ʻAlu ki he Lotú!
Tuaiti Līuloi Tēnisi, ʻIutā, USA
ʻI heʻeku foomu 5 he ako māʻolungá, ne u feʻiloaki ai mo ha taʻahine Siasi ʻi heʻeku kalasi ʻātí. Naʻé fuʻu mālohi ʻaupito hono ivi tākiekiná heʻeku moʻuí, pea ne u papitaiso ai ko ha mēmipa ʻo e Siasí.
ʻI heʻeku ʻosi mei he ako māʻolungá, naʻe loto ʻeku ongomātuʻá ke mau hiki mei Kalefōnia ki ʻAitahō ʻi he USA. Naʻe tau leva e taulaní ki heʻemau lolí pea mau fononga fakatokelau. Ne mau fakalaka siʻi atu pē mei Laviloka ʻi Nevatá, mo e kamata ke fuʻu vave ʻeku lele hifo he kiʻi foʻi moʻungá. Koeʻuhí naʻe ʻikai ha ngaahi meʻa fakamaʻu ke tuʻumaʻu ai e taulaní, ne femaleleaki ia ki he ongo tafaʻakí. Naʻá ku moloki fakafokifā e taʻofí, pea punakaki e taulaní, ʻomau tō ai ki ha fuʻu luo he veʻehalá kae hilifakia e lolí he tafaʻaki ʻe taha ʻo e luó pea ko e taulaní he tafaʻaki ʻe tahá.
Ko e meʻamālié ne ʻikai ha taha ʻe lavea. Ka ne fuʻu maumau lahi e lotoʻi taulaní mo e tafaʻaki ki tuʻá. Kuo pīkoua e taulaní, pea mafahifahi kotoa e ʻū matapā sioʻatá, pea kuo mofele holo ʻi tuʻa ʻemau utá.
Naʻe aʻu mai e polisi halá ʻo fetuʻutaki ke haʻu ha loli ʻo taulaniʻi kimautolu. Naʻe ʻikai ʻilo ʻe he ongomātuʻá ʻa e meʻa ke faí. Ko e kiʻi paʻanga siʻisiʻi naʻá na maʻú naʻe ʻave ia ki he kautaha naʻe haʻanautolu e loli taulaní. ʻI he momeniti ko iá naʻe ongo mālohi ʻaupito kiate au ke u ʻalu ki he lotú he ʻaho hono hokó, ʻa ia ko e Sāpaté. Naʻe fakakaukau e tangataʻeikí, ʻa ia naʻe ʻikai kau ki he Siasí, mahalo ʻoku ou vale. Naʻe fakamāʻopoʻopo ʻemau ngaʻotoʻotá pea ngaohi e taulaní, pea koeʻuhí naʻá ne mamatea pea ʻikai moʻui lelei, ko au ne u meimei fai kotoa e ngāué. Ka naʻe kei hokohoko atu pē ʻa e ongo mālohi ke u ʻalu ki he lotú. Naʻá ku kole ki heʻeku faʻeé ke ne fai ha tautapa ki he tangataʻeikí. Naʻá ne fai ia, pea fakaʻohovale ʻene talí.
ʻI he pongipongi Sāpaté ne u ʻilo ai e falelotú peá u tangutu pē he ʻotu sea ʻi mui he falelotú ko e teu ia ke kamata e sākalamēnití. Naʻá ku lotu ke maʻu ʻe hoku fāmilí e Laumālié he taimi faingataʻa ko ʻení.
ʻI he tuku ʻa e lotú, naʻe fakafeʻiloaki mai ha toko ua kiate au, peá u fakamatalaʻi ange leva ʻa e meʻa ne hokó. Ne u foki leva ki he feituʻu ne mau nofo aí pea fakamoleki e ʻahó kotoa ke tokoni ʻi hono fakamaau ʻemau ʻū meʻá.
ʻI he pongipongi Mōnité ne toe kamata ʻemau fakamāʻopoʻopó mo e aʻu mai e kau mēmipa he uooti naʻá ku maʻulotu aí, ʻo fai ha tokoni. Naʻe talamai ʻe ha taha ʻoku haʻana ʻa e falekoloa ki he matapā sioʻatá, te ne fetongi taʻetotongi kotoa e ngaahi matapā sioʻata ʻo e taulaní, pea kasaʻi taʻetotongi ʻe ha tangata kasa e foʻi hoko ʻo e taulaní.
Naʻe ʻikai faʻa lea ʻeku tamaí ka naʻá ne fuʻu ʻohovale, pea tangi ʻeku faʻeé he houngaʻiá, pea ne ma fakamālō mo hoku tuofefiné ʻi he tokoni naʻe faí. ʻI he fakaʻosinga e ʻahó, kuo mau mateuteu ke hoko atu ʻemau fonongá ki ʻAitahō.
Ne u ako mei he meʻa ko ʻeni naʻe hokó, ʻoku moʻoni e ueʻi ʻa e Laumālié. Naʻá ku toe ʻilo ʻoku faʻa tali ʻetau lotú ʻi he kakai kehé pea ʻe maʻu e nongá mo e fiefiá ʻi he falala ki he ʻEikí.