Ngaahi Talanoa ʻo Sīsuú
Ko Hono Tāpuakiʻi ʻe Sīsū ʻa e Fānaú
Mei he Maʻake 5:21–24, 35–43; 10:13–16.
Naʻe tangutu ʻa Sailosi mo hono uaifí he veʻe mohenga hona ʻofefiné mo e loto hohaʻa. Naʻe fakalalahi e puke hona ʻofefiné he houa kotoa pē, pea naʻá na ilifia naʻa mate. Ko e meʻa pē ʻe taha naʻá na ʻilo ʻe lava ke tokoni kiate iá.
Naʻe lele fakatoʻotoʻo atu ʻa Sailosi he ngaahi hala ʻo Kāpaneumé ko e feinga ke kumi ʻa Sīsū ʻo Nāsaletí. Naʻe ʻiloʻi ʻe Sailosi kuo fakamoʻui ʻe Sīsū ʻa e kakaí. Mahalo pē naʻa haʻu ʻa Sīsū ʻo fakamoʻui hono ʻofefiné.
Naʻe fakatahataha hake ʻa e kakaí ki he matātahí ʻa ia ne toki hifo ai ʻa Sīsū mei ha vaka. Naʻe tutui atu ʻa Sailosi he fuʻu kakaí ʻo ofi ki he ʻEikí. Naʻe tūʻulutui ʻa Sailosi ʻo tala kia Sīsū ʻoku puke hono ʻofefiné pea mei mate.
Naʻe kole ʻa Sailosi, “Ko hoku ʻofefine siʻí ʻoku tei mate, haʻu ʻo hili ho nimá kiate ia, koeʻuhi ke ne moʻui ai; pea ʻe moʻui ia.”
Naʻe loto ki ai ʻa Sīsū, pea muimui kiate kinaua ʻa e kakai tokolahi.
Naʻe lele mai ha talafekau ʻo fakafetaulaki kiate kinaua ʻo fakahā kia Sailosi kuo ʻosi mate hono ʻofefiné. ʻOku ʻosi tōmui ia kia Sīsū ke haʻu ʻo tokoni. Ka naʻe pehē ʻe Sīsū kia Sailosi, “ʻOua te ke manavahē, ka ke tui pē.”
ʻI heʻena aʻu atu ki he ʻapi ʻo Sailosí, naʻe lahi e tangí mo e longoaʻá. Naʻe tokolahi ha kakai he falé, naʻe tangi mo loto mamahi.
Naʻe hū atu ʻa Sīsū ki he falé ʻo talaange ke ʻoua te nau tangi, koeʻuhí he ʻoku ʻikai ke mate ʻa e taʻahiné ka ʻoku mohe pē. Naʻe kataʻi ʻe he kakaí ʻa Sīsū. Naʻa nau ʻilo kuo mate e taʻahiné.
Pea fekau ʻe Sīsū ke ʻalu kotoa e kakai naʻe longoaʻá. Naʻá ne ʻave leva ʻa Sailosi mo hono uaifí, kau ai mo ʻEne kau ʻAposetolo ko Pita, Sēmisi, mo Sioné, ki he loki naʻe tokoto ai e taʻahiné.
Naʻe puke hake ʻe Sīsū e nima ʻo e taʻahiné mo ne pehē, “Taʻahine, ʻoku ou pehē kiate koe, tuʻu hake.”
Naʻe tuʻu hake ʻa e taʻahiné. Naʻe fiefia mo ʻohovale ʻa e ongomātuʻá. Kuo moʻui hona ʻofefiné!
Naʻe ʻi ai ha ngaahi taimi naʻe fakamoʻui ai mo tāpuakiʻi ai ʻe Sīsū ʻa e fānaú. Ne ʻi ai ha ʻaho ʻe taha naʻe haʻu ha kakai tokolahi ʻi Pelea ki he Fakamoʻuí, ke fanongo ki Heʻene akonakí. Naʻe ʻomi ʻe he kakaí ʻenau fānaú kia Sīsū ke Ne tāpuakiʻi kinautolu.
Naʻe mamata e kau ākonga ʻa Sīsuú ki he fānaú pea tuli ke nau ʻalu. Naʻe femoʻuekina ʻa Sīsū he naʻe tokolahi e kakaí, pea hangē ʻoku ʻikai mahuʻinga e fānaú. Ka naʻe tala ʻe Sīsū ki he kau ākongá, “Tuku ke haʻu kiate au ʻa e tamaiki īkí, pea ʻoua naʻa taʻofi ʻa kinautolu, he ʻoku ʻo e kakai peheé ʻa e puleʻanga ʻo e ʻOtuá.”
Pea naʻe puke atu ʻe Sīsū ʻa e fanga kiʻi tamaikí. Naʻá Ne hili Hono nimá ki honau ʻulú ʻo tāpuakiʻi kinautolu. Naʻe tala ʻe Sīsū ki he kakai lalahí ʻoku fie maʻu ke nau angavaivai hangē ko e fānau īkí.