmili ʻi he ʻapi takitaha ko ha aʻusia fakalaumālie ia ke u ʻamanaki atu ki ai.
Talu mei ai mo e hoko ʻa e fakamoʻoní ko ha tukufakaholo ia ʻi heʻema ngaahi efiafi fakafāmili ʻi ʻapí. Neongo ko e taimi ní ʻoku ʻi ai homa kiʻi ʻōfefine siʻisiʻi pea ʻokú ma fakafeʻungaʻi ʻa e lēsoní kiate ia, ʻoku ʻikai tuku ai hono fakahoko ʻema fakamoʻoní. ʻOku ou ʻamanaki fiefia atu ki he ʻaho te u lava ai ʻo fanongo ki he ngaahi fakamoʻoni ʻa ʻeku fānaú mo e taimi te u lava ʻo akoʻi ai kiate kinautolu ʻa e mahuʻinga ʻo e ngaahi fakamoʻoní.
Haitī ʻAikilianu, Kenitaki, ʻAmelika