Ko Hono ʻOmi ʻo e Palaimelí ki ʻApi
Ko Hoku Sinó ko ha Temipale Ia ʻo e ʻOtuá
ʻE lava ke ke fakaʻaongaʻi ʻa e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.
“ʻIkai ʻoku mou ʻilo ko e fale tapu ʻo e ʻOtuá ʻa kimoutolu, pea ʻoku nofoʻia ʻa kimoutolu ʻe he Laumālie ʻo e ʻOtuá? …“Ko e faletapu ʻo e ʻOtuá ʻoku māʻoniʻoni, pea ko e faletapu ko iá ʻa kimoutolu” (1 Kolinitō 3:17).
Kuikui ho matá pea fakakaukau ki ha temipale. ʻOku lanu hā? Hā hono lahí? ʻOku ʻi ai hano matapā sioʻata? ʻI ai ha ngaahi taua? ʻOku fiha?
ʻOku kehekehe pē ʻa e ngaahi temipale kotoa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e Temipale Sōlekí ʻi ʻIutā ʻoku holisi kalānite lanu kulei mo e taua ʻe ono. ʻOku kehe ia mei he Temipale Kātisitoni ʻAlapetá ʻi Kānata, ʻa ia ʻoku holisi maka ʻikai hano taua. Neongo e kehekehe e ngaahi temipalé, ka ʻoku nau fakaʻofoʻofa kotoa pea langa ki he taumuʻa pē ʻe taha. Ko e ngaahi feituʻu ia ʻoku fakahoko ai ha ngaahi ouau makehe ʻoku tau fie maʻu ke tau foki ai ki he Tamai Hēvaní.
ʻOkú ke hangē pē ha temipalé. ʻOkú ke kehe koe mei he taha kotoa pē, ka ko ha fale foki koe maʻá e Laumālie ʻo e ʻOtuá—ko e Laumālie Māʻoniʻoní. Naʻe pehē ʻe he ʻAposetolo ko Paulá, “ʻIkai ʻoku mou ʻilo ko e fale tapu ʻo e ʻOtuá ʻa kimoutolu, pea ʻoku nofoʻia ʻa kimoutolu ʻe he Laumālie ʻo e ʻOtuá? … Ko e faletapu ʻo e ʻOtuá ʻoku māʻoniʻoni, pea ko e faletapu ko iá ʻa kimoutolu” (1 Kolinitō 3:16-17). Ko ho sinó ko ha temipale ia maʻa ho laumālié.
ʻOku totonu ke ke fakaʻapaʻapaʻi ho sinó, hangē pē ko hoʻo fakaʻapaʻapaʻi ʻa e temipalé. Te ke lava ke fai ʻeni ʻi hoʻo talangofua ki he Lea ʻo e Potó (vakai, T&F 89), ʻaki haʻo vala lelei, pea tauhi ho sinó ke maʻa. ʻOku totonu ke tauhi ho lotó mo e ʻatamaí ke maʻa ʻaki hano lau, fanongo, mo sio pē he “ngaahi meʻa ʻoku hōifua ki ai e Tamai Hēvaní” (vakai, Ko Hoku Ngaahi Tuʻunga Mahuʻinga ʻi he Ongoongoleleí).
Te ke lava ke maʻu ha ngaahi tāpuaki lahi, ʻi he maʻa ho ʻatamaí mo e sinó.
ʻEkitivitií
Kumi ho halá ʻi he hala fihifihi ko ʻení. ʻI haʻo aʻu ki ha fakaʻilonga, fili e hala ʻIó pe ʻIkaí tuʻunga he fakatātaá ha meʻa ʻe tokoni ke ke tauhi ai ho sinó ʻo hangē ko ha temipale ʻo e ʻOtuá. ʻE tataki koe ki he temipalé ʻi hoʻo fili e hala ʻoku totonú.
Ta ha fakatātā ʻo ha meʻa ʻe fā kehe ʻoku sai kiate koe. Kosi hoʻo fakatātaá ʻo fakapipiki ia ʻi he ngaahi fakatātā ʻo e fili leleí ʻi he hala fihifihí.
Fuaʻiʻakau mo e Vesitapolo
Kava Mālohi mo e Tapaka
Mā mo e Uite
Ko Hono Ako ʻo e Folofolá
Televīsone Taʻetaau
Vala Taau
Ngaahi tā fakatātā ʻa Scott Greer